2018年05月24日
爆相爆片：金紫荊又開片 影相檔四男混戰
■金紫荊相檔現場一片狼藉。讀者提供圖片
灣仔金紫荊廣場係內地客必到景點，但嗰度仲有樣嘢出名，就係啲影相檔成日因為搶客爭執。好似前日咁，一個月內又再發生衝突事件，兩檔影相檔二對二大打出手。
前日上晝10點幾，兩檔分別都係兩兄弟睇檔嘅影相檔，因為生意爭執，4個男人相嗌唔好口打起上嚟，最後驚動警員到場，四圍嘅遊客見到咁熱鬧一於圍觀眼望望，剝花生。
警持盾牌到場拉人
目擊事件嘅讀者林生當時咁啱經過，雖然衝突好快平息咗，但有幾個警員手持盾牌調查，氣氛相當緊張。警方經過調查之後，拉咗涉案4個人，佢哋分別係34歲同27歲姓葉嘅檔主兄弟，同埋54歲同41歲嘅姓蔡檔主，涉嫌打架、刑事毀壞同襲擊。
佢哋各人都有唔同程度嘅受傷，雖然唔算嚴重，但相機鏡頭同攝影用具呢啲搵食工具就爛咗。其實呢啲事唔止一次發生，好似上月30號，現場同樣發生打交事件，一位內地遊客同兩名影相檔職員爭執互毆，結果3人涉嫌喺公眾地方打交被捕。搵食啫，搞到咁真係唔知為乜！
上一則
上一則
爆相爆片：阿叔搶手袋被擒「我跑步咋」博鬆人
下一則
下一則
爆相爆片：P牌七人車 烈日下自焚
