聆聽大忌：「唔好咁唔開心啦。」
講真，如果面前有粒掣，一撳咗佢就可以脫離負面情緒，撥開所有愁雲慘霧，我諗好多人都會撳。奈何人嘅情緒唔係好似一塊泥膠咁，你鍾意將佢捻成咩形狀都得。聽到呢句「唔好咁唔開心啦」嘅人，除咗心諗：我夠想囉！然後答你：「哦。」、「多謝你。」之外，都唔係好知應該畀咩反應你。
所以話，呢句真係少講為妙。見到朋友唔開心，我哋或多或少都會想幫佢解決情緒問題。呢個時候，我哋可以講：「嗯…我見到你為咗 xxx／yyy 感覺到好唔開心。」
聆聽技巧就係得咁多，但其實如果我哋再睇深一層，喺「唔好咁唔開心啦」呢句入面，仲會發現好多我哋對情緒管理嘅哲學。
面對負面情緒，無論係緊張、傷心、或者憤怒都好，我哋好多時候嘅第一反應就係要消滅依啲情緒。例如就嚟見工嗰時覺得緊張，就會心諗：屌唔掂喎！點可以咁緊張㗎！當然，咁諗之後就會更加緊張。
可能，你本身已經知道同對方講「唔好唔開心」係唔會幫到人，但其實有冇諗過自己點解會迫自己「唔好唔開心」呢？一開頭我講緊點樣聆聽人哋嘅心聲，但其實呢個係一個關於聆聽自己心聲嘅故事。
咁，我哋點接納自己呢啲情緒？小編去學禪嘅時候聽到一個好好嘅比喻：心境尤如蒼空一樣，唔同嘅天氣代表唔同情緒。時而烏雲密度；時而天朗氣清，但係天氣嘅轉變都係我哋控制唔到嘅。自己就好似蒼空嘅觀察者，如果強求時時天朗氣清，則只會沮喪無力。所以，唔開心嘅時候，不妨試吓同自己講：「嗯…我依家唔係好開心，不過咁樣係ok 嘅。」培育一份對情緒嘅自我接納。
當然，呢種由控制到接納嘅心境改變，唔係一朝一夕可以達成。而持續正念禪修係一個鍛鍊接納能力嘅好好方法。如果你有興趣嘅話，不妨留意吓我哋嚟緊6月23號喺生活書院舉辦嘅冥想體驗坊。
---------------------
賣個小小廣告先，我地係「澍洞」，一個個關心香港人心理健康嘅團體。我地會定期用廣東話寫d 易明嘅心理學文章～泥緊六月仲會搞個冥想workshop添。如果你中意依篇文章，好希望你可以比個like 我地 facebook page，我地會定期係上面分享更多～
facebook page：https://www.facebook.com/hktreehole/
體驗坊傳送門：https://www.facebook.com/events/363640854128229
