https://lihkg.com/thread/1918303/page/1
承接上post，喺專制/放任呢條軸上面，好嘅語言應該可以搵到optimum，好似英文咁，既可以由放任嘅網絡語言、俗語、土語吸收養分，又能夠提升為規範語言，再用專制嘅教育機構、水平測試去推廣，直至呢個字老化，被下個新字取代，完成語言嘅生老病死，構成自給自足嘅演化機制。
目前中文/漢語已偏離咗optimum，走向過於專制嗰邊，令創造力枯竭，變成「絕育語」。
中文世界解決呢個困境嘅方法，係將更多人納入中文世界，用龐大人數去增加創造力。但為達到呢個目的，又必須運用更專制嘅手段去推行「標準中文」，於是陷入不斷惡化嘅死循環。
我講多個概念，叫「半華文地帶」，即係一啲地方唔係講標準漢語，但又用漢字，好似日本、台灣、香港咁。呢啲地方嘅造詞能力強過標準漢語好多，新詞就係透過漢字紐帶輸入去漢語。我夠膽講，所謂嘅「蝗語」，除咗一啲官僚語言，其實大多數唔係源自中國，而係來自半華文地帶，不過喺人口龐大嘅中國發揚光大。
上面就係由語言文化角度，分析中文/標準漢語帝國主義同英語帝國主義嘅分別。由呢個側面，你亦可以睇出中文世界，語言、文化、政治點樣互為影響。
———————————
跟住我會再詳細講下咩叫「半華文地帶」。
由於中文世界使用方塊字，佢造詞能力特別弱。
雖然中文/漢語喺中國嘅人口龐大，但絕大多數新字詞，係來自台灣、日本或其他方言區。我叫呢啲地方做「半華文地帶」。呢啲地方都係
1. 語言環境比較放任
2. 有漢語以外嘅語言傳統
3. 能夠涵接中文方塊字
半華文地帶造詞能力強，能夠將新字詞輸出畀絕育語。一啲所謂中國流行嘅用潮語，好似小鮮肉、佛系、小三咁，追溯源頭，其實好多都嚟自半華文地帶。
但上面嗰幾個條件，本身係自相矛盾。因為一個放任嘅地方，不可能壓抑其他語言，一旦語言活躍，就會脫離標準中文，最後失去涵接中文嘅能力。
於是乎，半華文地帶嘅狀態極不穩定，佢哋會朝是但一個方向發展
1. 專制手段強化標準中文，外語/方言萎縮，創造力下降，完成「語言閹割」，或
2. 放任環境下，社會逐漸脫離標準中文/漢字，創造力升，但不再涵接中文世界
歷史上出現過嘅半華文地帶，其中中國大片「方言」區（實情係外語）走向1，被「語言閹割」。
台灣來回搖擺，但向2機會大啲。
香港民間走向2，政府走向1。
日本走向2。
越南、韓國以反向專制手段，極速走向2。
日本喺上世紀初，仍然有較強嘅漢字傳統，為中文世界輸入唔少新字詞。好似經驗、注意、經濟、癌、人民、共和國咁。
依家日本嘅新詞，大部分已經脫離漢字，不能涵接中文世界。但一啲用漢字造嘅新詞，仍然有傳入中文世界，例如宅男、干物女、萌。
絕育語不得不依賴半華文地帶嘅創造力，又不得不推「語言閹割」嚟維持絕育語嘅通行同統一。呢個就係中文世界不斷對外擴張嘅最大原因。
講咗好多宏觀嘢，下個post會用呢啲概念嚟睇粵語。
學到嘢