接住上post，我會講多啲專制同放任政策點影響我哋嘅語言。
互聯網就係個相對放任嘅環境
1. (通常)官僚唔會管制網上語言，唔似學校咁會有評分準則去引導你符合某種標準。
2. 網上匿名令社會階級消失，回歸到近似原始部落狀態。
3. 流通量大，覆蓋面廣，令語言快速演化
因為咁，互聯網成為語言演化嘅競技場。由此出嚟嘅產物，會漸漸上升去規範語言之中。
我上post提到，中文教育係專制過英文教育一啲，呢點就可以喺「通俗上升到規範」嘅過程中睇得出。英文字典每年都會收納一啲新字，好似brexit呀long time no see呀咁。呢個就係英語世界創造新字，再加以規範嘅機制。而呢個機制，中文世界係弱好多，原因就在於方塊字嘅封閉性質。
例如Hea，如果係英文世界，一個咁廣泛流傳嘅字，相信一早入咗牛津字典。然後可能演化出healy，heaer，heable，heation，heationize，heationization。 語言嘅生生不息就係咁嚟。但喺中文世界，連個字點寫都冇共識。
好，講返正題。公共中文教育係文字嘅計劃經濟，而互聯網就係自由市場。互聯網嘅放任性質，令佢可以成為粵語入文嘅試煉場，任由各種古字、正字、拼音文、火星文喺呢度自由競爭，再從中提煉出規範粵文。
呢種透過自由競爭達成文字改革，並唔係我發明。日本喺一百年前已經行緊呢條路。而上世紀發明嘅中文教育，點樣毒害幾代人? 我下個post會再講。
