溫子仁導演既超級英雄電影
老實講
真係有幾分超出我預期
首先,選角方面
其實呢一點都唔需要我多講
DC選角不嬲都靚仔靚女
前有Gal Gadot
今次有Amber Heard
仲要開宗名義濕身Look比你睇
然後不得不提既係佢既動作場面同拍攝手法
呢點真係好驚艷
佢每一場動作鏡頭
都設計得好靚
好多時都用連鏡由一個地方移去另一個地方
將兩段打鬥好Smooth咁串連埋一齊
而且佢d打鬥動作都好流暢
成套戲所有打鬥場面都係爽度十足
尤其係西西里追逐果個Scene
同埋女主角搶刀一打五果幕
都睇到成個人熱血沸騰
再者,劇情方面
呢點真係不得不說
我預左呢套戲係劇情方面個反應會好兩極
無可否認
水行俠既劇情真係好大路同好老土
亦冇任何轉折位同伏線
一條直路走落去
但其實有一樣野我一直想講
就係
睇唔同種類既戲,要由唔同既角度去睇
水行俠雖然係老土同大路野
但以合家歡英雄片黎計
其實係一件好正常既事
水行俠屬於比較傳統既超級英雄片
佢唔係犯罪片 唔係劇情片
有好多人都比蝙蝠俠三部曲養大左個胃口
嚴格黎講三部曲(尤其第二集)絕對唔係英雄片
而係一套包裝得好好既犯罪片
用佢黎比較其他英雄片係好唔公平
對呢類片種黎講
最為重要既 係劇情既推進手法
能夠係一套戲入面補全成個亞特蘭提斯既世界觀
同時講到主角既劇情
做得到全套戲節奏快冇悶場
每一環都串連得完滿同流暢
水行俠係呢點做得好好
男女主角走遍幾個海國一關關咁推進
充滿住冒險要素
好似打緊機咁
不過呢樣野就衍生左一個缺點
陣間再講
最後要讚既係
亦係DC電影既一貫優點
佢d畫面真係好靚好靚
初入亞特蘭提斯
男女主係戰場中心擁吻
入Kingdom of Trench跳入海果下
全部都印象極深刻
其實不嬲DC電影都好著重畫面
但前幾套實在太鳩流
係一套垃圾入面格硬加d靚畫面
反而更令人反感
今次水行俠就拍到個效果出黎
優點講完 到缺點
劇情方面就唔再講啦
爆谷英雄片唔要求太高
上文提到
今次水行俠個劇情拍到好似打機咁
成於此 也敗於此
實在係太似打機啦
男主角第一次見佢細路
比人鎖住果一幕
成個背景根本就係BOSS戰既場景
尤其係西西里女主搶刀果場打鬥
把刀仲要有d光霧滲出黎
佢飛黎飛去左劈右劈
的確睇得我好爽
但我以為自己睇緊DMC Gameplay
同埋佢太過刻意想為水行俠洗底
一開始潛艇救人
太多鏡頭比佢懶型同Show off
行過噴霧又要慢鏡
回頭奸笑又要慢鏡
比人射到訓底又要Chok住慢慢起身
得啦知啦知你型啦
好在之後就冇呢個問題出現
順便想講埋男主角d演技
一開始佢同老豆係酒吧鬥完酒
佢老豆拍一拍佢
佢就笑到成個傻仔咁
睇到我好尷尬
總括而言
我覺得今次水行俠都真係幾大驚喜
打鬥爽快 畫面壯麗 劇情流暢 節奏明快 冇悶場
單純以超級英雄電影計
水行俠我會比高分
絕對好睇過黑豹
經過呢套同即將會上映既Shazam
睇得出DC都打算轉型
走返合家歡路線
希望之後既戲可以越拍越好
DC你以後都係比溫子仁做導演啦