入咗中大嘅新鮮人埋黎睇睇！

叫我元朗胡力威 2018-08-06 22:22:18

1. 序

大家好，話咁快就到一年一度嘅Jupas放榜，入到中大嘅你除左開心之餘，唔好唔記得你仲要揀書院！放榜之後嘅第二日（7/8）會有Orientation Day（即係O day），到時眾fm建議黎認識下各書院！（會喺唔同時段由唔同書院嘅介紹，亦設有書院區比大家向該書院嘅學生查問，唔洗比面佢地，隨便問就得！）
至於其實以往一直都有一個同類型嘅post，可惜有見佢嘅資料都已經好耐，所以今年決定update返呢個書院介紹資訊，希望fm可以揀到最啱心水嘅書院！

呢個post係參考以往嘅高登/連登post，所以形式／內容上都有所相似，希望原著唔好介意～

先小人後君子：
有ｄ好基本嘅資料可以係書院網站搵到，大家不妨都睇一次先再問～
網址就唔提供喇，大學生，要學識自己搵！

有需要問嘅，不妨講低自己想要點樣嘅生活，每間書院各有千秋，有大同小異嘅地方亦有佢獨特之處～你就咁問邊間書院好，答案９成都係會答返你佢地自己個間～所以都冇意思。

另外，始終我地自己都有自己書院，只能夠盡能力集合唔同人嘅資料。歡迎大家站係fm嘅角度上一齊補充返，務求令呢個post每年都可以推返出黎而資料亦唔會變得太過落後～而留言嘅各位中大人亦都唔好一面倒支持／鬧邊間書院，理性客觀討論～

最後，祝各位新生都搵到最fit自己嘅書院，黎緊４年（或更多更少）過得開開心心～順順利利～

2. 中大書院制簡介

中大一共有九間書院，通常會分別講為四舊五新（舊／新書院）：
四舊：
崇基ＣＣ
新亞ＮＡ
聯合ＵＣ
逸夫ＳＣ

五新：
善衡ＳＨＨＯ
晨興ＭＣ
和聲ＷＳ
伍宜孫ＷＹＳ
敬文ＣＷ

書院制簡單黎講就好似哈利波特入面咁樣，唔同學生會分去唔同書院。亦可以話似中學嘅社制。學生唔會因為背景，例如讀咩科等而分配，而係視乎你嘅選擇同所有人嘅傾向，男女比例等而分配。亦都有講法係好似電影入面嘅分類帽咁亂咁派，例如我都見過有例子係排第９都入左等等，所以就只能祝大家好運～！

九個書院各有不同，無論歷史（最悠久嘅新亞今年已經六十九歲），活動（舊書院活動有返咁上下歷史同經驗，新書院資源多亦都有好多發揮空間），文化（舍堂文化強弱，宿舍／活動風氣等）等都大有不同～
當然唔少得仲有硬件上嘅，例如地理，交通，設施等等～

唔同書院會影響嘅主要有：
宿舍－祟基（ＣＣ）嘅你唔會住到聯合（ＵＣ）嘅宿舍
活動－基本上會玩返自己書院嘅活動（講緊做部員，籌委個Ｄ，類似上莊，例如院慶，歌唱比賽等）當然你話參與嘅，例如去睇下隔離書院嘅歌唱比賽聽下歌咁就無分書院
上莊－唔同書院都有自己莊，例如宿生會、新亞ＸＸ莊，逸夫ＸＸ莊咁，當然中大ＸＸ莊都會有，個Ｄ就冇分書院
Scholaship/Exchange 等呢Ｄ唔同書院都有多少分別，但值得一提嘅係，好多新生都會考慮呢Ｄ而揀書院，但首先你要知道：Scholaship（船）都要有返咁上下成績／成就先拎到，而中大本身同埋Faculty（學院，例如商學院，理學院）都會有提供相關嘅船／Exchange programme，有興趣了解多ｄ可以再問返

3. 揀書院程序

舊Post都有講到大約程序係點，但相信收到Offer之後嘅你其實只要follow返Offer上面寫嘅內容就得。
呢到截錄返比較有用嘅資料：
你有一份書院Preference Form要填，咁入面會教哂你點揀，主要排返１－９。而部分學系係冇得揀書院的，例如人類學／藝術系嘅同學就一定係新亞（ＮＡ）。有Ｄ新書院係會實行必宿，即係學期內都會有宿，咁相對就會收少Ｄ學生（視乎宿位）。張ＦＯＲＭ入面係有得揀要／唔要呢Ｄ書院，所以希望大家了解自己需要先。部分書院就有機會有Interview／叫你轉做First Choice，有待大家補充。

當然之後仲會有大Ｏ（即係書院ＯＣＡＭＰ，學系個Ｄ叫細Ｏ）
今年大Ｏ會係１８年８月２７－３０號，O Day會有得報名，Online都可以報，ＬＩＮＫ相信大家會有能力搵到。玩唔玩Ocamp都有好多講法，坊間嘅言論都有好多，中大Ocamp相對其他Ｕ黎講都比較唔同，我個人黎講就有玩過幾年Ocamp，係到得到好多野（朋友，關係，學識做人，梳士等等），但亦見過唔少人玩完覺得冇咩特別，浪廢錢浪廢左４日３夜嘅時間，識唔到人玩得唔開心。你問我我一定叫你入大學咩都試下嘅，如果FM想知多Ｄ，都係不妨係O Day問／問下師兄師姐囉～

4. 地理位置
要了解各大書院地理位置，首先睇睇中大地圖 http://www.cuhk.edu.hk/chinese/campus/cuhk-campus-map.html
未黎過中大嘅同學仔可能都知道中大有山城呢個名～講緊嘅就係因為中大真係依山而建，所以地圖上睇就未必見到所謂山城係點樣。
簡單黎講，地鐵站出去／崇基（CC）範圍都可以叫山腳；去到本部，即係百萬大道／圖書館呢到附近就係山腰；再上一重就係聯合（UC）／新亞（NA）。當然仲有部分書院散落係唔同地方，例如位於北面嘅敬文（CW）書院，雖然佢係山腳位，但位置就相對偏僻。

有d科目會集中係某d地方上堂，例如商科會係山腳多（例如係巴士站個邊嘅CYT）理科係本部，藝術系／人類學／新傳會係新亞。或者可以話：會集中係自己科目相對應嘅building上堂。

但話雖如此，呢一個條件其實未必十分重要，因為
第一：除左major要讀嘅科，你仍然要讀好多例如通識／PE等科目，而呢d科目係可以分佈係世界各地......
第二：上課日校巴有差唔多十條路線，總有一架會搭到去。生存得耐，計岩時間，要係中大穿梭並唔係你想像咁難。

5. Assembly、書通、STOT、FYP
唔同書院對以上四項都有唔同要求，基本上全部書院都有週會（assembly）同書院通識（書通）。而Student Orientated Teaching（stot）同Final Year Project（fyp），呢到指書院FYP而非本科fyp，即係部分書院學生有機會要做2個FYP。

assembly，即係書院學生要係學期內上齊某個次數嘅週會。唔同書院會請唔同guest黎講，詳細可以問返。

書通，即係書院學生要讀1～2個course關於書院，內容圍繞書院歷史／理念，亦都會有其他唔同嘅couese，詳細可以去書院網站望下。

6. 宿及hall life
係中大住宿相信係大家都好care嘅地方~始終中大咁大，住落都真係似足一個小社區
正如頭先所講，大家只會住到自己書院之下嘅宿舍（除非你屈蛇啦......)。

至於夠唔夠分住，雖然話中大宿舍多，但其實學生都更多，亦都唔係話住就住到。分數黎講，主要睇你住邊區，樓型樓齡，人均面積，對宿舍/中大貢獻(即係活動分)等。每間書院計法都唔同，冇得比較，想知多d可以自己上返書院網站睇計分方法同埋搵下上年cut-off。另外，如果對宿舍好有需求嘅不妨考慮下必宿嘅新書院。另外，作為fm嘅你因為冇上莊嘅分數(上莊拎到嘅宿分係計落下一年)所以相對分數都會拉低返d。

另外，唔夠分數嘅同學仔亦都唔洗灰心，如果你係接近cutoff幾分，其實都可以照報，因為宿舍有機會有後備宿位/有人quit宿/exchange等等原因而空返間宿出黎，報左可以reject，唔報就一定冇。仲有，部分宿舍有臨時宿舍(臨宿)制度，即係例如a，b住係一間2人房，你可以申請同佢地一齊住，即係3人住2人房。不過對fm黎講要搵到人臨都唔易，除非你玩ocamp識到其他omate/爸媽唔介意一齊住/有朋友師兄姐住緊。

最後，住得近/差少少嘅你地亦都唔洗對宿舍呢樣野灰心住，除左臨宿等"合法屈蛇"之外，亦都總有方法住到嘅~詳細就自己問下人喇~而即使yr1冇宿，之後亦可以透過上莊/參與活動去拎宿分，而部分莊更會有必宿呢支歌仔唱添~例如某d莊嘅大post(學生會會長等)。活動方面就有例如參加陸/水運會等都會有少量分加。值得一提嘅仲有宿生會莊，佢地多數下一年(yr2)都可以必宿架~不過當然支莊岩唔岩自己先係最重要啦~

hall life：
唔同書院入面有唔同宿舍，唔同宿舍亦有唔同風格，有d宿係比較摺，有d係比較多活動。但唔代表多活動嘅宿一定最岩自己，多活動代表你多d機會接觸唔同嘅人同事，亦都代表你要有呢個心態去接觸唔同人。摺嘅宿一樣可以有活動，或者係頹少少~冇咁多人參加，但你有心，大家一樣可以玩得開開心心。另外，無論間宿係點，有一樣野係不變嘅，就係你嘅roommate喇。你同佢朝見口晚見面，同佢打好關係/了解下對方都係一樣好緊要嘅事黎~

宿舍通常都會有d康樂設施，例如波檯，足球機，桌球檯咁，亦都會有tuck shop， pantry等，都係一d聚腳嘅地方~所以難得有宿嘅你唔好淨係掛住摺讀~要多d出去行下呀!

叫我元朗胡力威 2018-08-06 22:22:30

7. scholarship (船)
書院同中大都會有船，有興趣嘅入左學就要多d留意mass mail/書院網站。至於拎唔拎到，最簡單就係睇gpa，另外就係視乎需要(家庭等)，對書院/中大/社會貢獻等。講到尾，其實呢方面又唔係想像中咁睇書院，有料嘅你一樣可以係faculty/中大到拎~

8. 活動
唔同書院嘅活動都唔同，通常會有院慶，歌唱比賽，大o，體賽比賽等等等等
呢d活動除左可以參與之外(例如係院/校慶大笪地活動做檔主，千人宴book圍檯同omate食飯等)，亦都可以做core(即係上活動莊，或者叫短莊，因為莊期就係搞到個活動為止，不過core通常唔會yr1做)或者做部員幫core手搞/宣傳等等(通常yr1都會做)。都好建議fm接觸多d唔同活動，因為大學除左讀書都仲有好多野玩，好多野學，而且上堂係學唔到嘅。

9. 校/院隊
唔同書院有唔同院隊，亦都各有強項。當然除左院隊，中大都有自己嘅校隊，大家可以留意下~

10. Exchange
書院自己本身都會有exchange，去到嘅地方亦都唔同，有d書院亦可能因為搞開/同某d U有關係而有d獨特嘅programme。但作為fm未必已經有心水，所以都未聽過有人因為呢樣野去揀書院。而中大/faculty本身都會有唔同嘅programme，中大OAL亦都係好多人報嘅途徑~所以書院未必太過影響~

11. 後話
講左咁多，其實我都係一知半解，同埋都係自己感受。希望大家好好享受中大嘅生活，同埋ENJOY中大書院制下比到大家嘅生活~始終呢樣野唔係其他學校比到，或者咁講，每一個人嘅感受都唔同，一切都係你嘅選擇。祝大家可以係中大入面搵到最適合自己嘅路，祝大家前程錦繡，即係咁講～

---------------------------------------------------
BTW，呢個POST冇包括到書院DETAIL既介紹，如果想知多少少嘅可以睇下中大人資訊專頁呢個FACEBOOK PAGE: https://www.facebook.com/cuhkinfo/ (唔好撈亂其他網)
或者去SECRET睇下都得: https://www.facebook.com/CUHKSecrets/
入面岩岩都更新左唔少有關書院資料，亦都可以比大家上去問下野~就係咁

女朋友好錫我 2018-08-06 22:33:26