)
MK-Pop始祖E-kids解散10年再合體，兼且兌現承諾開騷，倒數6日就到大日子，E-kids三子Tommy（阮民安）、Tim（郁禮賢）、Alan（林詠倫）都四出宣傳。
去年8月，三子已經透露風聲為復出鋪路，更遠赴日本錄歌好有誠意咁款。原來真係有新歌，今日有得聽啦，歌名係乜呢？真係唔知，有歌聽冇歌名，唔知咩玩法。新歌行輕快風格，歌詞圍繞E-kids自嘲，由「樂壇小強」Tommy作曲同監製、林敏驄填詞、featuring少爺占。Tommy呼籲歌迷趕在開騷前聽熟新歌，仲留言：「隔左（咗）14年，我地（哋）原班人馬嘅新歌終於可以發佈，希望大家多多支持及大力分享出去！！感謝！！編曲、mixing、錄音全部日本制作、真係好有誠意架（㗎）」。
網民聽過之後，意見當然有又讚有彈。忠實歌迷二話不說就開心些牙新歌，幫手宣傳。對於E-kids新歌成首都以假音、高音演繹，有網民覺得聲線似曾相識，十足曾志偉把聲，仲問究竟係唔係志偉主唱。幫手管理E-kids面書專頁的管理員都好玩得，回覆網民「 其實係米奇老鼠！」聽完新歌，Feel唔Feel到揼本去日本錄音的價值所在？凡人未必聽得透，見E-kids咁有誠意，總算有心。
