連詩雅、鄭欣宜、鄧健泓同羅霖最近拍緊網劇《性敢中環》，顧名思義，呢套網劇就係講喺中環發生嗁事，戲中連詩雅扮演一名心理醫生，日前，《蘋果》見佢喺中環拍攝一場佢同好姊妹雨僑爭仔後鬧交，連詩雅獨自落老蘭買醉，飲到high晒離開，仲要喺街上嘔。
拍攝當晚8點幾，着住露腰裝配貼身牛仔褲兼4吋高踭鞋嘅連詩雅，倚住欄杆拍攝，劇情交待佢街頭醉酒玩電話，睇完電話短訊即刻嬲到怒掟手機，臨近晚飯時間喺中環拍戲，少不免都會吸引好多巿民圍觀，其中有一名外籍男子仲拎住手機喪影，呢位外籍男子似乎有戀足癖，透過佢部電話睇到，全部照片都係大特寫影連詩雅膝頭以下小腿位置，仲立即同朋友開心share，將相片放去朋友群組，同時露出猥瑣笑容。好彩連詩雅當日係着牛仔褲，唔係短裙，而呢一鏡都係拍攝尾聲，佢拍完就好快收工。
《性敢中環》劇日前中午又到上環出外景，呢次就熱鬧好多，有鄧健泓、欣宜同埋客串嘅羅霖，劇情交待任職教師嘅欣宜發現鄧健泓疑似跟蹤佢，欣宜向羅霖求助。拍攝期間，鄧健泓唔停咁玩電話，唔知佢係咪向老婆石詠莉報到。52歲「美魔女」羅霖雖同本月30日牛一就31歲嘅欣宜年齡相差21歲，不過佢哋合作開工都冇代溝，全程有傾有講，欣宜仲搵劇組工作人員代拎手機合照留念。佔戲唔多嘅羅霖相當受劇組歡迎，佢完戲份離開時，仲好親切逐一跟幕後人員say拜拜，大家又要求佢集郵，羅霖有求必應，睇嚟佢真係好有人緣。
