[更正] 7月26 香港國際機場集會

追風箏的一個傻瓜 · 2019-07-23T16:20:26+08:00

更正重Post 各位巴絲/jm/銀髮族及香港市民：一路有好多聲音希望有航空公司代表帶頭罷工，我地都等咗好耐，奈何種種限制下，罷工似乎唔係一個可行嘅辦法。有見及此，我地十幾位航空界員工膽粗粗咁計劃咗今次嘅集會，希望可以出一分綿力。航空界員工絕大部分都需要輪班，甚至要離境工作。受工作性質所限，我地未必能夠出席每一次嘅集會，但同大家一樣，我地都對香港政府以及其暴力/冷暴力行為感到憤怒。透過今次嘅集會，我地希望向公眾表達所有喺機場範圍工作嘅朋友嘅聲音。我地都好驚，雖然我地唔代表任何公司，不過一但追究起上嚟，要搵到我地嘅身分同僱主都唔難。同好多香港人一樣，我地都要養妻活兒、供養父母，但我地即使冒住被公司秋後算帳嘅風險，都要企出嚟提出我地嘅訴求。由於凖備時間緊迫，加上我地無任何經驗，今次集會係經譚文豪議員協助下，由香港空勤人員總工會代為申請不反對通知書。但我地緊遵「無大台」原則，是次集會不代表任何人士/組織/工會/航空公司嘅立場，所有出席者都係自發性參與。集會詳情如下：地點：香港國際機場一號客運大樓－五樓接機大堂日期：2019年7月26日（五）時間：13:00 - 23:59 ( 不反對通知書申請中 ) 我地強調，是次係和理非非非非嘅集會：和平理性，非機管局，非公司代表，非工會組織，非罷工。喺呢度，我地要重申一次，是次活動並非罷工，我地無意製造任何混亂阻礙香港國際機場嘅正常運作。著起制服，我地為大家緊守航空安全；換上黑衫，我地同大家一齊堅守信念！ 726機場，一齊「和你飛」！ Channel: https://t.me/joinchat/AAAAAFH6T-PlbAGcQnvJ9Q