[26]分享--沙駕強制試當日流程

是咁的，我啱啱晌沙駕考完強制，趁仲記得個考試流程，寫低佢同大家分享吓。
希望大家知道個流程，可以無咁緊張。順利合格。
我淨係識沙駕，其他試場係點唔好問我，等其他巴絲分享喇。

報到︰
考試前35分鐘先去考試辦公室報到，交身份証同車牌，然後等叫名，考官會俾返身份証同一張車咭你，拎齊袋同裝備跟導師出去試車。我果個考試時段一共有7個人。

呢35分鐘係俾你試車用嘅，千祈要準時，唔係試唔到車，損失嘅係你自已。當然佢都會俾你考嘅。

試車︰
1. 去到強制場，有張枱俾你擺袋。導師會講解個考試流程，提你將會有個視力測試，無戴眼鏡嘅唔該戴返，然後試下你讀唔讀到啲車牌，make sure你係睇到嘢嘅。
2. 然後就按車咭上嘅編號去拎車，車會泊晌試場右上方(即是平時泊46嘅側邊)，考完推車要推返去呢度。身份証要跟身，因為陣間考官要睇。
3. 然後就可以試車。試車主要係晌強制場入面兜圈、1波轉2波，等你熟習架車嘅性能，亦都有一次機會俾你做緊急煞車，試下架車個brake有無問題。
4. 試完無問題就會叫你熄車、晌考試起步點果度排好啲車(好似平時練果陣咁排法)，然後返入考試辦公室再等/涼下冷氣。

考試
1. 過大約十分鐘再返出試場，每個人會按考試次序排好隊，考棍嘅排前面，考自動波嘅排後面。
2. 等考官行埋黎，逐個對身份證同做視力測試，做完嘅人，可以埋去車果度等開考。
3. 考官會企入考場個玻璃箱入面，然叫用咪呼叫第一個考生全名。前一個考生出發咗，就可以推架車埋去起步位，騎上去，等考官叫名，舉手之後，考試就開始了。
4. 全程你自己做，無人會提你(除非你hang咗機唔知點算、或者跌車唔知應唔應該繼續，佢先會提你)。
5. 考完，推住部車由試場右上方離開，去返原先拎車個位度放好架車，然後除頭盔手套，等所有考生考完。
6. 如果考官無咩特別訓示(例如某個考生做咗啲好錯嘅行為要當面訓斥)，大家等考官離開，導師會提大家拎返晒袋同裝備，返去考場交返張車咭同俾阿sir，然後等叫名睇考試結果。其實順利無人大炒/執車嘅話，考7個人大約只係35分鐘左右嘅事。平均每人5分鐘就考完了。

等結果
1. 辦公室手續需時，至少要20分鐘，可以趁機去飲啖水、上個廁所。
2. 如果阿sir叫到你名，俾返張黃紙你，同你講「出返去襟張B飛同職員做手續」即是肥咗，我果次係叫晒肥咗果啲人先嘅。
3. 然後再叫合格果批人，俾返張黃紙你，同你講「你係咪報咗晌學院考路試？」如果係，佢會同你講「出返去襟張B飛同職員做手續排路試期」即是合格咗。

咁成個流程就完了。唔晌沙駕報路試嘅人可以拎住張黃紙搭車走架喇。

晌

沙駕係咪即係 香港駕駛學院其一？

係呀。

都唔係，沙駕考試車用果批車，唔係平時我地租黎跌同撞果批。係另一批，無咁廢。

我覺得考試果批車油門同離合器敏感啲。加埋佢個場黃格起步係暗斜，係難掌握啲。

我練果陣都晌黃格死火無數次。死到慣、死到悶。

係人都知啦廢post

sor...阻你時間....唔好意思。

abc 堂隔一個星期會唔會無咁好仲有你學左3堂 有無再補？

老強 fail左跟著點？

我吸收慢，會覺得隔開學好啲，因為可以俾我中間有啲時間消化吓。

同埋第一日渣車好多嘢唔熟，又唔識推架車，個人又唔知點郗先啱，其實上完堂係好L攰，要抖吓。

但如果你己經BOOK咗，就千祈唔好改，因為依家啲課好FULL，一改就未必就到個考期，寧願上咗先算。

之後自己練，其實唔難。

補堂我有。因為我上完三堂都渣到成PAT屎咁，就咁去考肥硬，所以我係不停補鐘，補到真係識渣為止。

唉，去COUNTER俾錢重考囉，仲可以點。

隔一個月再考定係 重新排期

駕院會有個快少少嘅期俾到你，好似話依家肥，11月已經可以再黎過。

老強肥左都好麻煩

所以情願拎重考果舊錢出黎補鐘，補咁多個鐘，我啲咁嘅廢柴都有機會合格。

以為隔一個月再考過
睇黎要努力練車

驚到時無堂俾我補鐘咋

上個廁所？點上？屌馬桶啊？

唔好賴啦明明架架差唔多

沙駕我就通常就咁WALK IN去租車嘅，未試過無得租，其他駕駛學校我就唔知喇。

一係你唔好預到咁抆，就黎考先至練，早啲去練熟咗先囉。

都無咩好驚，既然報咗，又唔想肥，咪練囉。

你死火一係就吊極力子唔夠耐，未行順就放，一係就俾唔夠油
3堂加考試次次唔同車，個極力子都係差唔多位
大膽d俾多少少油，轉灣瞓落去就好難死火