我希望大家可以強化以下兩個行動方向，幫手突破瓶頸：
1. 從「雙普選」訴求推動「港民治港高度自治」的 VISION
我問過唔少參與程度不同的人，大部分都偏悲觀，亦唔敢想像香港狀況可以點落幕。有想像既，又未必敢講太多。有好多一般人對政治欠缺理解，想像唔到，就唯有諗香港「返翻去六月之前咁已經好好」。
五大訴求當然缺一不可，但大家心水清都知道家下係成個政府(+警隊+MTR+好多嘢)壞咗，真正要重建香港，最根本問題就係香港受中共勢力大大大力入侵。
唯有確保香港自治先係唯一出路。
而又咁樣講，香港自治有好多種形態，港獨係其中一種，爭取基本法內的高度自治又係一種，而且完全合法合理。但唔理邊種，都要先有香港人自己當家作主既覺悟。
所以，依家開始應該大力對內文宣，重申「港民治港高度自治」既重要性，推動全民政治覺醒，開始想像「自己香港自己管理」既願景，就會開始明白唔係要返去六月之前，等有賢人出現做特首做高官香港就會好，而係要行出舒適圈，明白每個人都有責任去搞清楚香港社會發生咩事同點樣參與。
所以我專登將「港人治港」改做「港民治港」。林鄭同班高官都叫自己做港人架，大家以為政事留畀佢哋做，自己唔駛理，咪賴晒嘢囉。
推到群眾有共識，5大訴求係mile stones，成個運動係向住「香港自治」既VISION去走，就可以減輕無力感。重點係呢樣嘢基本法一早講好要有既，再大聲公開講都唔怕。
要有足夠多既人有呢個意識，先會推得郁人民議會、影子議會呢啲迫切需要成立既嘢......
2. 政治普及教育
我最近同一啲淺黃甚至中黃傾過，大家係連登圍爐根本忽略咗佢哋呢班唔會上兩登甚至FB既人，其實佢哋數目好多。
好多人係出於基本良心同常識知道中共好仆街信唔過，所以堅定唔會藍。但問清楚，好多人都一樣係事件爆發咗先「忽然政治」。平日為口奔馳，唔好講國際，對香港政治政局都係無乜認識。大量師奶阿叔父母輩甚至後生都係咁。
佢哋其實係抗爭資訊嚴重滯後，好迷惘同無力，我哋唔可以賴低佢哋唔理。
我講既唔係有乜集會同濫暴新聞，而係好多更基本既政治資訊。例如佢哋普遍唔知：
......
唔好怪佢哋懶或笑佢哋蠢，好多人真係唔知自己要知呢啲嘢，亦唔知點樣去知，呢三個月發展係太快。我哋需要一啲有心做文宣既人幫佢哋，做一啲容易理解既通識雞精
唔好睇少呢樣嘢，佢哋只係缺資訊，唔係蠢。講解完，佢哋會更清楚知道點解自己無支持錯黃，由徬徨到自救，會更願意去行多步。咁跟住就可以同佢解釋「港民治港 高度自治」。
至於點樣實踐，佢就會開始有自己既諗法，唔會再滯後等人帶，亦無咁易被帶風向。
我做咗一啲，拋磚引玉希望有人可以幫手做靚啲
