金像獎之後好多人討論香港男演員演技
分享下我個人排名見解 歡迎提出意見一齊討論
S+:梁朝偉
演技通常會被分為‘內斂派’同‘爆發派’ 而內斂比爆發更難駕馭
因為除左要揣摩到個角色好透徹 更加要完美拿捏角色狀態和內心
從而用最輕描淡寫既表情演繹出多層感情 有種登峰造極 返璞歸真既意味
而梁朝偉就係屬於內斂派 單單一個眼神 一個笑容已經可以呈現到角色既所有狀態俾觀眾
呢樣係香港其他演員 甚至華人之中都極之罕有
再配上個人獨有氣質(演員好講天份 特別係樣貌氣質) 真係前無古人 後無來者
參考作品:花樣年華
S:梁家輝 張國榮 黃秋生 劉青雲 (排名分先後)
呢幾個都係「戲精」對於‘內斂派’同‘爆發派’角色都駕輕就熟
既可以演咆哮戲 同時亦能演內斂內心戲 而且不限於個人形象
對各類型角色都演繹得入型入格 完全進入個角色既狀態 而唔係去「演」個角色
黑社會/變態佬/市井之徒/普通阿伯/好父親/低下階層/上流人士等等
會令到觀眾睇既當下 忘記左佢就係張國榮 梁家輝 黃秋生 劉青雲 而係戲入面個角色
其實張國榮係好大潛質去到S+ 但好可惜佢事業大半都專注於歌唱方面
後來發展影視不久就自殺了 但不多既作品入面已經一鳴驚人
經典作品 霸王別姬中既演繹已經震驚整個行業
當然仲有同梁朝偉對手既春光乍洩 同埋阿飛正傳
A:曾志偉 張家輝 郭富城 張學友 吳鎮宇(排名分先後)
曾志偉絕對係影帝級 奈何受制於個人外表問題 好難有主角/好角色俾到佢演
通常都係做綠葉 但都難掩佢出色既演繹
張家輝可能大家睇佢啲喜劇多 但佢真係一個好勤力好多變既演員
付出同犧牲絕對係演技既一種
郭富城 佢係近年各類作品都俾到好大驚喜觀眾 佢都明顯駕馭個到角色
不過開始見底 演員好重視突破 期望佢有新既突破
張學友都係有啲可惜 可能佢唱歌太出色 影視上無好大空間發揮
但其實佢文武戲都做得非常出色
最具爭議既吳鎮宇 最近好多人都為佢抱打不平
但事實係佢達唔到以上S級各位演員既境界 就係演乜似乜 代表作亦不多
由始至終 咁多年黎 無進步無突破 無論角色同佢既演繹方式都係演緊sam哥
一到近期逆流大叔就睇得出佢根本無法駕馭其他類型既角色
但我不否認佢係一個出色既演員 而佢係槍火表現絕對值得一座金像獎
其他如周潤發 周星馳 任達華等都係好出色既演員 但就唔多講了
最後想講既係 呢班演員絕對係香港之光 如果要排華人影帝頭10 包括中港台
香港絕對佔左一大半 大家好好珍惜佢哋