各位睇完標題入咗嚟嘅香港人，其實你哋已經啱啱睇咗一個香港嘅meme：
「我係XXX，我有嘢想講」
Meme其實係咩嚟？係咪就咁搵幅圖加啲字就係meme？唔係。
Meme係思想病毒：一個有既定格式，好似病毒咁好簡單，又可以輕易變種，極速散播嘅idea。
呢個idea可以係一幅圖加幾隻字（呢鍾meme叫image macro），可以係就咁一個人或者角色嘅表情截圖（呢鍾叫reaction picture），可以係一個四格漫畫（例子：loss），甚至可以係一句句子（例子：”Despite being only 13% of the population, …”）。
==============================
香港人係咪唔識玩meme呢？其實唔係，只不過係香港人普遍流於文字嘅meme，而且變種速度通常唔及其它所謂玩開meme嘅人咁快。但係其實2019年由反送中開始嘅抗爭已經證明咗香港人玩meme其實可以變種得好快。
例子1：連儂牆。有人有一個文宣嘅idea：喺啲公衆場合當眼嘅地方貼post-it，聚集民衆對抗爭嘅心聲。唔使幾耐，變種咗以下嘅嘢出嚟：各區都有連儂，有啲成個燧道都係連儂，有啲玩專業大poster，有啲玩post-it mosaic，有啲玩天花，有啲玩地板，有啲玩起底，仲有好多好多變化。
呢個已經係一個meme，一個非常成功嘅meme，因爲佢令到背後個idea擴展到成個香港，甚至衝出香港。
例子2：滅火隊。有人有一個實戰嘅idea：要儘量解決teargas呢個問題。唔使幾耐，又係變種咗幾廿種出嚟：有人用鹽，有人用泥，有人用樽裝蒸餾水，有人用保溫水樽，有人用焗爐手套，有人用網球拍，有人用蒸魚碟，有人用飲水機嘅水桶，仲有好多好多變化。有人甚至演變咗成team人出嚟。
呢個亦都已經係一個meme，一個非常成功嘅meme，因爲佢令到背後個idea擴展到成個香港，甚至衝出香港。
==========================
咁其實香港人文宣有咩問題呢？係咪「唔識玩meme」呢？
用一句meme答你：
Well, yes, but actually no.
香港人文宣而家個問題其實同整個抗爭嘅問題都一樣：
個「進化」同「變種」速度好似kick住咗。
原因？我個人認爲：現實情況係負面，而香港人亦都普遍唔識得正當應對敵方發動嘅負面心理戰。
簡單咁講：係咪叫你去太子站慶祝生日？唔係。（我記得當日咁做嘅香港人已經道咗歉，唔好意思，搵你嚟做例子。）
但係當「中共網絡輿論引導專員」（人稱「三毛」）出盡全力喺Facebook係Youtube喺連登喺Twitter甚至喺現實世界亂噏廿四，亂comment嘅時候，你又傻傻哋咁同佢拗一大餐，幫佢個comment推「互動率」，咁又何必呢？
泰國網民 #nnevvy 嘅例子證明咗一樣嘢：面對中共網軍，你其實係要troll佢哋。
永遠記住呢個objective：用極少精力令到敵方浪費最多字數+時間回覆你，如果做到，你就已經贏咗呢隻三毛。可以去搵第二個上吊。
=============================
咁如果你好想學吓泰國網民，甚至歐美網民嗰啲meme嘅玩法，應該點做呢？
我只可以講兩樣嘢：
1. 唔好用嗰啲咩meme generator就咁key一啲你而家諗住文宣想講嘅嘢落去。你咁樣做只會產生一個cringe meme或甚至更差嘅forced meme出嚟。
2. 想學整meme，唯有靠喺meme culture裏面浸淫。呢讓嘢冇得就咁話學，（你可以試下上Know Your Meme理解一下，但係佢而家嗰啲條目好多都寫得好normie，完全失去咗個meme嘅神髓），想親身理解嘅，唯有上多啲meme culture最蓬勃嘅地方：4chan。Twitter同Reddit都係二手meme culture，唔係唔得，但係4chan真係個河源。至於Facebook嗰啲咩meme page，算啦，好多都係cringe，好多都係forced meme。
最後：多啲用Gimp/Photoshop/MS Paint啦，好易㗎咋。
