藝人譚俊彥前日傍晚時分再度添丁，其內地演員太太任祉妍誕下7磅9安士男丁，取名譚杺，Shaun本來已有一名兩歲多的女兒譚晴，湊成一個「好」字，再度榮升爺爺的狄龍趕往探望乖孫，三代同堂，樂也融融！
榮升第二任爸爸不足24小時的Shaun，昨日被發現與朱晨麗當街咀嘴，莫非咁快就背妻曳曳？其實他最近為賺奶粉錢忙爆，趕拍無綫新劇《特技人》之餘又要照顧太太，心情混亂，猶如「精神分裂」！昨日上午11時他就與朱朱拍攝咀戲，劇情講述兩人戀情剛萌芽，Shaun捉住朱朱手仔表白，兩人輕輕錫了一下後深情對望，再肉緊攬腰摸臉激咀，為拍攝不同角度的鏡頭，足足咀了七次！他們咀嘴後照舊有講有笑，又不停對稿，絲毫沒有尷尬。
朱朱受訪時直言在此時此刻與Shaun拍親熱戲，感到非常內疚：「覺得好對唔住佢太太同囝囝呀！所以我都真係喊出嚟！」Shaun則安慰她指大家都是專業演員，毋須介懷。Shaun在劇中艷福不淺，既有前妻沈卓盈，其後又與朱朱發展感情線，與兩人均有咀戲，問到可擔心太太打爛醋埕？他笑說：「佢話以後如果佢拍戲，會雙倍奉還畀我！」雖然飾演情侶，但朱朱笑言覺得Shaun似自己爸爸，絕不會傳緋聞：「佢當我女咁教，第一日開工放飯嗰陣，我拎起個電話碌咗幾吓，佢就話食飯唔好玩電話，咁我唔玩啦，佢又話食飯唔好寒背，佢真係一個好爸爸！」
