韓國網紅楊藝媛嘅不雅照片早前於色情網上曝光，佢拍片公開自己曾受性騷擾一事，指三年前應徵模特兒工作時被迫拍下淫照，前後被迫拍咗5次。當時有網民喺青瓦台請願網頁發起請願行動，連女歌手秀智亦於網上公開聲援楊藝媛。不過當年攝影室嘅負責人日前就向韓媒爆料，公開當時跟楊藝媛嘅短訊截圖，指楊藝媛係自願拍攝並主動詢問拍攝日期。
韓國節目《SBS News》噚日電話訪問楊藝媛，楊藝媛回應：「你認為我會准許佢哋觸摸我嘅身體嗎？我從來冇叫佢哋觸摸我，從來冇同意着呢啲衫，佢哋用相嚟勒索我，所以我認為唔應該激嬲佢哋。」
當被問到點解係佢主動詢問拍攝日期時，楊藝媛表示一開始係被迫，之後佢主動詢問拍攝日期嘅原因係：「當時有經濟困難，而且已經影咗相，生活已經被毀，一切都已經結束，我已經放棄自己。」對於外界嘅評論，楊藝媛最後表示：「所有事情都將會於法庭上公開。」