DSE係香港嘅一大騙局

啱啱睇到隔離post講DSE人不及A level人成熟，有感而發想喺度講少少嘢。

大約十年前，成日睇電視見到334新學制廣告，話334可以令學生多元發展乜乜乜，聽落去好似好吸引，知道自己有份玩，好好奇上到高中嘅自己係咪會比起舊制嘅人更開心。最後，原來成件事係一場騙局。

https://youtu.be/tee7Ow0O4Qc

相信各位93打後嘅巴絲打都係經歷過DSE洗禮，而且係被逼玩呢個荒謬嘅遊戲。想同大家講，我哋呢班人只係生不逢時，冇得揀嘅情況下去玩呢個新遊戲，但唔代表我哋能力一定差過舊制嘅人。係呢個新制度限制咗我哋好多嘢，失去咗好多舊制學生先有嘅經歷，帶走咗好多我哋對學習嘅興趣。

先唔講DSE每科嘅弊病，DSE本身係將CE AL合併變做一個公開試，意味住只需要考一個試，就可以決定你升學條路係點行。冇錯，係一個試，聽落好似好正，唔駛考兩次喎，而呢個正正就係問題所在。

因為大家都唔需要經過CE篩選，喺334嘅制度下，完成整個高中課程係理所當然嘅事，一齊中六畢業，一齊考DSE，所以一班入面每個人嘅讀書心態都好唔同。日讀夜讀aim神科嘅有、冇目標淨係死讀書嘅又有、日日打機瞓覺頹過嘅又有，總之乜人都有齊。但其實大家都唔知公開試到底係邊回事，發緊夢過高中，淨係知依家大家都有同等機會讀大學，好似有人將大學學位送到埋口，DSE成績只係決定你食唔食到。

相反，喺舊制底下，十幾萬人考CE，最後只有三萬幾人可以考A Level，即係五班人篩淨一班多少少。讀得A level嘅人，先知道有得繼續讀到中七，有得考大學係一件好難得嘅事，並且係靠自己努力先得到。考過CE，正正就經歷咗人生第一個嘅轉折，所以A level人更珍惜讀書機會，留得喺度嘅都會有同一個目標，就係考入大學。而DSE人係好難有呢種鬥智、呢種珍惜，冇咗呢個經歷，到考完DSE先知已經太遲，hea完，出咗成績，回頭一望，一切都已經完咗。

而DSE嘅課程，同埋大學計分方法，徹徹底底埋沒咗好多人才。識得幾個人，佢哋其他科好勁，但語文科一般。一個家底唔錯嘅，覺得DSE太着重必修科，走咗去英國考GCE AL；一個考到Best 5 廿幾分，但中文2咗，只能夠讀Asso；另一個為咗衝4C+2X分，放好多時間落必修科，考得幾條4一兩條5，得水泡科可以揀。點解依家考DSE嘅同A level人有差別？除咗少個經歷之外，四科必修科令到好多人放唔到時間鑽研自己有興趣嘅科目，最後兩頭唔到岸。

// 新高中推出後，中、英、數、通識已經佔去大部分課時，大多數學生在高中階段，只會報讀兩個選修科目。觀乎2018年文憑試的考生數據，一共有70.4%的學生選擇「4+2」的課程組合，選擇報考三個選修科的考生，則只佔17.4%，他們接觸選修科的機會，比舊制為少。一些課程範圍較廣、得分較沒有保證的文科科目，尤其受到威脅。//

加上，教育局又想搞到個DSE唔係一試定生死，特登整埋咩Other Learning Experience，校本評核啲濕鳩嘢，無形咁增加咗學生嘅壓力。考過DSE嘅都知，除非你係勁到打港隊，贏過國際大賽，否則係對升大學冇幫助。大學唔會因為你有玩過乜活動、贏過乜豬肉奬而收你，一切都係睇咗DSE個分先，之後睇你interview表現。而校本評核(SBA)更加為人詬病，因為太多學校，考評局都好難管每間學校點操作SBA。聽過有學校將SBA搞到接近每個月都會有呈分嘅評核，仲有評核前又有模擬評核，根本係折磨緊學生，情況就好似小三TSA嘅操練，搞到學生咁大壓力，試問有邊個仲有心讀呢？

A level課程比DSE深更多，但比起DSE嘅課程更有用。大部分A level啲內容唔單止全面又深入，亦都對大學學科好有幫助，唔似DSE左cut右cut syl，唔鹹唔淡。大學又唔駛專登嘥多一年教，A level學生又可以好快pick up到，點解要硬推DSE呢？

最後，當大部分高官、有錢人，都送仔女出國讀書，或且讀國際學校嘅時候，其實已經睇得出DSE係一場騙局。當局者迷，旁觀者清。屋企有錢就走，無錢就考DSE，或者直接出嚟做嘢。每年都有幾萬人成為呢個荒謬教育制度下嘅犧牲者，失去興趣，變咗讀書機器，未夠十八歲已經搞成咁。你可能會話，香港係咁㗎啦，但係你甘唔甘心你嘅下一代永遠都係咁？我相信大家心中有答案。

考完DSE，其實覺得DSE冇乜嘢，但當你諗返過去，你會發現原來自己失去咗好多寶貴經歷，高中生涯過得好荒謬。你又可能諗返起，以前中學生活幾好，但一提起DSE，就只係有彈冇讚。其實你一早已經知道DSE係騙局，只不過你一早已經麻目咗。

各位巴絲打不妨講下DSE課程內容小弟對呢方面唔係好清楚

我哋每日講 每日聽 每日用中文 都唔知點解又考 外語就話啫
今年得一半人中文達標 可以反映到咩？唔通佢哋唔識講中文？

不過基本語文能力，即係寫實用文，我覺得必需，但絕對唔係DSE考法

香港人 瞓覺第二朝起身返工算 都冇能力改變

以前好多人ce麻麻地，但al發奮都有得追返，dse就無機會喇

機會只留俾有錢人了

AL俾咗好多人翻身機會

中文根本就嘥氣

有時間迫人學學埋埋咁多古文
對呢個社會零生產力
不如叫學生操多啲
邏輯或者理科好過

依家通識比班補習佬搞到班學生成日用乜答題框架 咩神技 違反曬原意

唔明白 中文閱讀卷 同 說話卷 考黎做乜

唔適用於紅底中學

因為al係好近英國個gsc
而且中英只係計半科！跟本pass就得，主要睇AL科

好多人第一次dse麻麻地，但第二次dse發奮都有得追返

又唔算係騙局既
兩個學制都係想分啲勤奮向學既人去入大學
反而覺得4年既大學好過3年
會更加了解自己，可以試多啲野同追尋自己想行既路

但係近幾年好難翻身 真係唔知咩原因

✓但唔代表我哋能力一定差過舊制嘅人
✘而DSE人係好難有呢種鬥智、呢種珍惜，冇咗呢個經歷，到考完DSE先知已經太遲，hea完，出咗成績，回頭一望，一切都已經完咗。
-->原本上到AL個班，比佢地去讀DSE，佢地都會一早努力溫
✓而DSE嘅課程，同埋大學計分方法，徹徹底底埋沒咗好多人才
✓特登整埋咩Other Learning Experience，校本評核啲濕鳩嘢，無形咁增加咗學生嘅壓力。
✘大部分A level啲內容唔單止全面又深入，亦都對大學學科好有幫助
-->真係一啲啲，睇你大學讀咩科
✘你會發現原來自己失去咗好多寶貴經歷
-->中學最寶貴經歷往往係人，而唔係讀書內容