黃百鳴旗下嘅天馬電影公司,噚晚喺灣仔君悅酒店舉行周年晚宴,吳千語、任達華、張晉、朱茵夫婦、劉心悠都有出席。
吳千語講到近日喺北京拍電影《古劍奇譚2》,合作嘅有王力宏同高以翔,而同身高1.95米嘅高以翔有好多對手戲,千語BB話:「同佢拍對手戲,次次都好似望住佢下巴講對白,唔可以眼望眼,感覺好奇怪。」
千語又話戲入面飾演一位仙女,所以成日要吊威吔飛來飛去,但由於衣衫單薄,喺北京-10度嘅氣溫下拍攝,好似着住比堅尼開工咁。講到北京霧霾,千語話:「開工時因為化咗妝,唔可以戴口罩,不過工作人員個個都有戴,有啲個口罩入面有把風扇。每次拍完戲返酒店,啲鼻涕都係黑色,仲有啲血。」不過佢話唔想男友林峯擔心,所以冇同佢講。男友近日喺橫店開工,各有各忙所以兩個月至見到一次,好彩夾啱新年可以一齊過。