[資料片] 由比利時嘅斷掌朱古力講起[資料片]

到咗1815年
英國佬喺維也納會議由荷蘭佬手上攞到開普殖民地後
佢開始喺南非逐步廢除奴隸制
嗰時啲波爾人多數都係開農場嘅(有名你叫啦)
解放咗黑奴嘅話搵阿水嚟做嘢呀
所以喺1834年
當開普殖民地政府完全廢止奴隸制後
大批波爾人由開普殖民地遷徙到嗰兩條河附近嘅城鎮
逐步建立起自己嘅政治制度
最後佢地喺1854年來成立咗奧蘭治自由邦(Orange Free State)
跟住喺兩年後成立咗德蘭士瓦共和國(Transvaal Republic, Transvaal解橫越瓦爾河)

奧蘭治河流域係全南非土地最肥沃嘅地區
波爾人靠啲奴隸喺嗰度開墾
種吓小麥養吓牛咁都叫搵到啲錢
日子都過得唔錯㗎
不過本身住喺呢兩個國家東邊嘅祖魯王國呢
就對呢班新鄰居相當唔滿意喇
奴役佢地啲黑鬼同胞事小
霸咗佢地撻靚地事大呀
所以波爾人同祖魯人之間成日都有武裝衝突
為求自保
差唔多每個成年波爾男人都會有槍同馬嘅
慢慢佢地發展出尚武嘅文化
閒時啲聚會都會燒吓槍呀咁
另外當時普遍嘅槍都仲未有彈匣
即係要射完入子彈再射
佢地知道無論係打獵定打人
都只係得一次機會
所以波爾人普遍都係騎術，埋伏同狙擊嘅高手

不過喺1860年代開始
祖魯人嘅侵擾變得越嚟越頻密同有規模
波爾人開始頂唔順
隨時有滅國嘅可能
英國佬亦都擔心冇咗波爾人嘅牽制
祖魯王國會變得過於強大
於是向波爾人提議共同對抗祖魯人
條件係要佢地接受英國嘅管治
雖然當初波爾人就係因為唔鐘意畀英國佬管
先山長水遠咁走難嚟呢度
不過兩害取其輕下
冇性格就冇性格啦
喺1877年波爾人決定食回頭草
接受咗英國佬提出嘅合拼方案喇
英國亦都履行承諾
喺1879年1月11日對祖魯王國宣戰


明珠台間唔中都會重播返
都相當熱血吓嘅

(花絮)
介紹番
呢個法國o靚仔當年背負住家族嘅名譽
走去參與呢場英國嘅殖民戰爭
喺執行一次巡邏任務期間
因為到咗食晏時間
佢力排眾議
選擇喺一條荒廢咗嘅祖魯人村落度
坐低休息同煲咖啡
結果畀祖魯人發現咗
佢嘅隊員立刻四散
而佢想騎馬走時就畀隻馬抛咗落地
最後趕到嚟嘅祖魯人
就用長矛喺佢身上拮咗18個窿

佢個名叫拿破崙‧歐仁·波拿巴
拿破崙三世唯一個仔
波拿巴主義者復辟嘅最後希望
作為戰神拿破崙個侄孫
死喺戰場上都算死得其所嘅...

祖魯戰爭同一般英國對土著嘅殖民戰爭一樣
一波又一波堅毅勇敢嘅祖魯戰士
仲有佢地支長矛同牛皮盾牌
都喺炮彈同格靈機槍嘅轟擊底下變成碎片
場仗用咗唔夠半年就搞掂
1879年7月4日祖魯王國嘅首都陷落
祖魯王國正式拼入南非聯邦
加埋已經臣服嘅波爾人
英國終於完成咗喺非洲大陸南端嘅部署喇 ..

波爾人：...你就想喇

http://bit.ly/2iwXseK
https://youtu.be/piMrYMq6bkA
Gatling Gun

你可以話波爾人食回頭草好冇性格
甚至可以話佢地食完回頭草再過橋抽板好仆街
但係呢個正正就係小國嘅生存之道
1880年12月16日
波爾人趁大部分駐南非英軍撤回英國之際
同時突襲分散喺德蘭士瓦共和國境內嘅英軍
呢班耕田佬
憑住咁多年來累積落嚟嘅野戰經驗
成功重創大批英國職業軍人
連英軍喺南非嘅總指揮官都陣亡埋

英國佬當然嬲到仆街啦
不過一諗起啱啱先同祖魯人打完
而家又要勞師動眾調動軍隊返去鎮壓
而得到嘅就只係呢內陸爛地
條數計唔掂喎
況且佢地都係想自己管自己啫
我畀個優厚啲嘅自治權佢
等兜友喺撻爛地度自生自滅
嗰度冇資源又冇出海口
遲早自己頂唔順㗎
到時先收佢地皮就慳水慳力啦
於是喺1881年8月3日
英國同波爾人簽署比勒陀利亞和約
波爾人得到全面嘅自治權
同時承認英女王為名義君主
而英國就保留番個外交權
兩國從此就相安無事和氣生財喇
...睇你兜友點死

英國佬嘅判斷其實係好正確
撻爛地真係唔值得花咁多資源去爭嘅
不過如果撻爛地下面有金呢
就唔同咁講法喇
喺1885年德蘭士瓦共和國境內發現一個巨大嘅金礦
從此波爾人就走上暴發戶之路喇

追左成個星期

推一推先

咁快完 以為仲有

留名

當故仔咁睇又幾好睇

orange river 係name after house of orange-nassau 入面個william v prince of orange

orange river 係name after house of orange-nassau 入面個william v prince of orange

lm

大家好
歡迎嚟到本資料片
喺呢到我會簡單講吓第二次波爾戰爭初期
英軍同波爾軍隊之間嘅分別

自維多利亞女王登基以嚟
英國憑藉強大嘅工業力量
建立起絕對優勢嘅海上霸權
佢嘅軍隊
可以隨佢嘅意願投放到世上每一處地方
無論係遠東嘅大清帝國
克里米亞戰爭時嘅沙俄
以至印度同非洲各土著王國
都要屈服喺大英帝國嘅綜合國力之下
呢段時期就係舉世無雙,無可匹敵嘅維多利亞治世
Pax Britannica喇

但正所謂生於憂患死於安樂
無敵除咗係最寂寞之外
仲好危險㖭
英國不嬲都係以海軍為主
陸軍表現真係非常一般般
通常贏都係贏喺軍備上先進過人啫
但係啲軍官嘅思想就跟唔上科技嘅進步喇
嗰時佢地都仲係崇尚整齊嘅戰列
同一致嘅射擊
對個別士兵嘅射擊技巧要求唔係好高
訓練亦都唔足夠
平均每個士兵一年先用得兩百發子彈做射擊訓練
一日一槍都唔夠
但係隨住槍械技術嘅改進
射擊嘅準繩度得到大幅提高
戰局就越嚟越依靠個別士兵嘅射擊能力
單兵埋伏狙擊亦變得可行
交戰雙方再冇可能會企定定喺度激情互射㗎喇

因為英國當時面對嘅
多數都係啲三流嘅土著民兵
出半力都夠贏有突啦
所以英軍高層冇意識到呢樣係一個問題
但喺第一次波爾戰爭
佢地面對嘅再唔係揸長矛嘅土著
而係揸來福槍嘅波爾人
英國陸軍指揮混亂,訓練不足,戰術落伍嘅缺點就表露無遺喇
只係因為嗰次衝突個範圍太細
先冇太大嘅反響
改革嘅事就不了了之
不過今次係同波爾人全面開戰
無論作戰範圍同規模都比上次大好多
而經過詹臣遠征後
波爾人嘅武器裝備得到進一步嘅提升
佢地將會教識英軍班古老石山
咩嘢叫現代戰爭

而家我會約略講一場典型英軍對波爾人嘅戰役
呢場仗喺英國被稱為“Black Week”嘅高潮
個人認為都相當富娛樂性

1899年10月11日波爾人正式向開普殖民地宣戰
當時英國嘅駐軍係分散喺幾個主要嘅城市
波爾人嘅計劃係用最快嘅速度
派兵圍攻開普殖民地北部各個英軍據點
並且截斷哂各個城市對外嘅交通
等啲英國佬彈盡糧絕自己投降
喺戰事初期呢個策略非常奏效
宣戰後一個星期左右
成個開普殖民地北部嘅英軍都被孤立喺各自嘅據點度
每次嘅突圍都畀波爾人新買番嚟嘅法國制巨炮打番轉頭
又或者畀德國產冇煙嘅毛瑟步槍狙擊
英軍完全處於被動
開普殖民地嘅形勢相當險峻


法國制巨炮"LONG TOM"射程有九公里
啲波爾人買咗四支
本來用嚟保衛德蘭士瓦共和國嘅首都比勒陀利亞嘅
不過後來攞咗嚟做攻城炮
之後比勒陀利亞被英軍圍城時因為冇咗呢啲巨炮防衛
波爾人就畀英國佬不費吹灰之力咁收服咗個首都喇

見到唔對路後
英國喺1899年10月20日
委任德高望重嘅布勒上將(Redvers Buller)做總司令
帶領五萬大軍趕去南非增援
當中包括陸軍元帥羅伯斯伯爵(Lord Roberts)個獨子腓特力
去跟呢位世叔怕學嘢
佢地喺11月頭去到開普敦
喺了解過個情況之後
布勒上將將佢呢支大軍分成三份
左路16000人負責解救鑽石重鎮金伯利
中路3000人進攻昆士敦附近嘅鐵路交滙點
而佢自己就帶領21000人同世侄腓特力去東邊為雷地史密斯解圍喇


布勒上將(Redvers Buller)


(Sorry唔係好識電腦嘢,呢個係用小畫家畫架咋 )

呢三路人馬差唔多喺同一時間(12月中左右)到達佢地嘅目的地
唔知係過份自信吖定係心急想快啲搞掂過聖誕呢
中路同左路大軍嘅統帥都係冇做好偵測嘅情況下發動攻擊
結果佢地分別喺10號同11號慘敗
兩日嚟英軍死傷加埋被俘同失蹤嘅
差唔多冇咗成1800人
喺收到兩邊戰線嘅情況後
布勒上將為咗加快收復雷地史密斯以穩定局勢(同補鑊)
決定直接攻打由四千幾波爾人防守
通往雷地史密斯必經之路嘅科蘭索村(Colenso)
呢場就係著名嘅科蘭索戰役喇(Battle of Colenso)

科蘭索村位於圖蓋拉河嘅南岸
呢條河水深河面濶
除咗村附近有兩處淺灘外
其他地方係冇可能就咁涉水過河嘅
而唯一一條可以過到大型火炮嘅橋
就係喺科蘭索村入面
要同雷地史密斯就要過呢條河
而要過河嘅話就只有先攻陷條村
喺布勒上將呢個受傳統軍事訓練嘅軍官心目中
呢場會係一場好典型嘅據點爭奪戰
正常嚟講啲波爾人會喺條村度固守
作為一個個久經沙場嘅戰術高手
區區幾千嘅烏合之眾佢跟本唔會放在眼內
所以佢冇派先遣部隊去偵測當地形勢
以致當佢喺12月13日去到科蘭索村南面駐紮時
佢手頭上只有啲好簡單由炮兵即場畫嘅地形草圖
連嗰兩處淺灘嘅正確位置都唔係好清楚...
...唉唔理喇同我開炮炸平條村先講啦
於是就開始咗歷時兩日嘅炮擊喇

但係波爾人並冇受過傳統軍事訓練
佢地跟本就唔喺條村度
而係一早就分為六七個小隊(圖中藍點)
分別喺河嘅北岸山頭掘好戰壕同大炮陣地
用地形同各式各樣嘅偽裝去隱藏呢啲據點
佢地甚至搵啲鐵皮搭咗啲假嘅大炮
擺喺遠離佢地真正據點嘅地方去吸引英軍炮火
呢啲咁創新嘅防守策略
完全出乎布勒上將嘅意料之外
英軍嗰兩日嘅炮擊基本上係毫無用處

到咗15號清晨5點
布勒上將認為時機成熟下令進攻
首先喺炮火嘅掩護下
指揮官哈特少將帶領四個步兵團
大概四千人組成嘅左路(圖中1)
排成一個個整齊嘅縱隊
向科蘭索村西面嘅淺灘推進
試圖由嗰度過河包抄科蘭索村
而對岸山上嘅波爾人忍受住炮擊(雖然冇乜威脅)
慢慢等英軍進入佢地嘅射程範圍

佢地嘅指揮官本來諗住等英軍過河嗰時先開火嘅
不過當啲英軍進入河套區域(圖中X)嘅時候
突然間好似蕩失咗路咁唔知點行
原來因為無做好偵察
啲英軍搵唔到過河嘅淺灘
哈特少將又要佢地四周圍搵吓邊度過到河
一時之間大軍冇咗方向
一堆堆英軍好整齊咁係三面環水，無遮無掩嘅平地度
一時向東一時向西咁行
見到咁搞笑嘅情況唔開槍都對自己唔住啦
就係咁喺河套對岸三面埋伏嘅波爾人
就好有默契咁一齊開火
而嗰堆英軍就係咁樣一路承受三面環迴立體嘅槍擊同炮火
一路搵嗰個過到河嘅淺灘
到後來大部分左路嘅英軍都抵受唔住
掉低受咗傷嘅同袍自己撤退

喺嗰朝早成個河套區域變咗做屠宰英軍嘅屠場
啲英軍好似活靶咁
畀班Rambo練咗成朝靶
四千幾人嘅軍團連正式交鋒嘅機會都冇
就損失咗六百幾人
而波爾人只係付出咗五個人嘅代價
相信喺戰爭史上都好少有咁搞笑嘅差距


呢幅圖係由上面幅圖左邊藍色圈個地方向南影過去
左邊遠處嗰堆係科蘭索村,右邊就係嗰個河套

而中路方面(圖中2)亦同樣充滿娛樂性
呢一路由希爾德少將(Henry Hildyard)統領嘅主力
為數有四個步兵團，一個輕騎兵團
同兩個由朗上校(Colonel Long)帶領共有12支炮嘅炮兵連
總共6000人左右喺清晨六點左右進軍科蘭索村
一般嘅做法係步兵先入村清場，騎兵掩護側翼，炮兵殿後
好正常吖
波爾人都係咁諗
佢地本來都係諗住當英軍步兵入村後就係對面岸炮轟條村
不過當波爾人將領博塔將軍(Louis Botha)再望清楚啲嗰時
佢睇到眼都突埋
...班英國佬儍咗呀搵啲炮兵嚟打頭陣嘅
嗰兩個炮兵連
帶住十二架裝住大炮同彈藥嘅牛車
逐架逐架咁駛入波爾軍狙擊手同榴彈炮嘅射程範圍
再大模斯樣咁開始裝炮同上彈
完全無察覺到佢地已經畀三面包圍
而最近佢地嘅英軍步兵喺差唔多兩公里外...