巴打加油 撐住呀💪🏽💪🏽
我都係過來人，我媽咪胰臟癌末期
上年6月走左，由確診到走都係三個月內發生既事
一開始我都諗點解我媽咪咁好人都要咁早死？點解咁多壞人又唔死？但其實有好多野都係整定，唔係你想點就可以點。唯一好彩既係媽咪走得唔辛苦，好安祥，同埋我可以見到媽咪最後一面，陪住佢走。
我媽咪到照到癌細胞入骨既時候，醫生都話化療已經冇用，最多係時間長番一兩個月，但做化療會好辛苦，所以我媽咪揀左唔化療。
聽過坊間好多偏方，有聽過人話薯仔汁可以醫番癌症末期既病人，可以試下，我媽咪都試過露荀汁，個陣佢話飲左會舒服d，可能我媽咪情況太嚴重，結果對佢都係冇用
其實你唔係醫生，可以做到既野真係好少，如果得，我都衷心希望你可以搵到醫到你媽咪既方法，但同時都希望你做好心理準備。
你可以做既係繼續試唔同方法睇下對你媽咪有冇效，飲食方面煮多d有營養既野比佢食，例如瓜菜、有蛋白質既野，煲多d湯，問番醫生你媽咪依家有乜唔食得。通常癌症末期病人會成日冇胃口，可以煮多d佢鍾意食既野，要食多d野先有力打尼場仗。可能之後佢會好難吞野，個陣就儘量煮d易吞既野，例如粥同魚，不過魚要小心d骨，尼個時候如果卡住喉嚨會好危險。
多d陪佢，比支持佢，最重要唔好比佢覺得佢係屋企負擔，係你地既包袱。要比佢知道你地係唔會放棄佢，多d攬佢，比d溫暖佢。佢個心其實好驚，但又怕比你地知，可以幫佢搵d精神寄托，例如聽下歌，可以令佢平靜d。
最後我想講唔好成日以為仲有大把時間，我依家先明咩係子欲養而親不在，好後悔以前冇多d陪佢
加油啊!
