護膚問題，你問我答(2)

之前都有介紹過簡單嘅護膚知識同答咗唔同巴打絲打嘅問題，因為個post已經1001咗 #sosad#所以依家再開post，歡迎大家繼續問
下面先整理咗啲比較多人問嘅問題

之前個post係https://lihkg.com/thread/1049194/page/1

1. 皮膚分類篇
問：點分自己係油/乾/中/混合/敏感性肌膚？
答：
油性肌膚：全臉毛孔較大，油脂分泌旺盛；可使用控油補水產品、一星期一次去角質；
乾性肌膚：全臉毛孔較小，兩頰及額頭容易有乾紋。
中性肌膚：全臉毛孔較小，水油平衡，皮膚較細緻；
以上兩種不同皮膚可以按季節不同適當轉變護膚品，如春季提高皮膚免疫力、夏季補水、秋冬季補水之餘仲要補油，兩至三星期一至兩次去角質
出現內乾外油情況：通常應該係中、乾性肌膚機會較多。
因為皮膚過分缺水而導致大量分泌油脂，所以要因應季節適當轉換護膚品。
例如：秋冬季補水補油，夏季補水。3、4月分香港天氣比較潮濕，所以皮膚會容易出現敏感症狀，所以呢段時間亦要日頭補水、夜晚補水補油同提高皮膚免疫力
混油性肌膚：T字部位較油及毛孔粗大、兩邊面頰為中性。
混乾性肌膚：T字部位較油及毛孔粗大、兩邊面頰較乾有細紋；
敏感性肌膚：兩邊面頰容易泛紅、瘙癢、甩皮同伴有刺痛感，額頭通常伴有暗瘡粉刺

問：混合性皮膚使唔使特別處理？
答：
混合性肌膚要分開嚟做清潔，至可以全面照顧到皮膚需要，如果只用一種產品做全面，針對性會較少，因為t字部位係需要控油，兩邊面頰如果係乾性，係需要平順肌膚紋理
混油性肌膚：T字部位較油及毛孔粗大、兩邊面頰為中性，係需要溫和去角質，
混乾性肌膚：T字部位較油及毛孔粗大、兩邊面頰較乾有細紋；T字部位要控油、定期做角質清潔，兩邊面頰要補水，角質清潔時，最好避一避開面頰位置，因為乾性肌膚唔需要過度去角質，所以需要針對性處理


2. 暗瘡篇
問：點解會生暗瘡同點去印？
答：都係老生常談嘅原因，基本上你係香港人都會有呢啲問題
壓力、情緒﹑長期捱夜令內分泌失調同水油不平衡，食得多辛辣油膩嘅食物。另外一個較少人知嘅就係用錯護膚品，例如用咗啲厚重質感嘅護膚品

問：點去暗瘡印？
答：暗瘡去印嘅週期同自己嘅新陳代謝有關係，所以如果用護膚品要用盡量用提高新陳代謝同促進血液循環產品。

問：戒牛等食物係咪真係對暗瘡有幫助？
答：當然有，暗瘡肌膚喺暗瘡嚴重期間對於豬肝、蟹、帶魚、牛羊肉一定要忌食。
特別是暗瘡就好嘅階段，一食蝦蟹就會立刻發炎變得嚴重。食用糖、朱古力等高糖類食品，會使機體新陳代謝旺盛，皮脂腺分泌增加，從而使暗瘡連續不斷地反復出現。食用辛辣食物後容易上火，暗瘡者大多屬內熱，無疑是火上加油，有暗瘡者要注意

問：點解成日KEEP住同一邊面生暗瘡？點處理好？
答：從中醫角度睇，左面：面部循環唔好，要做面部淋巴。
右面：肺火旺，最好攝取多d白色食物、例如杏仁、雪耳等較潤肺食材。

問：點樣可以去面部凹凸洞？
答：如果面部凹凸洞比較時間長同大面積，建議做醫學美容刺激真皮層會有效啲，做完之後仲要勤做修復同補水，亦一定要keep住用防曬

問：面部大量出油，係咪代表我係油性皮膚？用其他油做護膚品可以嗎？
答：面部大量出油，或有好多暗瘡都會認為自己就係油性，但其實有可能皮膚係其他膚質，例如大量缺水引致大量出油，從而油脂分泌過盛出大量暗瘡。當然如果您經常大量出油脂就要用一啲控油產品，而唔係用油來代替

問：有無需要定期去角質？
答：有，定期做角質清潔，等角質代謝正常，咁護膚品就容易吸收；如果無做開，就算用幾多護膚品，皮膚都食唔到，反而會令毛孔堵塞㗎


3. 面油篇
問：點解成日出面油？
答：
1. 皮膚水油不平衡：皮膚缺水，皮脂腺就會分泌油脂保持表皮滋潤，水油失衡就會引致臉泛油光
2. 環境溫度較高：皮膚溫度每升1度，油脂分泌就會增加約10%，環境溫度高，皮膚散唔到熱，就會產生大量面油
3. 荷爾蒙失調：工作壓力、不規律的作息、長時間缺乏睡眠，都是現代女性常出現的問題，往往人導致荷爾蒙錯亂，雄性激素分泌過多。而雄性激素的分泌量與皮膚的油脂分泌量往往成正比
4、飲食過於油膩：飲食攝入過多油脂，正常內部代謝過程消耗唔到呢啲油脂，就會通過皮脂分泌將脂肪排出體外
5. 天生油性肌膚：呢點解釋唔到，天生係咁


4. 黑眼圈篇
問：黑眼圈成因同解決方法？
答：長期熬夜、飲過多酒或咖啡﹑過敏性鼻炎，醫學上仲會分為結構型黑眼圈、血管型黑眼圈和色素型黑眼圈。改善黑眼圈係一個漫長過程，除咗勤做眼部護理之外，仲要保持良好作息，做好眼部防曬都係另一個預防方法

5. 毛孔篇
問：點樣可以收毛孔？
答：毛孔問題最大原因係水分不足，如果本身皮膚已經水油不平衡同經常熬夜，只會加劇毛孔變大。隨着年齡增長，亦會令膠原蛋白快速流失，引致肌膚鬆弛，只要皮膚水分飽滿，令細胞壁充盈，咁外觀上毛孔睇起身自然會細緻。
簡單嚟講就係做啲深層補水療程，及因應季節天氣轉換合適嘅護膚品，如油性肌膚：控油補水；乾性、中性：夏天補水、冬天補水補油



問：下巴個啲好似雞皮嘅係咩嚟？
答：呢個係每個人都有嘅皮膚結構，如果夾硬去擠，搞到整傷皮膚會留疤仲麻煩

問：Aqua Peel 有咩用？
答：Aqua peel通常用嚟沖洗毛孔內壁油脂，真空吸力順帶吸走黑頭，不過每間美容中心做法唔一樣，而Aqua peel部機入面裝嘅溶液亦會唔一樣

問：法令紋可以點解決？
答：法令紋問題，做機即係刺激膠原蛋白生長或通過啲可以提拉皮膚嘅儀器，雖然效果可以即時見到，但都要經常做。您亦可以透過耳穴去改善法令紋，只係時間會長小小，如果想即時見到效果，可以經耳穴嘅耳尖穴位穿刺，效果可以即時見到

問：通淋巴有邊幾種？
答：淋巴排毒有分面部淋巴同肩頸淋巴，睇皮膚狀況而定做邊種。
如果腮邊有暗瘡，會做肩頸淋巴排毒
如皮膚膚色不均，會做面部及肩頸淋巴排毒

問：修復療程即係咩嚟？
答：修復係一個療程，要先將加快咗嘅新陳代謝出嚟嘅角質去除，再繼續補充同修復重組過嘅細胞。
做完療程內三日，需要做嘅係補充皮膚所需嘅成分，修復則係三日後至做嘅。
如果皮膚要美白，當然可以係做完三日內用美白成分嘅產品，會比平時吸收得更好

問：其實咩係海藻矽針？
答：海藻矽針其實對皮膚治療係好好嘅產品，只係您要搞清楚佢嘅概念、成分及做法。
有唔少美容中心都係為做而做，無分清客人嘅膚質狀況就亂咁做，最嚴重係敏感肌都照做，導致市面上有好多負評。
其實海藻矽針屬於激活類產品，而佢亦只係作為媒介打開毛孔，可以令皮膚需要嘅成分直達基底層，可以刺激細胞重組及促進膠原蛋白自我生成，並唔係直接可以令膠原蛋白再生，而後續補充同修復比海藻矽針本身更重要
如果做完海藻矽針，美容師叫您返去唔需要洗面、搽嘢等後續補充嘅話，就要考慮下做唔做喇

1. 面膜
問：皮膚好乾，用完Mask但幫助不大，有咩好建議？
答：主要係皮膚乾燥鎖唔住水份，皮膚缺少油分。植物油裡面含有大量不飽和脂肪酸，不飽和脂肪酸可以幫助皮膚產生神經醯胺，從而令皮膚有韌性，有彈力，恢復皮膚屏障，所以皮膚不僅要補水，仲要補油
如果你角質清潔得唔夠，就算用再多Mask去補水，都係徒勞無功，所以定期去角質，對後續護膚嘅吸收有好大幫助。

問：幾耐敷一次Mask最好？
答：有好多面膜聲稱可以日日敷，但大家都要根據自己膚質狀況同面膜功能而定。
一般補濕面膜對於乾性肌膚係可以每日敷；油性肌膚可以1星期3次左右；但敏感肌使用次數方面就要謹慎啲
一般美白面膜唔可以過於頻密地使用，1星期最多用1至2次其實已經足夠；敏感肌就唔可以使用美白同帶有刺激性嘅面膜
一般清潔面膜1星期1次其實已經夠，因為作用是清潔角質，而角質係唔可以過度清潔，敏感肌喺角質清潔上面更加要小心


問：面膜有咩唔同嘅類別？分別有咩作用？
答：面膜主要可以分為Paper Mask、水洗嘅Gel mask同泥膜。
Paper Mask有補充作用，主要都係補充水分功效比較多
Gel mask多數會有修復鎮定功能
泥膜就多數具有潔淨能力，所以大多數吸油脂、深層清潔都會用到泥膜

問：面膜大約要幾耐用一次？
答：Paper mask：每星期2至3次
Gel mask：每星期2至3次
清潔泥膜：
中、乾性肌膚：一星期1次
油性肌膚：一星期1至2次
敏感性肌膚：要視乎情況而定，小心使用

問：其實敷完MASK使唔使再洗面？
答：要睇返面膜嘅成分同說明，無話特定要洗或唔洗。
另外面膜敷完唔黐，成分應該比較好，但如果敷完仲有黐笠笠感覺，多數係面膜入面嘅增稠劑比較多，對皮膚吸收無咁好，所以皮膚亦吸收唔到幾多

2. 面霜
Q: 面霜同面膜有咩分別？
A: 面霜同面膜係兩種唔同性質嘅護膚品，面霜通常係護膚最後一步，功效係鎖住前面吸收咗嘅護膚品營養及水分；而面膜只係補充作用，如果敷完面膜後冇及時使用面霜，將營養及水分鎖住，效果只會事倍功半

《EGF》
Q: 咩係EGF?
A: EGF又名表皮生長因子，可以促進表皮細胞組織內多種細胞嘅生長分裂，令表皮細胞變得飽滿、恢復年輕狀態，亦可以促進膠原蛋白嘅生長能力，修復老化斷裂嘅膠原彈性纖維，被科學界譽為「美麗因子」。

最初嘅EGF主要運用喺醫學領域上，用嚟促進受損表皮嘅修復同再生，例如治療燒傷、燙傷等。隨住時代進步，EGD而家已經應用喺醫學級別嘅護膚品中，例如爽膚水、面霜、面膜等

EGF可以促進人體皮膚快速更新，年齡越細，肌膚越好，越白皙嬌嫩。年齡越小，肌膚中EGF含量越高，但25歲之後，EGF嘅含量開始逐步下降，肌膚更新速度就會減慢，肌膚就老化、粗糙、沉澱色斑，所以唔少人都會使用EGF產品促進人體皮膚更新

3. 原液
問：咩係原液？
答：原液其實就係濃縮版嘅精華液，所含有嘅營養成份比一般化妝水、精華液、乳液或面霜等高好多，功效維持嘅時間更長。由於分子小，所以吸收更快速，可以立即比肌膚吸收， 適合急救皮膚使用，但就唔建議長時間使用

問：幾時應該用原液？
答：通常係塗抹化妝水後使用，原液原理係將高度濃縮液瞬間補充養分改善肌膚現狀

4. 安瓶精華液
問：咩係安瓶精華液咩黎？
答：安瓶精華液係無添加化學增稠劑嘅液體狀精華，用法同普通精華無任何分別，只係分子較普通精華液細小，皮膚相對容易吸收，同時亦適合每日嘅日常護理時使用

5. 防曬
問：防曬有咩用？
答：防曬護理係肌膚第一道嘅防線，可以抵禦日常生活中因為暴曬而引起嘅肌膚傷害，有效持久阻隔紫外線同污染微粒，亦可以預防肌膚提早老化

同時，防曬成分主要分成兩大類，分別係「化學性」同「物理性」：
「化學性」係吸收紫外線，再透過能階轉換轉化成熱能，減少紫外線對肌膚的傷害。
「物理性」就係透過粉末進行物理性反射同折射功能，阻擋紫外線。
防曬最終目的係為咗防禦連雲層都無法阻擋嘅紫外線，包含 UVA 同 UVB 呢兩種波長光線。
UVA 波長較長，穿透力也比較高，容易導致曬黑及肌膚老化而產生皺紋，
UVB 波長較短，卻因能量強容易造成曬傷，甚至慢性累積而形成皮膚病變。
有人會覺得戶外運動先需要搽防曬防止曬傷，其實喺室內工作，包括長期對電腦嘅人，反而更需要搽上可以阻擋UVA嘅防曬霜。
所以，選擇可以同時防護 UVA 同 UVB 嘅防曬產品就非常重要

6. 純露
問：咩係純露？有咩用？
答：純露係天然草本植物加熱，進入純蒸餾嘅過程蒸餾出來嘅精華液，可以比喻為西方嘅中藥，又稱草本療法，內服同外用都有效

按照唔同人嘅肌膚狀況﹑ 壓力﹑生活環境，搵出皮膚問題癥結後，都可以配合合適嘅純露解決問題。既可以當日常爽膚水使用，亦可以每日用面膜紙濕敷。配合多種純露輔助同儀器，喺皮膚護理上可以帶嚟相當可觀嘅功效

問：有邊種純露可以提高新陳代謝、促循環？
答：含有積雪草、玫瑰、永久花、薰衣草等天然成分嘅產品，都有提高新陳代謝、促循環效果。

7. 精油
問：咩係精油？
答：精油係天然草本植物加熱進入純蒸餾過程後，喺無添加情況下蒸餾出嚟嘅有機植物油

問：有咩類別同功效？
答：精油種類眾多，單係喺人體應用嘅芬芳療法可以使用嘅就有幾十種，使用時需要因應自己身心嘅實際狀態、需求，作出適當選擇

精油可以幫到大家：
用作情緒管理 - 選用薰香、噴霧或直接吸嗅嘅方式。
用作日常按摩油之用 - 以藉由精油按摩以滋潤肌膚同提昇肌膚彈性。
用作日常護膚/護理過程 - 可以將純露和精油勻和當爽膚水用，亦可以加入面霜中使用，令肌膚鎖水力更強效。
只要搵出皮膚嘅特性同需要，精油喺唔同嘅護膚層面都有好強嘅功效，保持身心健康平衡，提高生活品質。
例如，生理期唔好，更加以用精油嚟改善，例如大馬士革玫瑰精油或玫瑰天竺葵精油，每日喺腹部按摩，可以調節女性雌性荷爾蒙

問：精油會唔會堵塞毛孔？
答：其實精油係唔會堵塞毛孔㗎，因為精油嘅結構分子同皮膚皮脂好似，所以對皮膚只有好處。當然，亦要按季節用，同埋亦要用好啲嘅Aroma 精油

《慎入》

如果你從來都未做過深層清潔，又唔重視面部嘅護理，咁係不久嘅將來你有機會收集到一堆嘢

皮膚乾=補濕/水
皮膚油=水油不平衡,皮膚缺水，皮脂腺就會分泌油脂保持表皮滋潤，水油失衡就會引致臉泛油光

咁係咪即係2種情況都係缺水
分別係乾就要補水 油就要控油再補水/濕

正常任何肌膚缺水都會容易產生唔同問題，
而最普遍係皮膚容易覺得有乾嘅感覺，
角質層缺水會自動分泌油脂嚟形成皮脂膜保護返皮膚，
但油脂分泌過量，就會堵塞毛孔，形成油脂粒、粉刺，
接觸空氣更加會氧化成為黑頭，繼而滋生痤瘡桿菌，
如是者就會發炎形成暗瘡
并唔係話所有皮膚乾就要補水，
亦要分皮膚會唔會乾到已經變敏感，
一但角質層薄弱鎖唔到水分，係呢個時候除咗要補水亦要補油，通俗咁講即係用人工皮脂膜嚟令皮膚可以鎖住水分。
另一種情況係皮膚水油失衡，
缺水而引致大量出油，亦需要補水令水油平衡返，
咁出油狀況就會改善
補充小小，角質層厚薄對皮膚嚟講極度重要，
過薄鎖水能力會減弱；過厚又會影響吸收

有冇補水skincare介紹
純露同科研類toner如sk2
係咪科研類好啲

所以兩種情況都要補水(toner)兼補油(cream)
分別在於油肌部分就要做多層去角質既功夫
同埋視乎護膚品既乾爽程度
利申:混油肌

唔知有冇理解錯
之前睇片話皮膚乾係缺水
油水唔平衡既部分又係缺水
以為成塊面都係缺水
搞到唔知幾時先應該補油

夏天有啲油，早排轉天氣腮骨同蘋果肌直情有飛皮，面頰摸落都乾
近鼻兩邊面毛較為粗大 額頭有乾紋
感覺用咩skincare都唔多吸收
有無咩skincare推薦

正常任何肌膚都需要Toner+Cream，
而敏感皮膚或屏障受損嚴重肌膚單純用Cream亦唔夠，
要額外補充油分，皮膚先至稍為鎖到水
呢度所講嘅油分係精油類，
針對性功效修復屏障對敏感或屏障受損肌膚可以加強防護，慢慢回復正常肌膚狀態

嚴格嚟講，任何肌膚補水亦唔會有大問題，
只係要分清自己嘅皮膚類型及不同季節氣候用嘅護膚品要稍為調整，
當然前提定期做好角質清潔而唔係過度去角質
敏感肌皮膚要慎用去角質產品，
因為多數敏感皮膚都係過度去角質、過度做磨砂及頻繁使用果酸而形成
其實有正常護膚程序、有規律作息及飲食，適量運動咁肌膚應該唔會有大問題

估計你應該係乾性肌膚或混乾性肌膚，
唔知你呢段時間面部會唔會容易泛紅及痕癢，
建議你可以係Cream入面加入精油嚟改善，
同埋按你現時皮膚狀況可以轉用具防敏及修復成分嘅產品嚟提高皮膚免疫力
另外如果有用開強鹼性嘅清潔用品最好停一停，用返溫和性質嘅會對角質層好啲

純露結構比較簡單，係單一分子，
用蒸餾方法從天然植物中萃取出來，
係最容易吸收到皮膚細胞間隙，用嚟補水會比較明顯
而科研類Toner通常入面除咗水之外仲有其他物質等，
分子相對較大，滲透能力會有所保留
而你所講嘅Sk2,唔知你係咪講緊神仙水，
本身神仙水係屬於精華類別，
佢入面成分有剝落角質作用，
敏感肌同乾性肌膚最好慎用，
但比較適合油性或混合肌膚使用

如果係下巴（接近頸部）生左粒濃瘡
粒瘡唔止石頭瘡
真係好大粒 又唔係幾之到出黎
除左睇中醫
可以點做

樓主我想問下我T字位一到下午就會出油但摸落去就唔係好多
2邊面就冇油乾乾地 咁我係未混合乾黎
同埋我而家用緊labo labo支零毛孔細緻精華水
但聽人講一星期用2-3次就好 呢個真唔真

額頭油到反光可以點算

樓主我有個朋友本身做護士，成日用消毒藥水個啲洗手洗到隻手又乾又有少少龜裂，有無咩好護膚品推介？

你呢個狀況其實係淋巴堵塞而引致嘅石頭瘡或膿瘡，
建議疏通肩頸及膀胱經淋巴，
咁淋巴液暢通咗，血液入面嘅毒素就唔會堆積
同時刺激基底層消除炎症，代謝加快咗，亦會明顯改善。當然暗瘡問題並唔係一兩日形成，
所以好返都要一段時間

估計你應該係乾性或混乾性，
因為要睇你T字部位嘅毛孔同兩邊面係咪差唔多大
如果差唔多大其實係乾性皮，
同埋每個人每日去到中午或下午時間都會出油，
而出油亦係正常，只要唔好分泌過量就ok
另外你所講嘅嗰支精華水入面含有去角質成分，
假設你係乾性皮膚可以一星期用1～2次作為角質代謝，
如果係混乾性，咁T字部位可以每日用都ok

因為唔知你嘅皮膚類型，
所以亦估計唔到係咩問題引致
但係通常出油唔會單係額頭至出，
正常皮膚出油會係T字部位，
而出油原因一係乾到水油失衡引致分泌油脂
另一原因有可能本身係油性肌膚，咁油脂分泌會旺盛啲；
最後亦有好多人嘅主觀感受就係覺得唔會出油先係正常，其實係錯㗎，
正常皮膚每日都會分泌油脂嚟形成皮脂膜保護返皮膚免受外界入侵物，
只係出油多少問題

同埋我鼻翼位朝朝起身都見到白色粒粒係個毛孔到 而且鼻翼發紅
清完過幾日又有 呢個係情況係未要黎個深層清潔
呢個情況都有10年了
利申:男黎

護士對手長期重覆用消毒藥水係會特別容易乾同龜裂，
建議可以每晚浸熱水令手部軟化，
再厚敷凡士林、甘油或質感厚重嘅hand cream用保鮮紙包住嚟當做Hand mask，
堅持一段時間應該會有改善
又或者經常帶備hand cream係身，一有時間就搽，
咁起碼冇咁乾先，因為我自己都係咁做，
同埋我哋呢行都經常要用消毒液，
只係我哋有自己公司研發嘅保濕消毒液，
相對冇更傷