瑜珈lin
2020-03-27 09:00:32
話說之前同一大班同學食完飯後各自分道揚鑣,剩低我同另一個完全唔熟嘅同學一齊撘地鐵。
我哋一開頭傾下學校啲老師、學業上嘅問題等,但係傾傾下就傾曬所有學校嘅嘢。我哋兩個企咗喺度dead air咗一分鐘,為咗暫止呢段尷尬嘅死寂,我哋開咗一個更加尷尬嘅話題。
(btw我哋撘緊藍線列車)
佢:你去邊個站?
我:我去堅尼地城站呀,你呢?
佢:我去灣仔站。
我:咦,我成日去灣仔站喎。
佢:係咩,你去嗰度做咩?
我:補習囉。
佢:哦~我平時去開天后站補習㗎。
我:我反而冇乜去天后站⋯⋯
佢:唔緊要啦,我都冇去好多站。
我:例如呢?
佢:例如香港大學站、西營盤站呀⋯⋯
我:我都冇去過西營盤站,好似聽人講幾靚。
佢:係咩?
我:係呀。
(死寂二十秒)
佢:你有冇去過金鐘站?
我:梗係有啦,好似聽講宜家喺金鐘站開咗南港島綫。
佢:我知呀,我想去下海洋公園站。
我:我都想。
佢:話說你有冇去杏花村站嗰頭?
我:好似冇乜。
佢:我都冇去過。
(死寂三十秒)
我:咁上環站呢?
佢:上環站咩?
我:我話你有冇去過上環站。
佢:有呀,嗰度好舊㗎嘛,唔知邊度會同上環站一樣咁舊呢?
我:唔知喎,炮台山站?銅鑼灣站?
佢:銅鑼灣站好多人㗎。
我:係呀,不過中環站、北角站都多人。
佢:因為好多人要去嗰度轉車,但係我唔明點解啲人唔去鰂魚涌站轉。
我:因為好似要行好遠。
佢:係咩?
我:係呀。
(死寂二十秒)
我:好似聽人講你成日去太古站嗰度,係咪真㗎?
佢:你又知嘅?
我:我聽人講呀嘛,咁你去嗰度做咩。
佢:返屋企囉,我屋企嗰頭。
我:原來係咁⋯⋯咁咪好方便囉,撘幾個站就可以去到柴灣站。
佢:方便咩?
我:方便呀。
(死寂三十秒)
佢:你去唔去筲箕灣站、西灣河站、杏花邨站嗰頭㗎?
就係咁,呢個係我最尷嘅conversation,分分鐘辛苦過DSE嘅口語溝通。所以從此以後,我哋冇再傾計。
利申非鐵膠