祖雲達斯喺意甲打吡擊敗國際米蘭,聯賽帶出成條街,亦令祖記成為歐洲5大聯賽失分最少球隊。講到表現最出色球員,好多人認為C朗開季交出好表現,應記首功,但數據話畀大家知,其實表現最好係克羅地亞射手文迪蘇傑。
呢位32歲前鋒不單係C朗喺前線嘅最佳拍檔,佢更係真正嘅大賽球員,數番祖記對意甲2至5名嘅4支球隊,分別係拿玻里、國際米蘭、AC米蘭同拉素,文迪蘇傑喺呢4場賽事入咗5球,場場都有士哥,係真正嘅強隊專用射手。
C朗開季攻入10球,係隊中首席射手,文迪蘇傑亦攻入7球,講到重要性,文迪蘇傑嘅入波都唔低得過C朗,祖記有兩大射手在陣,橫掃意甲冇問題啦。