見吹到話神劇乜乜乜，見豬文出fb post評（我有啲 points同佢好似，落個reference先），我含住淚追左足足三季，為左令痛苦喺我呢度終止，為左令suffering有啲meaning，我決定寫呢篇勸世文。
我自問睇劇都真係好寬容，你玩深度又得，玩marvel無腦式打打打我都得，但dark真係唔_得。
不過我份人就好公道，要讚嘅我唔會吝嗇，Dark有個好好嘅優點，就係佢首主題曲好好聽。
好喇，我地開始講缺點：
1.無腦式燒腦劇情
啲人講到dark好燒腦呀，唔用腦睇唔明呀，我同意，但佢燒嘅唔係思考能力，純粹係記憶能力。我有面盲症+姓名失憶症，dark 人物眾多、時間線瘋狂穿插，我係真係要寫notes先跟到，而一套劇複雜到咁，要我「用腦」到咁，我期望真係會換到幾粒黃豆。睇Game of Thrones（唔計最後兩季，我唔承認佢地係套劇嘅一部分）我都要寫notes，但佢搞到咁複雜，係有個目的加嘛，佢係展現緊唔同國家之間以至國家內部嘅爾虞我詐、勾心鬥角，咁複雜係好合理。如果你有套劇刻劃戰國時代外交，都一定會好複雜。
但dark呢？搞到咁複雜，寫左咁多notes，我換嚟啲咩？呢個世界公平咩？我睇完個結局真係空白左幾分鐘。我真心唔覺得佢呢種複雜係為左表達任何深意，而純粹係：「點呀？係咪好複雜呢？你記唔記得晒呀？」大佬呀，要複雜，我夠可以寫套劇，有10000條友，幾百個時空，寫到冇正常人類記得到，但what is the point？
2.棋子式人物
如果你係一套兩個鐘嘅懸疑片，為左花晒啲篇幅刻劃曲折嘅劇情，冇乜時間刻劃人物，搞到人物面目模糊，我可以接受。
dark足足花左三季，每季至少八集，每集接近一粒鐘，最後你要我講男女主角有咩吸引人嘅性格特點，我竟然唔係好講到；佢地條愛情線，我竟然係可以完全投入唔到。淨係識得係咁同對方講：「我地天生一對」、「我地命中注定」，講經咩，我唔係要你地話比我知你地天生一對呀，我要你show比我睇呀。
都唔只男女主角，劇入面絕大部分嘅角色，性格都唔鮮明吸引，基本上只係推動劇情發展嘅一隻棋，「我絕不罕有，往街裡繞過一週，我便化烏有。」
3.謎語式對白
啲人成日話咩好有深度好哲學，我懷疑純粹係嚟自佢得閒會穿插啲懶係型嘅謎語式對白，但我讀philosophy㗎，唔好同我嚟呢套啦，法眼面前，畫皮根本無所遁形。佢講嚟講去不外乎就係呢個道理：「萬事互相關聯，唔只過去影響未來，未來都會影響過去。」
就係呢個三句就講得完嘅道理，佢每集都要搵個旁白用懶神秘嘅語氣、懶型嘅方式講一次，好煩呀，講夠未呀，我要煩駛唔駛睇你呀，我去同我呀妹傾計咪得囉。
成套野就通過呢堆重重覆覆嘅對白，再加啲人物不停打啞謎，一季拍得完嘅嘢拖到變左三季，第二季中段開始，我真係睇得好辛苦，我係悶到去睇一陣唐君毅（佢都已經好悶，唔信你試下），再番番嚟捱。
4.笑點：creepy三人組
最後，有個位我真係要拎出嚟重點笑兩句，記住，呢套係懸疑片，唔suppose係好笑㗎，但到第三季出現左三條友，佢地每次出現我都真心笑出聲。
呢三條友，著住同樣服裝，一個老年一個中年一個細路，我稱之為creepy三人組。
佢地每次出現，就會同步擺啲懶型嘅MV pose，露出一個好creepy嘅樣，然後開始殺人。
佢地個樣基本上就係不停話緊比你聽：「我殺人殺得好creepy㗎，你驚唔驚？驚唔驚呀？嘻嘻。」
做乜_呀_，你地係咪出嚟搞笑㗎，現實中邊有人殺人係咁殺㗎，如果呢三條友嚟殺我，我應該會喺歡樂中安然入睡，輸了性命，贏盡笑聲。
5.總結
人人都有中二病重嘅青春期，有啲人短，有啲人長。Dark到死都係青春期，燒左我個腦30個鐘。如果未來真係可以影響過去，如果我見到30個鐘前嘅自己，我會同佢講：「hey，你有冇興趣玩90場fifa？」
原文link https://www.facebook.com/1064012326/posts/10220116916447532/?d=n
