當日登山指數係 Grade C，全程風速都係大約 20m/s，我大約6x kg，耐唔耐都會俾啲風吹 '旭'，哩啲情況下行山杖變得好緊要。
本身諗住彈丸登山，所以晏晝兩點先上到五合目，一落車已經好大風夾雜小雨，覺得彈丸有啲危，所以最後決定去山屋住一晚。事前冇搵過相關資料，好彩五合目的遊客中心可以幫手聯絡山屋，人到付款。中心職員英文幾好，亦有普通話人員。如果唔係旺季，巴絲可以考慮去到先決定是否彈丸。
大約4點起行，離開五合目時唔算大風兩。
沿途無乜特別，亦冇乜難度。過咗七合目後，天氣愈黎愈差，橫風橫雨。
哩啲時候，雨褸防水褲防水鞋防水手套都非常緊要。我喺五合目買咗套衫加褲的雨褸套裝 1140yen (相入面上身的兩褸係另外買的，因為我背囊冇rain cover，所以要用一件長身啲的雨褸先可以勉強包到嗰人同嗰袋)。對鞋唔防水，所以喺兩隻腳各笠咗一個膠袋，再著鞋，勉強頂到。手套唔防水，後期凍到雙手接近冇知覺。
8點左右到達八合目的元祖屋，氣溫大約7-8度，戶外橫風橫雨，亦都好黑，記得帶頭燈同埋確保有電開得到。我去到嗰陣屋內係冇暖氣的，但都比戶外舒服好多。
間屋的飲食務服提供到9點，9點準時熄燈。用廁所都係要俾錢，但就係第一次200yen，之後就唔使。(我冇住過御來光館，但入去休息時望到啲床位，覺得元祖屋係稍為鬆動啲。) 臨瞓前山屋工作人員就已經話天氣太差，建議我哋唔好半夜起身登頂，改為日出後再起行，咁唯有聽佢講。(間屋只提無一個薄睡袋同一張毛毯，我冚埋自己件厚褸先勉強夠暖，各位記得準備好保暖物品。我有喺藥妝店買咗啲暖貼帶埋上去，瞓覺嗰陣用都幾好，建議可以用喺對腳度。行山時諗住暖對手，但應該濕水就廢武功，所以最後幫唔到手。)
成晚都瞓得唔好，迷迷糊糊到日出時間，出到門口竟然見到少少御來光。
之後6點出發，愈高就愈大風兩。
https://youtu.be/PKridJWJaLU
到御來光館見到一團台灣人放棄登頂，同時又見到一啲人完成登頂喺度休息緊，佢哋都表示上面的情況比御來光館惡劣。但一場黎到，我都係決定頂硬上。我覺得沿途的風勢真係可以同8號波相比，好在沿路冇懸崖，所以應該小心啲行，危險性不大。到咗頂之後，影幾張打卡相就走咗，太大風，唔好話行劍峰，係留多陣都唔想。
最後有幾樣嘢想提一提：
1. 我覺得當時的天氣已經係一般人的極限，如果各位唔係有充足的訓練，建議遇到20m/s以上的風速就唔好上了。
2. 原來山頂所有的設施都要等其他線路開放先會開，所以我當時上到去係冇得打印冇得寄postcard冇得去廁所。另外，原來御來光館係冇得打印的...
3. 落山當日(7月7號晚)，原來河口湖有慶祝開山的煙花表演，我錯過咗，係朋友之後話我知。如果巴絲諗住下年7月頭去的話，可以留意吓。
https://youtu.be/648tdEGygs4