呢一系列嘅post就係希望同各位理性討論究竟佢啲詞差係邊，又好係邊
正視歌詞質量，你我有責
btw垃圾分析，學術討論
唔好提老母，屌得細力啲
第一首，《龍舌蘭》
歌詞將第三者比喻為龍舌蘭，因為唔係普遍會搵/飲，但有人會用佢黎尋求刺激同快感。場景應該係發生係歌者買醉同攤牌嘅時候，描述緊對第三者嘅愧疚。
逐句分析：
//誰被灌醉 前面多少杯 都呑了 我們沒有罪
被挖取 遺下一顆心 枯乾到 以為沒眼淚
得不到蒼天允許 我與你多少次散聚//
第一句係講緊用買醉黎說服自己出軌「沒有罪」、自欺欺人，推測被灌醉嘅人係歌者。
第二句形容緊攤牌令佢心痛到好似「被挖取」同「枯乾」咁，而且以為本來自己可以好灑脫，唔會喊。
第三句係揭示主題，講緊佢之所以會有以上反應係因為有一段不被世人同意嘅關係。
//我 猶疑地望向你
天花將剝落誓言 床驟變荒地
酒精再滲入淚痕 沉默到對不起
這一雙手卑鄙到 抱住你//
第一句係講緊無勇氣同第三者攤牌而「猶疑地望向你」。
第二句係指同第三者之間嘅所有誓言同有過嘅時光都已經過去、作廢。我個人幾欣賞，因為好有畫面感，用天花剝落同荒地去形容一切都係攤牌一刻完結、成為過去。
第三句係翻去買醉嘅畫面，講緊歌者好愧疚，對著第三者咩都講唔出。個人覺得雖然「沉默到對不起」係唔合邏輯，但理解到，所以算啦。
第四句都係講緊好愧疚，同埋其實好唔捨得呢段關係完結，所以仲夠膽死係攤牌果陣「卑鄙」地攬住第三者。
//還未看開 還在等花開 請相信 我們是意外
好不好率先節哀 我與你將遭到殺害//
第一句歌者開始理性返，勸第三者睇開啲，我覺得呢句個語氣係有少少不耐煩，好似係話「你醒下啦，我地無可能㗎啦」。
第二句就係講緊佢哋嘅關係會完結，但呢句真係寫得幾差，因為語調好串，似係對敵人先會用嘅字眼「洗唔洗唔開心定先啊」。而且佢地之間唔係被殺害，而係男主一手造成，無人要分開佢哋，係男主角自己覺得唔可以再咁落去所以先攤牌。就算殺害者係講緊原配，係指原配發現左，但決定權都係係歌者度，所以係解唔通嘅。
//我 猶疑地望向你 天花將剝落誓言 床驟變荒地
酒精再滲入淚痕 沉默到對不起
這一雙手卑鄙到 可將你放於舌上純熟地讚美
當天一光 終於要抉擇 便放棄//
第一二句同上
第三句係講緊對第三者嘅心態只係一啖可以被品賞讚美嘅龍舌蘭，説明第三者只係用黎洩欲，尋求刺激嘅工具。
第四句就係寫一夜激情之後、清醒左、要面對抉擇嘅時候，就會放棄第三者。
//我 無名份送給你 委身於災難現場 誰沒有準備
即使再過萬萬年 還是說對不起
這一雙手始終會 放下你
你知不知你是 禁忌//
第一句都係形容歌者對第三者嘅愧疚，表達依家突如其來嘅局面無人想。「誰沒有準備」呢句又係唔通順、邏輯failed。雖然知道佢想講嘅係「誰有準備去委身於災難現場」，但歌詞字面解唔係咁。
第二句係講對第三者會內疚一世。
第三句講歌者點都係唔會揀同第三者一齊。
第四句就係提醒第三者，佢嘅存在係一種禁忌，佢地嘅關係無可能持續落去。但我唔係咁欣賞呢句，因為第三者點會唔知，聽落有D夾硬同多餘，唔多符合劇情。
總結，呢首歌嘅歌詞有畫面感，比喻合理，內容大致通順，偶有語調用詞錯配。B+
只要改左「好不好率先節哀 我與你將遭到殺害」、「委身於災難現場 誰沒有準備 」同「你知不知你是 禁忌」呢三句，有機會坐A-望A。
猶豫