首先，亦都先講左最急切嘅一點，我覺得今晚唔應該有任何嘅衝擊
因為最基本嘅事就係: 你唔能夠用另一場武力衝突去要求政府解脱第一場武力衝突。邏輯上、道理上都係錯
呢度有位巴打講左其他論點, 我唔重覆, 可以參考:
今晚實在建議大家唔好衝，原因有三!!!
https://lihkg.com/thread/1232003/page/1
------
依家講一講策略同埋之後嘅方向
今日我哋號稱有二百萬人上街，係一個好大好大嘅數字，但係我哋都要明白之後如果有任何嘅號召，都好難會再超過今日嘅人數，所以如果我哋要繼續抗爭，手法需要改變
我就住今日既幾個議題, 逐一分析下
一. 撤回送中條例 林鄭下台
老實講，你問我覺得政府大唔大機會會係可見嘅將來重新啟動條例去二讀，我覺得政治現實上唔大可能，因為一嚟陳同佳已經獲釋，二來佢咁做政治風險好大。
而林鄭下台嘅可能性其實亦都唔會好大，因為現實上咁做中央一定好冇面，早一個禮拜力撐，唔通下一個禮拜換咗佢咩。
但係呢兩個要求我哋都要繼續叫，因為而家我哋有嘅就係民意，我哋要持續比壓力呢一個政府。如果能夠迫使到政府完全撤回送中條例係最好，但我哋有更加重要嘅事要花時間去做。
二. 收回暴動定性 釋放示威人士
呢一件事係我哋現階段最重要既。
冇當日去衝嘅行動派，就唔會有今日暫緩嘅成果，如果今次再有任何義士被起訴暴動，佢哋會面臨好嚴重嘅刑責，將來前線亦會少咗呢一班抗爭者。如果我哋有下一場戰役要打，我哋需要保住今次每一個人。
但係比壓力政府唔能夠再靠衝，正如標題所講，你唔能夠用新一場武力衝突去要求政府放過你前一場武力衝突。而今日我哋亦都展示左人數上嘅民意。
所以我哋下一步要做嘅，就係用文攻: 繼續搜羅黑警嘅證據，要求外國政府繼續審視香港人權狀況，追擊建制議員。總之就係搞到政府嘅人要成日提心吊膽，不斷承受壓力，唔敢去搞呢一班義士。
當然，有乜嘢方式都要大家發揮創意，繼續討論
----
後話：政治啟蒙
今次反送中，令到好多人第一次接觸政治，絕對係一件好事，我相信亦都會好似上次雨傘一樣，成為左新一代人嘅政治啟蒙。
大家可以試吓游說今次好關心事情嘅親友，講多啲議會嘅情況、香港嘅情況比佢哋知道。希望無論係議會選舉上、又或者政策制定上，佢哋都會唔再做港豬。
不過見到有啲行得太快嘅巴打，開始喺度講臨時政府、香港自主等等嘅議題，其實有啲太快同太急。大家要明白今日有二百萬人出嚟，只係代表佢哋贊同今日嘅議題，唔代表全部人都打算要反政府。情況亦好似今日佢哋開始讀小學，但係大家就想將啲大學嘅理論講比佢哋聽，咁會操之過急，嚇走佢哋。所以最好都係循序漸進，至少如今次，多咗人認同勇武、或者行動派，絕對係大進步。
我希望大家唔好覺得咁同泛民old seafood尸位素餐冇分別，我冇忘記每一位為運動付出甚至犧牲嘅義士、烈士。我最希望嘅係大家能夠將佢哋所希望嘅嘢切切實實地帶到比香港。
