我係一個女仔，出生係一個好傳統極度恐同嘅家庭入面。又因為份人比較摺，又柒下柒下咁，由中學到大學都無男仔撩過我。
而由細到大，大人都俾一種思想我，我係個女人，大個要成家立室，相夫教子，而唔結婚嘅都係怪人。
但我一直都唔明，點解我一定要同一個男人拍拖，甚至乎要我幻想同一個男人性交我都覺得好反感。
但我係十六歲前都會覺得自己係一個直女，但始終都無同過男人拍拖，個陣仲會俾借口自己，「因為我柒無人睇上啫」
到我十六歲個年，機遇下我知道咩叫同性戀，而我又對呢樣嘢好好奇，就係個一年一個人自己去參加咗一個同志活動，同時識到我第一任嘅女朋友。
我個日甚至怕有電視台會影到我或者見到熟人，大熱天時仲戴帽戴口罩，一個人行嚟行去，睇下父母口中所謂嘅「變態」係點。
而個陣，我嘅第一任就走咗埋嚟同我打招呼，我地識咗半年就係埋一齊，個種感覺就好似終於搵到一直以嚟嘅心結一樣，十分舒服。
但我同佢交往嘅三年內我都係唔敢同任何人講，朋友，同事邊個都唔敢講，當然，屋企人仲以為我係一個連拖都未拍過嘅乖乖女。
我一直都暪住，唔敢行出呢個深櫃，最近女朋友都因為呢年事同我分手。
而屋企人都開始叫我搵個男朋友返屋企，到底我要深櫃，扮直結婚生仔算？
定我勇敢行出櫃呢
