話說小弟早幾日第二次考電單車路試，地點係天光道，我之前2015年肥過一次，果時就係衰左響斜路八字唔小心車碌上左博失平衡，因為肥左一次都無咩意慾想再考，但係早排屎忽痕又報番考路試，一路等等等卒之等到路試日子來臨。
鑑於我對斜路八字既唔熟悉，同埋隔左幾年無掂過電單車，所以響考之前我特登比左錢操左一次師傅帶，自己操又操左幾堂，主要都係想練番好斜路八字同行番熟兩條考試路線，咁練既過程都算順利，自己都有番一定把握pass到。
好啦終於到左考路試日子，地點都係天光道，時間係11點零左右，天朗氣清車又唔算太多，係一個拎牌既大好機會。咁11點鬆就去左駕校拎車之後就同學院師傅一齊渣架車上考試中心報到。
我記得第一次考係考常興線，而今次就係試場右轉行嘉齡線。其實考果陣試場出面兩條線都泊左好多校巴同死車響一邊，視線受阻，所以我都好小心咁碌出少少等待合適時機先出車轉右，對面線都泊滿左一堆死車，不過我有理無理等兩邊無車行我先轉右之後檸一檸個頭就照行，過程一路都好順利，之後一路碌到去左轉入石鼓街考斜路停車開車，我終於出事。
樓埋一邊斜路停車後，我準備打燈望左望右前面後面都無車行，我就行車渣番出條線準備碌上少少右轉入敬德街打八字，但當我抽左架車出黎，我已經輸撚左。
講番少少當時既路面環境先，我自己條線就暢通無阻既，反而對頭線有架5.5貨車泊左係度，而響架貨車後面，竟然匿埋左架van仔學車！
當時我係無留意到呢架車的。咁考過呢條線既人都知，因為要準備轉右邊，所以會將架車靠右少少行既。我認自己係心急既，抽出黎既同時，忽然見到有架車響貨車後面抽頭出黎，無錯車頭中間貼住個學字，果刻我響度諗，點解響呢個考試時間會有學車出現係呢條街呢？成個場面勁尷尬，首先我出左黎條路線，架學神又抽左出黎，騎住左兩條線擺正響條路中間，大家都停低左響度對望，而學神係條女黎，然後考牌官響我後面，時間好似停左咁。
呢次仆街啦我行又死唔行又死，行既話去番左邊我又驚會話太接近物體，最尾我都係無行。等左一陣，學神架車後面有架七人車行過，佢先繞過學神然後再響我面前行過，之後考牌官終於忍唔住開聲話我：呀同學，你架車泊係度塞住晒條路喎
果刻我明白，自己真係玩撚完了，點解個天要比我遇到個學神 雖然都知自己肥撚左，但係我有體育精神要繼續完成埋餘下既路試佢，全程無落金右，無失平衡，連最驚既八字都順利打到，就係輸左比個天。
返到試場拎成績，無意外係肥撚左既，我好想屌人之餘都想尋求少少安慰，點解明知11點幾考試時間你明明係學車都仲駛入考試路線？我應該屌個學神定屌個教車師傅好？就係你因爲你偷雞入黎練習而搞到我衰左，雖然我心急都要負番一定既責任，但係如果考果陣，呢架學車無出現既，結果係咪會改寫呢？我敢講成程只係衰左響呢個位咋
肥左唔可怕，排期排到下年10月先考先得人驚，等咁耐到時我咩都生疏晒了。
大家下次有機會考牌果陣，記得一定要留意有無學車呀，唔好好似我咁衰左響學神手上，而學車既朋友當你地想偷雞入試場行果陣，諗下會唔會影響到其他考緊試既人，正如你考緊路試都唔想比人阻到你呀係咪？
