風褸 —— IT professional 的象徵

Geoffrey似我 · 2018-11-24T13:32:01+08:00

如同西裝係金融狗嘅象徵一樣，風褸同IT professional 之間有不可忽視嘅羈絆，係天作之合。我對風褸嘅印象要由中學講起，中學嘅時候projector用唔到，Miss一定會call樓下嘅IT哥哥。每一次，不出半分鐘，IT哥哥就會著住一件黑色嘅風褸如影而至，我每一次見到，心裏面就會泛起無盡嘅崇拜。風褸磨擦力極低，IT哥哥可以漠視空氣阻力，用最快嘅速度跑樓梯，第一時間趕到案發現場。其次，風褸彈性高，IT哥哥舉高隻手reboot projector嘅時候完全無後顧之憂，可以心無旁騖咁整部projector！無錯，IT哥哥身上嘅風褸係佢嘅利器、係佢經過深思熟慮先披上身嘅戰袍。但係絕大部分人都察覺唔到，以為風褸係攞嚟懶型。我果陣以為佢地好天真，但係誓估唔到，天真果個人原來係我！風褸嘅真正效用，要到我讀完大學踏出社會做嘢先知，其實風褸遠遠唔止我以為嘅咁簡單。其一，風褸檔風保暖，坐office一年四季都啱着，特別係入server房嘅時候，冷氣機吹到轟轟聲，西裝友打曬冷震嘅時候，IT professionals 可以依靠身上嘅風褸，專心一致咁起server，冷眼恥笑身邊嘅西裝友。其二，風褸隔味，身為IT professional，成日OT，身上總不免有一浸毒有嘅汗味，依個時候，只要拉埋拉鍊，就可以完全隔絕氣味嘅流出。就算四日唔沖涼都絕對唔會有任何問題。其三，風褸多袋，作為專業嘅IT人士，身上一定要帶住唔同類型嘅電子器材。要裝OS，直接由風褸嘅暗格攞隻手指出嚟plug落去，行雲流水，好似寶劍出鞘一樣。我啱做嘢嘅時候着住件冷衫番工，好似完全融入唔到同事嘅圈子，至到有一日我發現問題所在，忍唔住去Nike買咗件風褸，成個世界都唔同曬。搭地鐵嘅時候一睇，就知邊啲係自己友，我地會互相點頭微笑，無言之中表達出惜英雄重英雄嘅情懷。睇落普通嘅一件風褸，其實蘊藏住無數嘅寶藏，就如同IT professional 一樣！如果你仲讀緊大學想做IT professional，我勸你及早買定幾件風褸。屋企冇三五件風褸唔好同人講你係讀IT。係咁多。