當年既嗰個人 你仲記唔記得佢個名 佢個樣
如果有機會 你又會唔會想見返佢呢?
以下我講下我同佢既一啲故事 可能會有啲亂 希望大家見諒
「初遇」
依稀既印象 當時我係小學三年級 而佢係小學五年級
小學嗰時 住既地方同學校有啲距離 咁有校巴接送既
當時由屋企行過去等校巴
見前面有個皮膚白既一個人著住我學校既男校服
(細個唔知點解覺得皮膚白就係女仔 個一下心諗點解有女仔著男校服
![](https://cdn.lihkg.com/assets/faces/normal/clown.gif)
以前 都係自己一個人去等校巴 突然有個同校既人一齊等校巴 就對佢有啲在意
去到等校巴既地方 佢見到我就主動同我講野 個一下我先知佢係男仔 佢問我係咪係度等車 佢話自己係轉校生 乜都唔知 跟住就答下佢咁
呢個就係第一次見 第一次既對話
「交流」
我同佢 係唔同級 自然地都唔會有太多既接觸
小息 佢會同其他男仔玩 由於佢外貌不錯 運動健將 引左唔少既女仔注意
我同佢既交流 只限於等校巴同返屋企個段路
我個人比較被動 所以佢係主動咁不斷(了)我講野
係嗰2年裡面 佢會間唔中整蠱下我 又問我有冇玩電腦遊戲
去到最後佢係比埋佢屋企電話我(但我只係打左兩次 都係傾左一陣咁)
「五元故事」
有一日 落左樓就見到佢係草叢度搵緊野 就走過去問佢做咩事 佢話佢掉左5蚊 叫我幫手搵 我就幫佢一齊搵 搵左十分鐘左右
我就話 搵曬啦喎都唔見有 校車都應該差唔多黎架啦 不如行啦 返黎先再睇啦
佢就話搵多陣阿 校車會等一陣既
我就陪佢再搵多陣
佢:算啦 我地都係快啲過去等校巴啦
-去到其他等校巴既人(其他學校)都冇曬 -
我:校巴應該走左啦 其他人都唔係度
佢:等多陣
過左幾分鐘
佢:我地行路返學校阿
我:下 呢度搭小巴落去都要10分鐘 行路會唔會遲到架
佢:跟我行啦 好快返到學校 不過危險啲
咁就跟佢行 越過大馬路 行水渠(?)隔離既樓梯
水渠隔離既樓梯 好高下既 當時細粒既我 好難行落去
佢就拖住我隻手行 一行完就放手
問我點阿 係咪好辛苦 睇下學校係前面咋 我地就到
「過後」
之後 有幾次放學 佢會話我送你到你屋企阿 我問佢點解要送我返屋企阿 佢就話我睇下你屋企係點囉 每次望住我入去 佢就走 嗰時既我 我覺得佢好奇怪
「去到佢就畢業」
佢就冇乜同我講野 我心裡面諗點解佢唔同我講野既 但佢係學校 都好似冇變咁 小息會同其他人傾計 玩
我開始唔慣冇左一個人係我身邊不斷同我講野
「佢畢業既暑假」
直到有一日 有個女仔打電話問我 提起佢個名 問我有冇佢既電話 我問做咩會打黎問我既
嗰女仔:你係佢最親最fd既異性朋友 佢對我地班女仔都不瞅不睬 淨係同你講野既
我再問嗰女仔 點解要佢電話既
嗰女仔:你唔知咩 聽人講佢去左另一區升學喎
我就開始諗 以前同佢既經歷 到佢後期唔同我講野
我個心就有啲痛 人地覺得我同你之間係咁fd 但我就一無所知 個刻我就知道我對佢有中意既感覺
小學到依家 都隔左十年有多
都好希望有機會再見一次
問下佢個時點解唔同我講佢會走又好 問下佢依家點又好
因為個下就好似不辭而別咁
唔知你地既故事又點呢?