但係對一般人嚟講，買銷售版係有著數過租用版。
點解會突然發現呢樣嘢呢？
話說我都畢業好一段時間，之前一直都用梗張學生八達通，就算冇左半價都繼續用。但近來發現張卡感應好差，都好殘好舊下，同埋學生八達通有自己小學雞果陣張相
柒到唔敢望（雖然而家依然好柒） 咁我就想去地鐵櫃位果邊整張新架啦。跟住個職員畀左張申請表畀我，話填完再交100蚊，其中50蚊係按金，20蚊手續費，得返30蚊係儲值額
……
咁我就冇即場交表，返屋企慢慢睇過張表。
發現佢上面仲寫住一句：八達通卡公司有權從按金中扣取$10作退還八達通之手續費。
屌你真係ON99，申請張八達通已經食左20蚊手續費，要退又要喺按金到扣10蚊，呢到加埋都成30蚊。
跟住我上八達通公司個網先發現，原來八達通分兩種，一種叫「租用版」，姐係我由細到大都用緊果款，要畀按金要畀手續費。仲有另一款叫「銷售版（特別版）」，買完返嚟入面喺冇錢嘅，唔洗按金唔洗手續費。
最平果款叫「銷售版旅客八達通」，都係$39咋，你睇睇租用版淨係手續費就用左30蚊；仲要各大便利店７仔、OK、VINGO都買到，即買即充值就用得，唔洗好似租用版咁，知唔知租用版個申請流程係點？去指定地點交FORM、交100蚊，等10個工作天後，會寄張卡去閣下住址，再拎張卡去櫃位到啟動……煩撚到呢……
大家仲要留意，租用版你畀左50蚊按金佢，實際上你幾乎冇咩可能會拎返佢出嚟，除非你無端白事要退左張卡佢。讀過經濟學都知（或者冇讀過經濟學都知），定額存款係有利於銀行嘅，因為銀行可以用筆錢去做自己生意，錢搵錢；所以定期存款嘅利率係高過活期存款，就係為左補償你唔可以郁果舊錢，銀行為左吸引大家所以定期息口會好過活期。但係租用版八達通就係白白咁食左你50蚊 （最後拎得返嘅仲可能只係得40蚊），大佬，通脹殺到嚟，到你隔左好耐真係唔知咩事退左張卡，拎返果50蚊，同你當初畀果50蚊（假設你拎得返），購買力已經完全唔同。
再加上，申請租用版八達通一嚟個過程麻鳩煩，二嚟仲要拎你好多個人資料。八達通公司間柒頭皮公司早喺2010年就爆過單轉售巿民私隱圖利嘅醜聞出嚟。雖然而家有私隱條例，但對呢啲早有前科嘅公司，可以唔畀資料佢就最好唔畀。衰啲講句，你做完壞事，警犬要搵到你都冇咁易呀。
仲有一點就係，銷售版使用上係同租用版嘅成人八達通冇任何分別。大家都可以賒數，賖到-35蚊。咁大家想唔用張卡嘅時候，直接賒到盡$-35，跟手扔左張卡就得，乾手淨腳（咁計落，最平果張卡賣$39，你可以用到盡＄-35，其實張卡淨價都係賣4蚊咋喎）。洗鬼好似租用版咁，退還張死人卡仲要有可能扣你$10手續費咩，ON99。
咁就講左咁多銷售版有咩優勝過租用版嘅地方，咁講下租用版有咩好處，引用自官網嘅說法：
優點:
印有你的姓名及照片（選擇性）
享有八達通報失服務
都係收皮吧啦……
最後帶大家睇下銷售版八達通有咩花款：
銷售版旅客八達通
一個字：平
$39
圖案都幾卡通幾特別
新紀元 · 别注版八達通
我應該會買呢張，貴少少，$88
但黑卡係咪型啲先
其實仲有高達珍藏版呀、金雞珍藏版呀咁，不過好貴下，成兩百幾，我就冇咩性趣啦。大家有興趣可以自己上佢官網到睇。
