巴西名宿朗拿甸奴，由踢波時期到退役後一向愛蒲，身邊嘅女伴多到數唔晒，據巴西傳媒講，嚟到38歲細哨都有心成家立室，不過點知8月原來佢打算一次過娶兩位女士，分別係Priscilla Coelho同埋Beatriz Souza。
原來自從去年12月開始，細哨已經玩緊三人行，大家一齊住喺里約熱內盧入面一間價值500萬鎊嘅細哨物業，仲生活得好和諧！細哨每次飛離巴西做嘢，兩位女友都會一齊去咁話。
其實，細哨幾年前開始同Priscilla拍拖，不過2016年就搭上埋Beatriz，一路每個月兩位女士都只係由細哨俾1,500鎊零用錢。同時細哨都夠晒公道，聽講每次買禮物都會買兩份一式一樣嘅，俾晒兩個女友，仲連香水都同一隻味，睇嚟細哨好清楚女人嘅呷醋心態。據講，舊年4月Priscilla嘅家人因為唔滿意細哨一腳踏兩船，想同佢攤牌，但係最後變埋三人行。
呢位前世界足球先生，1月同時同兩人求婚，8月就會喺巴西里約熱內盧搞個私人典禮。根據巴西法律，婚姻都係一夫一妻制嘅，可能細哨只係搞個儀式當禮成啦，據報佢嘅家姐Deisi好反對細哨玩一夫多妻，所以唔會出席，而巴西歌手Jorge Vercillo就會做嘉賓負責唱歌。
Priscilla同Beatriz都係出身自細哨前球會明尼路嘅根據地Belo Horizonte，今年3月細哨去日本出trip，兩位女友都喺身邊，當時細哨有拍片擺上ig。而目前係巴塞隆拿同國際足協大使嘅細哨，亦有傳想學前輩羅馬里奧咁，喺巴西參政，並且加入中間偏右嘅巴西共和黨（PRB）。
