閨密母女齊齊去蒲吧靚媽再婚乖女感安慰

Diprivan 2019-05-12 11:27:41

訪問前，我叫20歲的Ailey先發一張和媽媽的合照給我看看，看完，我load了幾秒才分得出誰是媽誰是女，太誇張了吧？這對外表年齡相差不足十歲的，竟然是一對母女？

相關新聞：【登記即睇】600分之1的機會遇上我的最佳男友兒子

外型細細粒、皮膚白晢，今年38歲的Ellie，18歲那年就意外懷上了女兒Ailey，還未讀完書就要迎接一條小生命，徬徨心情可想而知。「嗰時好灰，覺得對唔住屋企人，好丟佢哋架，咁細個就俾人搞大個肚，好唔開心，又唔敢講畀朋友知，驚俾人笑。當時人人都諗緊讀咩科，諗緊自己前途時，我就要走去睇育嬰書，舊同學聚會我都唔敢帶個女出來，唔想畀人知，朋友有朋友嘅路，我有我嘅路，覺得好孤單。」年輕人總有理想，但對當刻的Ellie來說，夢想是遙不可及，太奢侈。「眼前面對嘅事根本唔係我18歲可以處理到，大肚、自己生活、小朋友將來，已經令我好迷惘，仲邊敢去諗理想？」幸而，夫家很愛錫她，知道她還年輕，願意幫她照顧女兒，好讓她外出工作，見見世面，認識新朋友。「有咗淇淇（女兒）後，好奇怪，同屋企人關係反而更close，多咗家庭聚會，因為有小朋友連繫住，有佢哋陪伴同支持，令我順利度過最難過嘅頭十年。」

其實，生女後幾年，Ellie就和丈夫分開，女兒Ailey自此跟爸爸生活，兩母女在周末及假期才見面，每次出來都會將學業拋諸腦後，因為Ellie不想女兒感到壓力，抗拒和自己外出。Ailey說：「媽咪每個星期都帶我去玩，一齊行街、扮靚、買衫，反而見少啲仲多交流，關係仲keep到好好。」

相關新聞：【母親節】餵母乳遇着偷拍狂 23歲靚媽嘆路人懶理：都係望吓就算

兩母女無論是身高、身形都相近，同樣細細粒，像一對孖公仔。「試過有中學同學見到我媽咪，讚佢好後生好靚，好羨慕我，哈哈。」Ailey說，雖然她已20歲，但和媽媽逛街時仍是手拖手，更會每日傾電話，不時傾足幾小時才收線，Ailey說：「我哋會放個電話喺廁所，一邊沖涼一邊繼續講，其他同學媽咪打電話畀佢哋通常係叫佢哋飲湯、幫手晾衫，但我媽咪冇同我講過呢啲，唔會哦我囉。佢打來都係傾心事，我乜都可以同佢講，朋友呀、公司呀、返學呀、屋企呀，我連拍拖都會第一時間話佢知，佢都唔會阻我。」

小六那年，試過有男仔想在Facebook結識Ailey，媽媽的反應出乎女兒意料之外。「如果係其他媽咪，可能會好擔心，覺得唔係呀嘛，咁細個，快啲delete Facebook啦。但我媽會覺得係一件好有趣嘅事，仲反問我有冇試過同人去下街。」Ellie回應說：「我諗法係靚女嘛，有人鍾意好正常吖。如果我當時阻止佢，可能以後乜都唔同我講，可能當刻佢都對個男仔有興趣，想問下我意見呢？我會從旁觀察佢囉，加上佢當時身邊嘅朋友同佢一樣大，知識一樣有限，作為媽咪，一個過來人，必須要帶住佢點行，感情來嘅時候，人人都唔同，每段感情都可以令女仔成長，對我來講都係個好機會陪女女成長。」

這對母女，其實和一般母女還有點不一樣，她們還會結伴去蘭桂坊夜蒲，Ellie說：「我第一次帶佢去蘭桂坊玩，係因為當時有套戲《喜愛夜蒲》，佢話想睇，我就索性帶佢去實地考察一下，佢當時得14歲，嗰個階段佢未必分到真假，趁我仲可以陪佢，就帶佢去行下，希望喺佢最迷失時教到佢。」訪問當天，跟她們去蘭桂坊行了一轉，兩母女摸着酒杯底談心，應該別有一番風味。她們更笑言試過對認識的新朋友說出二人是母女關係，完全沒有人相信。不意外，你幾時見過有人會同父母一齊去蒲？

多年來，這個媽媽傳授了不少戀愛知識給女兒，直到現在女兒大了，Ellie也再拍拖，女兒反過來成為了她的軍師。今年年尾，Ellie將會再婚，除她以外，女兒是第二個最開心的人，Ellie以前曾擔心過再覓第二春，女兒會不喜歡，因為不能再獨佔媽媽，要分一半給人，但原來女兒一直都是最支持她再尋找伴侶的人。「佢成日催我去搵男朋友，我仲未搵到時佢仲叫我去差館報失，哈哈。」其實，在媽媽眼中仍是小朋友的Ailey，是這樣想的：「佢仍然好後生，我有時都會諗自己會唔會阻住佢人生發展呢？我而家20歲，差不多係佢當年生我嘅年紀，仲係好細個，如果你問我，我自己仲有好多事想做，將來做乜職業，有好多幻想，我相信媽咪都一定會有，但佢當時因為要照顧我而失去呢啲機會，我知佢付出咗好多。大個咗我自己開始拍拖時就知道，如果將來我有其他事做，冇人陪佢，佢會好孤單，我會好想佢搵到個可以照顧到佢嘅人，我會忙得自在啲，唔會心掛掛，而家見佢搵到幸福，我覺得自己冇耽誤到佢，我都好開心、好感動。」

Diprivan 2019-05-12 11:28:27