[開心速遞]熊若水龔燁 供水線集中討論區（36）

主要講佢去整甲嘅路上中獎💩，同中後感再加閑聊

547龔水定格
一路都想講547不過一直忙都無時間慢慢講，就襯住今日Mytv最後翻loop講下。圖多已經盡量濃縮，如覺得阻住版面先唔好意思

一開始大房開會其實已表明龔水縱使一齊咗但都唔會話阿龔乜都聽晒阿水支笛，當然亦都因為呢一刻未公開都會有分別，而且阿龔就算投反對票對結果都唔會影響，咁樣跟隊投係無可厚非

阿水呢？佢原來係好期望男友喺呢方面會支持自己，所以由呢度開始我認為劇組已經鋪緊兩個人有唔同諗法呢樣嘢


去到夜晚café開會，首先又想講點解阿龔個來電顯示仲係無相呀 當你地未公開唔整住，嗱！下一次好有返相啦

緊要電話行開聽，如果無呢個電話好可能阿龔已經講出同阿水一齊咗，不過開心速遞好多時都係"咁啱得咁撓"，anyway再次講下阿龔呢個笑容真係好甜

唔得！仲要拍埋枱，雖然阿龔對自己係有信心但都會呷咗醋先，同埋由一齊咗之後好多位都表現出阿龔心裡面係非常想公開嘅


去到餐廳，阿水出到聲怪阿龔搞到佢無tiramisu食，而且個樣非常認真嘟晒嘴咁，如果我係阿龔睇到都唔會當無件事啦

阿水呢個wfc樣令我諗起藍調嗰集，都係表面就講到唔理人寫衰/對付，佢自有應對方法(其實8:55唔俾男同事搭lift我覺得真係好極端)，呢度我反而期待下阿水以後再面對呢啲位會唔會有所改變，反正仲有咁多集會講到都唔出奇

講返阿龔，未有任何著數前佢真係想公開就算，呢個樣都係非常認真咁想公開，我覺得佢真係完全唔擔心Ivan，只係唔想媽呢空知道真相後會受傷害

而餐廳最尾阿水呢個樣完美演繹出天真水，天真到同Melody有得揮 試問阿龔對住咁嘅樣又點好意思去拆穿佢


一如阿龔所料Ivan係無可能追到阿水，亦造成佢腦入面產生嘅winwin計劃


以下幾張一齊講，唔洗講整幕壁咚都係為咗戲劇效果同呼應返上一次阿水壁咚、三連擊、曹太一嘴以謝天下，但點解阿龔咁有信心覺得咁樣做係work？我覺得因為有536阿水尋寶圖攬住佢嗰下，不過阿龔唔知當時因為佢一路嘅行為令到阿水覺得好窩心所以先攬住佢，令阿龔誤以為上次都唔介意尋寶圖班卡啦蘇返工會見到啦，今次隔住個mon唔怕啦





最後換來就係食蕉連皮 都好合理嘅

不過你問我我就覺得嘴落去只係呼應下曹太，唔算同曹太嗰集一樣，曹太嗰集嘅一嘴都預咗阿水會拒絕而唔同今次覺得自己可以嘴到


或者有加碼在前令人覺得尋寶圖表白係有目的，不過我都認為呢刻嘅阿龔係真心真意，明顯同lift個感覺好唔同

慢慢行上前等阿水感受佢嘅誠意再唔係lift嗰度咁herher聲

跪地之前嘅表情，有一種"今次我真係用個心出嚟向你表示希望你明白啦"嘅感覺


以下幾句無可置疑係非常認真，所以我翻睇都覺得好甜



呢個等待回應樣都係超誠懇 啱啱發現點解字幕會係接受她嘅…

阿龔咁誠懇搞到雙下巴天使都出嚟接受

如果係夾計去做場戲表白同接受就未必見到阿水呢個真心冧豬樣，應該會見到阿水多種奸計得逞笑容


天台360，一路諗住呢幕係咪咩甜嘢好期待，我諗同阿龔當時一樣都有期待做乜媽呢空叫我上天台，所以掟花第一下係好天然呆

然後阿水咩都唔講就話分手先，阿龔仲以為係玩緊乜

呢度想講下我估劇組係想玩大落差同急速推進嘅感覺，用轉住一鏡去將阿水喪鬧呢下表達嗰一刻嘅衝動，講完一輪都唔俾阿龔解釋轉身就走。當然阿水嗰下係好嬲正如下面幅圖最精要呢句"你係我男朋友嚟架"，好似我最上面咁講，阿水係非常期望做佢男朋友就應該要點樣

接住講阿龔大嗌Mary之後嘅劇情先比較連貫啲，初戀café後面先講。
阿龔講完為咗阿水先咁做阿水就停步，阿水雖然衝動但都揀咗約阿龔上天台講而唔係大庭廣眾，火爆還火爆心底都會有位想留比阿龔解釋

聽到A1車位就原諒呢度都係要講阿水熊家基因發作架啦，而且呢樣嘢係有錢都買唔到，面子問題。

阿龔呢個樣好知衰，爭在未跪低扭住耳仔講

阿水就係鐘意阿龔夠賤望住呢下係甜嘅

成個天台戲如果可以做到阿水之前嘅喪鬧soft返少少，或者無由王朝口中得知死士而係直接質問阿龔由好嬲衝動講分手再聽阿龔解釋先慢慢變原諒有啲過渡咁會比較無咁突變，而家劇組呢種手法就想強烈表達阿水雖然火爆衝動但一刺激到熊家基因又可以完全變晒

去到最尾Café阿龔呢下奸笑兩面睇啦，佢嘅winwin計劃仲算過咗阿水嗰關又呃到康樂組班仔，難怪咁得戚嘅

覺得拉櫈呢下唔係做戲俾班男人睇似係好自然反應，令我有種阿龔都會盡力去做好每個細節，不為甚麼只因為佢係阿水個男朋友

講到尾阿水仲以為自己深受接龍大部份男仕喜愛車見車載嗰隻 其實阿龔都仲算瞞緊阿水，既然阿水自我感覺良好又做乜要篤爆佢呢

請無視右下角即將播放end shot柴犬笑同藍調有啲似，我覺得未來仍然會有一啲劇情講阿龔做咗啲自認為係對阿水好嘅事，未必下下都會同阿水講返就好似蠱惑公文袋嗰類咁。但搵集去講阿水知道阿龔為佢做嘅事都好甜，例如阿水上去service apartment除咗大家N個FF劇情，首先講返阿龔屋企唔係羊羊口中嘅沙甸魚劏房已經想像到有幾甜


成集睇完我又唔會覺得好差，而且未播前有啲位都估到係咁樣(連返唔係我呀、尋寶圖表白非ending、天台掟花)所以感覺今集整體上咁嘅結果都合乎預期，當然中間一啲表達方法可以做得更好。後段處理係好急咁，由阿龔接受做死士開始去得好快，唔知係咪劇組刻意想做呢種效果定點樣 不過其實由lift壁咚>>尋寶圖表白>>天台鬧分手>>café反cup只係一個朝早至中午發生嘅事，所以就係想有呢種急去表達龔水雙方都無乜時間去諗咁多又掉返轉諗可能康樂組同rou...ter真係會有多啲後續位去講，所以今集前面先特登用唔少時間去交代。

感謝你睇到尾 相信之後有更加多嘅問題要龔水佢地面對同解決嘅，就拭目以待啦

真係要有幾熱愛先可以去晒啲外景位打卡
我除咗俾塊正皮都唔知可以再做啲乜

落難貴公子 真係好多謝你咁詳細既分析和拆解每一個環節
經過你咁詳細和細心的分析之後 我有再次睇返重溫
感覺同第一次睇果陣 完全係兩種感覺
第一次睇完之後我正係覺得阿龔真係作死咩果種心態
甚至覺得阿龔好奇怪 點解班人咁樣欺負水水 你都陪佢地玩埋一份
其實阿龔到底有幾緊張水水呢 ???? 當時我係咁樣問過自己 ???
的確唔明白點解編劇要咁樣安排 ???

經過 落難貴公子 咁有心思圖文並謬 咁詳細的分析之後
令我再有衝動再去重溫果集每一個情節 多謝 落難貴公子 咁詳盡的分析

睇完其實都幾開心佢會以開心速遞為優先，覺得佢同阿蟹都係會諗得好清楚自己要咩嘅人，一步步行唔會急功近利。同埋佢哋都係真心珍惜呢個團隊同角色

睇得出阿淳等龔燁呢類角色等左好耐
始終搵到個角色帶比人深刻印象真係唔容易
好希望佢可以繼續做好佢份「龔」
繼續展示更多龔總監唔同嘅樣比我地睇

龔燁真係我睇TVB劇咁耐最鍾意既一個角色～
而我睇得出龔燁其實對一個演員黎講，又係一個好有挑戰性既角色，
要令佢散發到陣賤味得黎又要令人覺得討好真係好難掌握，
要知道個本身個人物背景都幾沉重。
之後用呢個角色去演愛情戲，難上加難。
所以真心好佩服佢既演技

其實之前有好多次都忍唔住諗，如果個角色係其他人演會唔會有同樣既效果，
但想像下總係覺得好奇怪。
如果其他人演既話個角色真係未必咁受歡迎。

所以有時好角色遇上好演員真係好重要。

只希望呢一個角色可以一直陪我地行落去，直到開心速遞個故事正式完結為止。
同水水一定要幸福快樂咁生活落去呀呀呀

我覺得工業行動，其實某程度上比咗stanley一個好大影響，因為呢個行動某程度上係佢終於得到來自觀眾對佢嘅肯定
我相信現家佢點都會為”龔燁”為先

其實呢排睇返啲相會覺得回水前嘅龔燁都仲有一種演出黎嘅感覺，但回水後Stanley 真係好似之前有絲形容，上曬身咁，只要著起套suit帶起副眼鏡，我就完全唔會覺得呢個人係Stanley，只會覺得係龔燁。而且當佢做返Stanley 個陣又真係會覺得佢同龔燁個性格差好遠好遠，睇得出真有用心去做呢個角色，其實篇訪問仲有講同阿蟹嘅火花，覺得龔水呢件事真係天時地利人和加埋，收工有時間再貼過黎比大家睇吓。

總監大人做咩咁愁啊
唔知劇入面係咪真係有呢幕呢
如果真係劇情需要
有咩事需要總監大人咁煩惱？

背景仲有堆道具紅酒同酒樽，
似初戀cafe
莫非接龍又喺cafe搞活動？

咩劇情要勁飲
醉咗係咪要人送返service apartment

起初戀cafe飲紅酒 男子組又開會

好ff feel
深藍色西裝好charm +1

https://doc-0s-64-docs.googleusercontent.com/docs/securesc/ha0ro937gcuc7l7deffksulhg5h7mbp1/4mnet8ihrlpdq60sks70opmqelggvndb/1554804000000/01514980257931604932/*/1oLreJ-OKxL4gYi1NoH1PzgKbmeGG0Z8j?e=download
生活提案電子版

加張圖等大家留意一下

呢張枱唔太似cafe啲枱，覺得有可能唔係cafe
因為佢地啲景與景其實係痴得好埋，見過貼住cafe個景隔離係大龍生office
況且覺得阿淳唔會咁易俾大家估到

好甜啊笑咗
覺得佢係排緊戲