[得閒分享吓]中文考過7次5**，你問我答

讀過HKU Master
本身有諗過想入日校教書仲報埋PGDE，
後來發現好黑暗，唔會做到自己想做既野
所以依家自己開補習班算數
咁多年都有自己親自去考
考咁多次唔係想證明自己叻/晒命(係既考一次就夠)
而係想感受下D考評準則同埋考評局既界線
用黎證明自己教D野係Work
所以年年都寫d奇怪野入去睇下人地收唔收貨
今年作左個愛情故去睇下條底線
結果作文5*(搞到straight唔到)
放完榜見到好多百態 有感而發得閒廢UP下中文要點讀
(識我既唔好起底啦 細佬性格內向劇毒怕尷尬)

其實如果問我中文最緊要係啲咩
撇除語感呀 根基呀 技巧呢啲廢話
我反而會覺得一個Plan / Schedule係最重要
中文科個Syllabus實在太大啦
大到你根本唔會知道有幾多野係需要讀
而且又咁講究語感
所以呢個情況下 你想考好呢份卷
其實好需要自己有一個詳細既Schedule
去判斷自己幾時讀到邊
幾時讀到邊
並且keep住chur自己唔可以同既定路程偏差
否則就好容易氣餒然後放棄

師兄當年估中文言文出處

之前見過有d人會話考咁多次會拉高條curve阻住其他考生
其實我都覺得好尷尬因為唔想影響人
其實自修生係唔會拉到其他人既curve
cut off係由日校考生成績去製造
而自修生係根據日校生條curve去拎分
所以簡單d講如果一萬個自修生
真係勁到一萬個都370/500分(中文500分滿)
咁係可以一萬個全部5**
而唔會話令日校生拎高分人數減少

至於oral 我都好驚會阻到其他人
所以我拎完準考證會去考評局比多三舊水申請延期考
延期考既話我係會同2個大學生3個人一組廢up
(即係另外果2條友唔係dse考生黎 係考評局請返黎做戲子)
所以好多人自己去考dse 理論上係對日校生無影響既

係咪已經係高登年代
出咗連登之後少咗好多開post

原來oral可以延期

係咪會多啲機會講嘢

繼續寫先
例如如果你中五開始讀 其實你有個plan既話
2年去讀一科中文真係綽綽有餘
問題係學校教果d野好多時無乜用
而你自己去讀又唔知要讀d咩

我一般會建議中五先讀卷一卷二
卷三卷四留低中六讀

如果中六/Retake 就真係超級炆水
真係要出盡奶力小小
通常都係呢個暑假最重要
浸咗根基先 再慢慢講skills

都係一人3分鐘
所以係9分鐘 每人一分鐘首輪發言 6分鐘自由討論
考完仲可以R下啲大學生傾計

先講下文言文點讀：

常用字係果幾十隻　記晒佢就好易睇明文章
重點係你唔可以買補習社/補習班既雞精黎睇
因為睇係唔會入腦
我一般會建議同學自己手抄
抄既話會好入腦
而且會容易理解啲前文後理
老老豆豆語文科不嬲唔係死背而係感受
但係講就容易囉 有幾多人真係明要點做?
上網查完例句 最緊要係自己手動將佢轉返做書面語
係轉既過程入面 你其實感受緊語法既系統
明白緊文言句法主謂賓係點擺 Subject點樣省略
你唔需要列出黎去寫明d Grammar係點
但你只要keep住做 做夠三四十隻字 好快你就會明

例如「患」係一隻ＤＳＥ超常見既字

你會查到佢有幾個解釋：擔心／災禍／疾病／毛病etc
我會點做呢？首先我會用自己記憶諗下指定篇章有冇類似句子
《廉頗藺相如列傳》：「欲勿予，即患秦兵之來。」
一定要將佢人手（自己諗！）轉返做書面語

不想給（的話），又怕秦軍會到來（侵犯）。
呢一句入面，當我自己手動轉
其實我會消化到幾樣野

1. 欲勿予其實係勿欲予(不想給 而唔係 想不給)
咁呢d我唔會叫倒裝因為呢d咁深既term講黎都係晒氣
你直接睇多啲就會明+識

2. 其實佢有一個「條件複句」既意味係度
「如果唔比既話」 ，「又會驚秦軍侵犯我地」
咁我地用語法去講　會講到水蛇春咁長
但實際上你十幾歲人由細講廣東話講到大
其實你會唔會唔明佢果個「如果前句，就會後句」既意思？
你唔會唔明架喎，
好多時我地用口語／書面語寫會識
但一轉返文言文你就唔識，其實係因為你本身就驚左文言文
所以我上面先至特登用口語寫果句
上面呢劈野我打左成段
但實際上你做落去　只係一句既功夫
而當中既思維邏輯　全部係你腦袋入面運行
風水佬呃你十年八年　我呃得你幾耐？
你真係肯疊埋心水做夠５０～７０隻文言文字
其實你唔係「抄緊文言文解釋」
而係「理解語法思維」
呢個道理　講出黎好容易　亦都事實上根本唔洗比錢補習去學
但係偏偏係最少人願意落手落腳做既野
其實有樣野我都幾感觸　
香港太多補習社做得太多　好多野應該係學生做比老師搶晒去做
你如果係自己考ＤＳＥ
唔好買咁多雞精書睇　好多野自己寫自己LOAD
其實你會學得更多
呢個都係我自己去教人中文成日講既核心概念

鵠巴中文界橫行多年今年如果冇睇過鵠巴建議都升唔到grade

寫多個解釋
「故君之所以患於軍者三。」
患字解妨礙
其實重點唔係你識唔識呢隻字
而係你點理解佢成句
「患於軍」有倒裝成分
會解成「對軍隊的危害」
咁成句會變成
「所以，君主對於軍隊的危害有三種」
同樣地　寫出黎好囉嗦
但你諗既時候一般係電光火石間係腦入面LOAD到
中文差Ｄ既人要load耐d
好ｄ既人會load快d
但係無論點　你肯諗　語感慢慢就會提升

準備一個鐘收幾錢

應屆考生留名學野

d戲子係好勁?定係會專登扮廢d，建唔建議人延遲考?

我直頭有舊屆學生係戲子
大學有得報考評局既工架
佢會叫你自由發揮 但有D野唔好做咁樣
廢事講咁白 但簡單D黎講其實好睇個大學生心態
如果你係想博戲子放水去屈高分
我建議慳返果三百蚊算啦

好憎作文，可以點做

真係有興趣可以tg問
@lihkgchinesde

dse計最重就係作文

同f6差唔多 但如果retake
應該要特別反思下自己舊年做錯左d咩先會搞到唔合格

當年睇巴打講中文
真係好勁

繼續講果個文言文
如果可以堅持到抄50~70個常用字
用固定format
(詞意->例句->書面語解釋)
其實好快就會有好大進步
建議大家暑假要搞掂
然後就係可以開始操卷
我極唔建議去補習/自學
一黎就學什麼什麼答題技巧
老老豆豆 你連篇文字都未睇得明
講答題技巧? 係咪有d自欺欺人呢
大家最鍾意睇就係"神技"、"秒殺"
但問心果句 如果真係有既話
呢個世界就唔會咁多人fail啦
語文科 必然係先重根基 後重技巧
唔係話技巧唔重要 但根基未紮實
談技巧就淪為未學行先學跑之舉