李小龍離世45年 九龍塘故居內部清拆

已故一代武術巨星李小龍上月78歲冥壽，各地fans都有紀念活動。喺香港有院商舉行「李小龍傳奇78載」活動，上映四部以4k復修嘅經典電影，包括：《唐山大兄》、《精武門》、《猛龍過江》同《死亡遊戲》，向宗師致敬。

而李小龍位於九龍塘金巴倫道嘅故居，今日一早見到有4、5名南亞裔工人開工，從屋內將一啲地毯、梳化搬咗出屋外嘅停車場。室內亦傳出敲鑿聲，從搬出嚟嘅雜物中，除咗有傢俱同日用品之外，仲見到有用過嘅避孕套，傳出陣陣霉臭味。問到負責清拆嘅工人，知唔知呢度係「Bruce Lee故居」同清拆幾時開始時，佢哋一概回應「No No No」。到下午2時左右，一輛附有吊臂嘅泥頭車到達，將屋內搬出嘅雜物夾起，放入尾斗內運走。就現場記者所見，故居嘅外牆頗為殘破。

位於九龍塘金巴倫道嘅李小龍故居，自74年起由已故富商余彭年擁有，之後改建用作時鐘酒店。08年余彭年曾經同政府提議，捐出物業興建李小龍紀念館，不過經過兩年商討後，最後都無法達到共識。到余彭年15年去世，雖然遺囑訂明將100億元遺產，當中包括故居呢塊地皮在內，作慈善用途。不過因為余的後人爭產，官司一直拖到今年3月先至完結（相開新聞連結： https://bit.ly/2GiDnVS ）。余嘅後人最終達成協議，遺產及地皮由余彭年慈善基金承繼。


https://hk.entertainment.appledaily.com/enews/realtime/article/20181214/59029829

李小龍故居改建成學府 龍迷歐錦棠：總比拆咗佢好

已故一代武術巨星李小龍，位於九龍塘金巴倫道嘅故居棲鶴小築，自李小龍去世之後，改建用作時鐘酒店。而物業業主為已故富商余彭年，佢遺囑訂明會將100億元遺產，包括上述物業，放入余彭年慈善基金作慈善用途。而基金會總裁、余彭年長孫彭志兵喺上月曾經同傳媒透露李小龍故居嘅動向，佢話會同內地嘅大學合作，將物業改為國學研究中心，不過李小龍生前最愛嘅壁畫會保留，亦都唔會變賣大宅。

身為李小龍忠實fans嘅歐錦棠今日接受電話訪問，對於偶像故居嘅最新動向，佢話都係剛從記者口中得知：「總比遷拆好啦，話晒一個私人物業，要尊重業主權利。我又唔可以話一個非商業發展啦，總之有佢自己發展，作為小龍迷如果佢能夠盡量保存原貌，咁總比好過冇。」阿棠慨歎故居原貌喺做時鐘酒店時，已經破壞好多。

阿棠舉例近停車場位置，有一幅用磁磚砌嘅外牆同水池仔，只係保留到一小部份，佢話：「其實我哋龍迷，比較着重室內。喺入面有一間龍房、龍哥嘅睡房。原本有一條直去到頂、用紙皮石砌嘅柱，已經拆咗。唯一好在嘅有兩呎左右保留係假天花入面，我哋龍迷比較貪心當然想保留番。」阿棠同時提出一個問題，作為一個學府，會唔會公開畀人參觀：「呢個係我concern（關心），如果你公開畀人入去睇下，聊勝於無啦，做得好啲，入面可以有個地方可以簡介下李小龍生平，附有圖片當然係最理想。總比拆咗佢好。」

https://hk.entertainment.appledaily.com/enews/realtime/article/20181214/59030825

用過既避孕套