繼丁利華、張善鵬後，我是進入西貢結界的第三人

真人真事?(我都唔知)，時間地點作出更改，避免有人專程走過去。

件事我係係腦海回憶出黎，所以用口語寫。

主角係一名山系毒撚，香港大小山頭都有我腳毛，難至狗牙嶺；易至太平山都行過，估唔到出事既係西貢既一次旅程。

果日我如常去西貢行山，由彩虹出發；天色灰暗帶點迷霧，令當日既氣氛更加怪異。當巴士行到清水灣道已經覺得氣氛有d古怪，事關星期日西貢條路一定好多車，但今日竟然暢通無阻，如入無人之境；加上霧氣充溢著係路面，令人感覺進入另一個世界。

直至巴士好順利去到西貢，我更加覺得成件事有種講唔出口既奇怪感覺，星期日既西貢竟然一d都唔熱鬧，無違例泊車，連人都好少；我當時諗d行山友去晒邊，但依舊有陣霧氣係路面，氣氛好詭異。當巴士埋到巴士總站，我見到碼頭終於有d人氣，而個廣場做緊一樣好奇怪既節目，有班人戴著灰色狐狸頭係度跳舞，而觀眾好專心咁睇。依家你叫我諗果個節目叫咩名，我點樣都記唔起。由於96R總站係黃石碼頭，所以我無係度落車睇就揚長而去。

而巴士係去到大網仔路果段，突然間多左好多獨立屋我之前未見過，果d獨立屋個風格好奇怪；好似唔係現今呢個時代咁樣，西式中式乜都有，無理由我個個星期出入西貢都見唔到架，但無理會佢，而且好快就到達我既目的地-上窰。

[black]本應係度落車既我，應該話我一路都留意著巴士個車站提示，但係去到上窰個提示就好似有d干擾直接跳左去下一站，架巴士好快就飛左個站，我下意識果下諗住坐到去黃石再算。去到黃石，我見到燒烤場有好多人係度燒野食，但係個個人都專心好整齊咁坐係度燒；一d表情都無。我望一望黃石個地圖覺得條路無乜野好睇，呢度個感覺又怪怪地，不如坐對頭車去上窰果邊仲好。

但今次呢架巴士又有d奇怪地方，首先個車長係印巴籍，唔係種族歧視，但好似未見過印巴籍車長。而個巴士地下濕漉漉，又有一陣腐臭味，由於我坐幾個站所以忍佢一陣就算。[/black]

咁架車好快就去到上窰，我今次終於順利落車，果陣都已經兩點幾，咁為左追番d時間咁我行得好快咁上萬宜水庫果邊。途中特別既係有一車車旅遊巴車d人去水庫果頭，但d乘客又係目無表情，好有秩序咁一個跟一個就行左入去水庫果邊，咁多人全程一粒聲都無，呢下先奇怪。

而我就係水庫口上左去大枕蓋，其間撞到一家四口又係好詭異，佢地係度食杯麵!可能我見識少，行山食杯麵都係第一次見，仲要一d香味都無，呀頭先黃石d人燒野食又係一d香味都無架。咁我有理無理都係直衝上山頂先算，去到半路望番落去，果家人行得好慢，慢得有d唔正常，好似地心吸力令佢負重得好緊要，明明無乜行李起身佢都可以龜速咁行。情況令我諗起有套戲主角去左第二個星球，因為引力唔同左，佢可以跳得好遠咁屈人地機，不過依家係調番轉。

直至上到山頂，上面依舊有港女進行網絡照騙、廢中大大聲講野、行山友跑過，我先呼口氣覺得依家先正常翻。以前放假成日可以平日行山，成個山頭一個人都無，但果種感覺好自然，好似你同個環境融合左一樣，但今日個種無人既感覺完全唔係果一回事，特別係有霧又灰暗。但係事情總係起著變化。
[black]
我留左係山頂大大話都有半果個幾鐘，而果家人再無左踪影。我如常打算走落鹿湖郊遊徑，一直走落去鯽魚湖果邊，但係走走下相信已經跌左入結界。事關條路本身由一條闊闊地既山路變左入泥路，旁邊開始由雜草變做半個至成個人咁高既蘆葦。呢個時候我都未意識到有咩問題，事關呢d情況成日都有。[/black]

Lm

留名

但係當我行到見唔到路，前面係一條乾左既河，要一直咁爬落去我就知道行錯左路，打算行番回頭路上去山頂，但係點都搵唔番條路，明明我只係行左300米左右，5分鐘路程，無可能會咁樣，好似千與千尋咁入左條隧道就去左另一個世界。咁我見果陣時都差不多4點，天氣又唔好，為免盪失路，柒d咁大叫，希望山頂d人會聽到搵得番個方向，點知叫完無人回應不特止，叫出黎少少回音都或者d音消散出去既感覺都無，仲好似即刻消左音咁，好似成個空間都唔係山頭，而係另一種空間。

我見都無乜效果，就落番條河果度，好神奇可以落到去，但就點樣都上唔番去，不禁自然自語講左聲，唉，屌你老母，今日都算黑仔啦。

其實之前行山行錯路都有試過鏟林行澗，但就未試過咁樣，我見呢個方向同鹿湖郊遊徑一樣，所以好有信心繼續落去，只要唔係突然間一個大轉變或者暗暗轉方向都OK，由於河係山凹位；即係兩山之間，所以一路落去係唔會錯方向。呢個時候點都要比番d信心自己，千其唔好亂。為左增強自信心，開左個指南針出黎睇，唔睇由自可，一睇屌你老母，做戲呀，亂咁擺既。咁都無辦法，照行落去啦。

依舊行落去條河，其實都無乜野，只係多d青苔咁者，不停咁落去，期間乜野聲都無，連雀仔聲、風聲都無，靜得好不安，死寂就係呢一種。直至行行下，撞到舊大石頭，我好大聲咁講屌你老母閪，好痛呀完未呀，事情就開始又起變化。

山神震怒、百鳥橫飛梗係無啦，但行行下景象開始有些微變化。你想有聲，得! 開始有風聲、有雀仔聲、有車聲(其實果度好近公路)、重點有廢老講野聲，好似聽到我心聲。呢個時候信心大增，我知道條正路一定係我右面，我搵個係位接番上去就可以。我繼續行落去行到條河開始有水潭；咁就知道去到中游咁上下，即係再行就應該會見到小瀑布咁樣就好難再落去，我就嘗試係右面搵機會行番出去。

有冇影相先

唔知係咪個空間聽到我想出去，突然間見到條路仔，應該話無咁多樹、有刺樹枝咁樣，我就行左上去，不停左插右插搵路出番去，其實好辛苦，好多樹枝會纏繞你令你仆低，有刺樹枝令你割傷，仲有一大棵樹阻住你出去，要不停咁衝。好在唔係雨季時份，唔係又有蜘蛛網又有蚊。期間因為聽到廢中講野聲，所以好有欲望向果個方向走，直至見到幾個人身位前有一塊綠色帆布掩住人形物體好似降落傘咁樣。而果一隻綠色仲係黑箱車蓋死人果隻顏色；雖然一d屍臭腐爛氣味都無，比你你行唔行過去? 梗係老閪都唔行啦。於是就番轉頭行落去條河果邊再搵個另一個缺口。

其實之前都睇過張善鵬既日誌，唔理真偽，呢一刻我懷疑同佢既情況係差不多，記得佢又係行到條河邊，無水無糧之下飲果度d水，訓左之後會唔見野，又見到聽到其他人聲。所以基於佢既經驗，我係唔會訓同飲河水，而好好彩我都仲未斷水斷糧。

於是我又搵另一個缺口行出去，心裡邊有種欲望，我要番屋企!我要番屋企! 唔到最好我都唔會報警。期間依舊都係耐唔耐就會聽到人聲同車聲。

跟住呢屌

lm

於是我又要同密林博鬥，呢次感覺到同正路既距離好近，因為廢中把聲越黎越大，所以個心好興奮又驚前面唔知會遇到d乜野，其實呢個時候已經比d樹枝割到損晒流血，成身都係泥。你以為上天會比轉機你，烏鴉口講中前面真係有其他野，今次唔係死屍，唔係咩神怪野，而係動物，一種唔會係呢個時候出現既動物- 蛇。

其實行山見到蛇都無乜出奇，但呢條蛇係一條黑色底帶少少白邊既飯鏟頭，長就唔係好長，但有前臂手腕位咁粗，隻眼全黑色得黎有少少彩虹色，好少平時洗碗落清潔精見到彩色水咁樣，佢既眼神好似人咁會望住你同盤起黎等你反應。呢個時候我呆左對望左一陣，佢見我無動作就自己鼠入草叢，行得好快，所以唔好諗住可以蛇係地下好慢。但問題就黎啦，你又夠唔夠膽過去，點知條蛇會唔會伏鳩你，如是者我又行番落條河。

其後再試多兩次，我都唔成功突破到樹林，一係就有好多帶刺樹枝，一係好斜行唔到上去，而我開始好攰，其實都可以繼續行落條河，但以我依家既狀態好容易出事，又或者遇到D唔知乜野，於是坐係到諗緊應該點做，而天色又黑左些少，已經五點；個人開始心慌亂諗野。

開始係度諗會唔會以後都出唔番去? 一陣再行會唔會有意外? 不如報警? 點樣係度過一晚夜? 我仲有咩未做? 死左點算? 其實呢度係唔係結界? 有好多好多問題係腦海浮過，但人開始慌張，又遇到神怪野就會從宗教角度睇事物。

留名

而我就一定唔係耶撚，一定跪地求上帝救我果種，我選擇左佛家，佛家講過眼前一切皆幻影，所以異像都係魔障迷惑人心，所以我眼前既一切都只係魔障，只要心夠靜一定可以出到去，於是我就合埋左眼靜思一下，希望令自己唔好再亂諗野或者做錯決定。但係人始終係凡人，係呢種時候一定好多野諗，我選擇左唸佛經方式令自己專注起黎。

觀自在菩薩，行深般若波羅密多時，照見五蘊皆空…… 唸唸下突然間多左一把聲，有野係度跟住唸，觀自在菩薩，行深般若波羅密多時…. 但係把聲係極低沉，就好似Youtube極醜惡果把聲係度跟你唸，而我呢個時候梗係嚇到仆街啦，呆左一呆，而且仲有好大陣腐臭味傳黎，我當下呆左一呆，而果把聲講左一句: 唸啦!做咩唔唸呀!搵如來救你啦!

其實個腦一片空白，地下開始有種輕微震盪既感覺，可能係我個身係度震都未定，但係成個環境有種變奏既感覺，開始有臭味、有鼓聲、有低頻講野聲，再唔係果一種死寂。

呢個時候我都唔知可以點做，唯有繼續合埋眼唸經，至少少左一個感官影響到自己先，我感覺到眼球跳動得好厲害，周不時有強光照射眼皮，而我亦都唔夠膽打開眼，耳仔(或者心)聽到好多雜聲、奇怪聲…. 鼻聞到腐臭味越黎越濃烈，周圍環境震到好似地裂咁，簡單黎講五官都比野影響緊，希望你意識會受佢控制。

lm

去到呢個時候我已經唔知係入左結界定係撞鬼又或者係自己幻覺，個情境就等同以前港產片撞鬼走極都走唔出去個地方，其實係自己個腦作怪比幻覺控制左，所以只要我集中精神，守住自己意識就一定無事。

我只係知我一路唸外面既世界就好似天翻地覆咁轉變，其實我係合埋左眼唔夠膽睇，但果一股氣勢係你身邊轉動，情況就好似你跌左落路軌有火車駛過，但果股力量再大好多。期間有一下唔覺意睜開左眼皮少少，見到地下同個天反覆左，即係我坐左係個天上面，而個天既顏色係黑紫色好似瘀血咁，d雲有手狀既野係度抓，嘩，我屌你老母，玩天空之鏡? 之後我好用力咁合埋雙眼，無論出邊有咩異動我都唔敢再睇，我聽到有好多人叫我；而果d人把聲好熟好似你朋友，有好香既氣味傳黎；果一種味係好特別好似甜甜地既香水咁，我相信呢d係務求令你意識跟住個幻覺走。

快

揮手區

直至我唔知唸左幾耐，應該係我唸左成世人最長時間經，所有野都平靜落黎，無刺激、無能量、無氣味、無聲音，呢個係一個好掙扎既時候，究竟應唔應該睜開雙眼?

睜開，一陣係比人伏鳩我點算。唔睜開，屌，咁即係等到幾時，隔左幾分鐘之後我終於頂唔順睜開對眼。周圍環境依然無變，屌，我依然坐係條河隔離，或者應該慶幸環境無變先好，但眼前要走翻出去呢個地方。

留名

lm

我以一種事過境遷既心態去試再走多次果堆叢林，但係我行下行下又聽到廢中把聲，呢個時候我已經再無心力去諗係真係假，我淨係向前見有空隙就行出去，之後我真係出到去郊遊徑，孝感動天呀!!

我以極速既步伐跑落山，沿路終於撞到廢中班人，第一次見到廢中咁開心，行到半路突然間有個路人逆方向走埋黎問我路，問我呢條路去邊度，乜咁得意自己行緊去邊都唔知(其實我都係一樣)，我答佢呢度鹿湖郊遊徑一出就係鯽魚湖，佢好驚訝咁答下係咩!! 而我亦都無再理佢，因為淨係想番屋企，繼續行行到去燒烤場。

[black]今次好彩燒烤場再無人燒野食，而我覺得好攰好攰，意識開始模糊，坐左係度恰著左………..[/black]