【東方新地】 有餡初期收收埋埋懶神秘,踏入四月失驚無神日日update懷孕日記,因乜解究吳若希(Jinny)態度180度轉變突然高調?原來想鋪定路復出!Jinny雖臨盆在即,但遇着同公司鄭俊弘背未婚妻偷食事件,於是佢身負重任,頂替世紀賤男喺7月開紅館騷,難怪未生就要諗定點樣快啲修身、未復出就谷定人氣鋪路啦!
吳若希 未生B諗定修身
本來就快實現紅館夢的鄭俊弘,因偷食何雁詩而淪為世紀賤男,更得罪埋老闆何哲圖,隨即將7月紅館檔期送俾愛將吳若希!Jinny今次臨危受命,當然一口答應。預產期4月尾、心急復出的Jinny為以最佳狀態示人,未生B已經諗定修身,最近就在訪問中表示最擔心身材走樣:「一世人未試過上圍B cup變D cup,開心囉!不過心口太大都係負擔,肥咗44磅最怕瘦唔番,同餵完人奶會變『dum』波。」
奉命頂走賤男
陀B九個月,吳若希月初陀住巨肚從澳門奉召回港,密會老闆何哲圖部署復出大計,重頭戲正是七月頂替鄭俊弘的紅館期!據知Jinny向來最得何哲圖歡心,之前突然大肚,不過應承生完立即復出。最近鄭俊弘出事潛水,何哲圖開聲叫Jinny頂咗個紅館期,Jinny一口應承!
半裸照放閃
吳若希為復出在社交網絡鋪定路,本來唔多願提的未婚懷孕,索性變成宣傳主線,近日頻頻回港同唱片公司舊將、藝人朋友聯絡感情。另外又不厭其繁同另一半Alex日日放閃,甚至發放半裸波餅孕照露本錢,成功營造敢做敢當佻皮嫰媽形象,受落程度反而比孕前更高!
吳若希當年打cutie玉女招牌,懷孕初期收收埋埋唔敢認,臨盤在即心急收復失地,最爆莫過於呢張同經手人Alex嘅漲奶波餅放閃照。
為咗配合佈署復出嘅Jinny,焗住頻頻跟住另一半過大海會圈中人,仲要不斷上鏡幫手放閃製造恩愛和諧畫面。