【網戀騙案(二)】憧憬跟美國鐵路工程師結婚 「準新娘」辭工諗住移民

「我哋識咗一年，佢從來冇講過錢，我唔信佢呃我！」同樣墮入網上情緣騙局的Jenny，年約60歲，與丈夫離婚20多年，獨力撫養兩名兒子成人，一直未有再婚。去年8月在網上認識一名美國單身男Walker Smith，他自稱56歲，妻子已過身10多年，獨自在美國芝加哥生活，為鐵路工程師，工作需要四圍飛，到不同國家維修鐵路。

不諳英語的她，以簡單英文在手機App Hangouts跟Smith溝通，「每日傾20至30分鐘，我哋每日會互相噓寒問暖，關心吓工作辛唔辛苦呀、問吓對方返到屋企未呀，佢仲話我好善良，心地好，仲叫我做My Love(我的愛人)、My wife(我的老婆)。」她也喜歡Smith是好好先生，每日作息很有規律，「每朝5時起身上班，放工會回家煮飯，假期會返教會。」令她感到有安全感。

數月前，Smith突然說8月底來港跟她見面，並計劃與她在港註冊結婚，之後一起搬回芝加哥生活。Jenny有感下半生能找到個伴，高興不已，更索性辭去原有的文職工作，但結婚一事未有告之兩名兒子，「等Smith真係嚟到先同講。」來港前，Smith更將在網上購買機票的單據發給她，列明他會乘坐長榮航空航班，由芝加哥經台灣轉機至香港，更說好他抵達台北機場後會發短訊給她，好讓她到香港機場接機。

不料，Jenny卻收到他聲稱在台北被海關扣查的訊息：「話喺佢行李搜出10萬美元現金，同埋一隻價值10萬美元嘅鑽戒，懷疑佢洗黑錢，於是扣查佢，要罰15,500美元，即120,900港元，才放走佢。」對方還解釋，該隻鑽戒是買來跟Jenny求婚用的。

惟對方要求她將罰款電匯至印尼一個銀行戶口，開始令Jenny感不妥，「對方說唔可以畀現金，一定要匯錢。」 此外，Smith稱當地關員不准他講電話，但卻容許他傳訊息；翌日，Smith說自己被帶離機場，坐一輛豐田牌的政府麵包車到一幢大廈，被送入一個房間，內有單人床、桌椅和電腦，「被扣押2日後，佢個電話弄濕壞了，但可用桌上電腦上網，更說有個外國人也有同樣遭遇，但其家人匯錢後，便立即獲釋放。佢知我冇錢，就叫我搵其他人幫忙。」

Jenny於是向美國駐台北領事館求助，但對方着她報警，她遂致電台北警局報警，但警方指因涉及外國人，着她向外事科警察局求助；她只好向台灣移民署查詢，該署說會處理，但至今仍未知結果。

「佢最近話正發高燒，但唔敢睇佢哋嘅醫生、食佢哋嘅藥，擔心會毒死佢。」擔心不已的Jenny對Smith仍深信不疑：「我都有睇過報紙的網上情緣騙案，100單可能有99單係騙案，但仲有一單係真嘅。」不過她稱絕不會匯錢，反而正考慮親自到台灣找他，若最終證據是一場騙局，她也說沒有損失，「我冇畀過一分一毫，(至於感情損失？)咪當冇咗一個伴。」

佢又蠢唔晒

我覺得最on9唔係啲深信不疑到最後比人呃嘅人
而係明知同騙案咁相似但都覺得佢係真心嘅人

「話喺佢行李搜出10萬美元現金，同埋一隻價值10萬美元嘅鑽戒，懷疑佢洗黑錢，於是扣查佢，要罰15,500美元，即120,900港元，才放走佢。


最多都係充供哂既姐 仲要罰款真係得啖笑

不過都蠢唔哂 見唔到真人唔磅水

男人被女人呃——-自己咸濕，自己照下鏡先
女人被男人呃———男人都係信唔過，男人唔可靠