魚蛋河
2019-06-17 08:16:37
非常同意，有兩點想提出
第一，保皇之所以可以有咁多票，係因為佢有大量維穩基金，平時送嘢，投票時車老人去投票，呢點我地根本比唔上。所以我地惟有靠人海戰術。一百萬人每人游說家中一個長輩，佢地就少左一百萬張票。淨係靠長輩圖唔够，要有埋解說。可以成功游說到佢地投民主派當然最好，唔得嘅話令佢地覺得難分真假，唔去投票已經成功。
解說過程唔好太強硬，佢地好似小朋友咁要氹，分享一個經驗：長輩圖發出果日朝早，我同屋企長輩嘅對話。
我：中央話左冇要求修例，係林鄭自把自為，啲學生腦囟未生埋，梗係俾外國勢力利用啦。林鄭做咁多年官，唔係唔知外國勢力成日想乘機搞亂香港，佢想邀功之嘛。
之後佢地收到長輩圖，就教返我轉頭。
長：林鄭唔係要邀功，佢係港英餘孽，幫英國人做嘢，佢老公兩個仔都係英國籍。
我(恍然大悟狀)：都話左佢點會唔知有外國勢力，仲衰過邀功！
你要順住佢地嘅思路，佢地要人認同，覺得佢醒過你，先會聽你講。民建聯成日同佢地話理性理性，佢地會覺得“理性“高級過你班後生，所以佢地咪覺得好啱聽囉。呢點我地要學習。
第二，想強調我地唔係要果班老人家認同你，甚至投泛民。而係要令佢地唔投保皇，你一路發放大量長輩圖俾佢地，等佢地分辨唔到，唔知點投。久而久之，保皇就會放棄佢哋，就會真正失去呢班選民嘅支持。所以呢場係一場長期戰爭，要靠所有人嘅努力。
無論你認唔認同泛民都好，要記住，泛民嘅票係要靠民意，佢地唔順應民意，就乜都冇。