西樓月如鈎: 與藍絲的說話技巧 好文推廣 (有HIGHLIGHT 支援繁忙人閱覽)

西樓月如鈎
12 小時 ·
我知道唔少讀者嘅家人都係藍絲，喺溝通上非常痛苦，亦都唔知道可以點樣說服佢哋。我自己屋企，兩老本身都係藍色，家姐離地中產，變晒黃色。我可以分享下我點同家人講嘢，但我首先都要強調我嘅經驗一定唔係每一個人都啱用，因為呢樣嘢係真係因人而異。
說服係因人而異，我說服我阿媽同老豆係唔同，阿媽係情緒化啲，今日就講我點同老豆傾計。

喺講任何嘢前，我要講說服嘅先要條件係心平氣和，起晒鋼係無人會理性溝通到。

老豆係嗰啲覺得自己有腦，有Point嘅人。

點解我咁強調說服係因人而異，因為我對我老豆做法就係一招：

〈搵盲點＋切身處地〉

你要搵佢嘅盲點出嚟，盲點就係佢唔理解／唔支持運動嘅原因。我老豆唔支持運動、日日鬧嘅原因就係佢好憎示威者搞到人返唔到工。表面原因係咁，最核心原因係：佢對人哋追求緊嘅民主無概念。

咁所以你要解釋究竟佢哋點解要咁樣做嘅時候，好多人都會選擇直接講：

「我哋而家係追求民主呀！可唔可以唔好咁自私，返少日工啫，香港就死！」

咁嘅回應係好弱，佢多數反駁你，追求民主大晒咩。基本上你可以話係入唔到佢哋腦，因為我老豆根本心中都無民主觀念，唔知點解你要搞到人，如果要解釋民主概念，除咗講一大篇盧梭嘅文之外，亦都可以選擇最簡單直接嘅方法：

〈由佢哋利益着手，引發佢哋思考自己利益受損同非民選政府（民主）嘅關係。〉

*有啲人有民族情懷，我老豆如是，我會避開呢樣

1. 而家唔係話歧視中國人，但香港政府政策點解唔係港人優先呢。點解醫院床位、大學學位讓晒中國人？點解佢地一落嚟，喺未對呢個社會有任何貢獻之前就可以拎綜緩、住公屋，拎返人哋啲資源？香港人就排足咁多年，而家唔係唔畀佢落嚟，但點解我哋收人門檻唔可以高啲？喺香港，香港人優先好正常啫。其他地方都要住夠咁多年先有福利啦。

（順勢加入我嘅論點：）

2.就係因為特首唔係民選，係中共選出嚟，所以政府根本唔使理香港人意見，特首唔需要係一為香港人謀福祉、為香港人發聲嘅特首。

（呢個時候我會插入個人例子，因為我知道老豆好討厭強積金，盡量幫佢切身處地去諗，搵一樣佢憎政府嘅嘢，將佢嘅利益緊扣民主呢個概念：）

3.點解政府可以強行推強積金，日日強姦香港打工仔嘅錢？明明咁多打工仔都唔鍾意，個個月拎走你啲錢，佢都可以照推呢個政策，因為呢個政府根本唔使理市民意見，你都無權選佢出嚟，佢點解要理你？

又或者我求其作一個例參考下：

點解十幾萬供我讀大學／咁多錢睇醫生？明明政府有咁多4,300億美元儲備，點解將啲錢投放喺教育／醫療上，等人人有免費書／更好醫療讀，咪唔使咁辛苦，反而拎1萬億去起島，因為佢只係為中國謀福利，唔使諗你香港人利益。無票無普選嘅不民主政府就係咁。

香港大把K型嘢任你發揮，例交通／住屋／教育，總之任你哋自由發揮吹水，扣到就得，因人而異。

（用仔嘅身份，講述自己苦況，動之以情）

4.唉，我夠想買樓搬出去住啦，結婚生仔（其實唔想），但啲樓貴到咁，都係因為個政府官商勾結，樓價GOGOG，我就NONONO，唔使理香港市民，唔係民選政府就係咁，無法子。

5.所以而家嘅人爭取雙普選，就係要將香港人嘅嘢拎返，港人優先，你可以爭取生果金多啲、唔使理強積金，你有票可以逼政府正視你嘅訴求！畀返多啲福利你，可以有更好政策，呢個就係點解示威要爭取普選。

另外，可有可無，我會提一提共產黨歷史（本來讀中國史出身），提醒返佢以前係點被人逼害，例如三反五返、土地改革、大躍進、六四死咗幾多人。

然後我老豆本來日日鬧示威，而家轉鬧政府。

最後我都要重申一次，說服係因人而異，「搵盲點同設身處地」係搵佢盲點，再將五大訴求同佢利益緊扣，例如反送中返中國好危險，務求令佢明白運動失敗佢係有損。
而呢種方法未必適合每個人，例如讀得好多書嘅藍絲，你可以可能要運用大量史實同數據去支持自己，或者你根本說服唔到佢。同時，未必每個人都理性溝通到，就係咁樣。拜～

以後唔駛對住老豆老母同事老闆 "我無嘢講"喇

(其實裡面好多POINT好有用 我HIGHLIGHT到上篇文紅哂好似無咩用咁)

另外 有盲撐警盲撐安寧都要諗個說法出嚟

本身放棄咗，唉，再接再厲啦

冇民主，咁樣即係你個群體中嘅領袖唔係你團體中嘅成員選出嚟，委任同罷免都唔洗經大眾同意

如果領袖冇犯錯當然冇問題，但係領袖犯錯，或者行為有偏差，咁樣冇方法阻止佢就好危險

中國一個咁大嘅群體，又有核武器，最上層嘅領袖唔係民選嘅，對地球文明係個嚴重嘅威脅

推

成日話人犯法

咁佢犯咩法你又知唔知，香港點樣先至真係叫罪犯你又知唔知

香港係行普通法，英美兩國-世上最發達嘅兩個經濟體都係行普通法，普通法刑事案件控方除咗要證明疑犯(係疑犯)有犯罪行為，仲要證明有犯罪意圖，仲要無合理疑點先可以定罪啊，嚴重嘅案件仲要有陪審員。搞咁多嘢都係為咗避免有冤獄出現。

維持香港法治同經濟繁榮就係靠哩樣嘢，唔係靠中國口講嘅所謂法治，毒奶粉受害家長原告變被告嘅法治，你信唔信？

LIKE推我呢個POST之餘 (食咗巴打人血饅頭)
記得入FB 俾LIKE 西樓巴

成日話搵食，搵食都要講可持續發展

中國啲黑心食物夠係搵食啦，你又唔食？
你而家個制度冇民主，你掛住搵食唔去改正佢，你同用黑心食品搵食冇分別，都係毒害下一代

你自己幾廿歲人食黑心食品對你影響可能有限，啲年輕人仲有大半世人，佢哋出嚟追求一個健康嘅未來絕對冇錯，直頭係所有正常嘅人應該要做嘅嘢。佢順便幫你爭取埋健康嘅未來、健康嘅退休環境，你可以唔支持，但絕對冇理由反對

唔差埋食埋我啲饅頭

推到呢個POST 多LIKE過西樓巴打自己D連載POST

#西樓月如鈎

推

我畀埋實際操作你

因為我自己本身讀政政所以我連盧俊，john rawls 都講埋，不過佢地無乜心機聽

推

推比多d人見到

連我都無心機聽啦

講真
香港人利字當頭 連林奠都識打經濟牌

咁你應該學以藍制藍個Post

推

推

我都成功咁樣令呀媽由中立變左做深黃，大家要努力呀！！

咁如果老母話：中國係咁架啦，你哋都唔肯面對現實，唔鐘意咪走囉移民囉，唔移民咪死咗佢囉，咁叻咁大犧牲，去自焚囉，做咩要搞亂香港，迫共產黨出手，我哋呢代人用咁多血汗建設香港，你班腦殘黃絲死廢青，淨係識掟磚破壞，成個香港爛晒啦，成班紅衛兵周圍批鬥唔認同你嘅人，警察打死你哋都啱啦，全部拉去遊街示衆打藤啦
點拆 請出招
我已經好攰但唔想放棄搵返老母嘅良知

如果你有屋企 仔女 將會結婚

我會答
所以香港生活唔到落去 (樓價經濟 將來仔女面對紅底同學) 會移民 香港改變唔到 香港人只有流落他鄉 將來你可能自己子孫都見唔到 好多香港人將會係咁

如果你未成家

我會答
我會出國留學去外國生活 唔返香港

切記: 唔好主動講唔養佢 政府養佢 CUT家用 咁樣係製造自己同屋企人矛盾 你可以講要去外國生活 由低做起 要生活費支持外地生活

另外
如果係傳統屋企
好多時阿爸阿媽附和

所以 分開講 會好過一次打兩個打佬
但如果真係要向難度挑戰

兩個議題可以發揮:
一係搵錢生活類問題見西樓巴打
二係大陸賣淫搵二奶問題 (老豆自然唔敢亂開聲)