［真人真事］病態賭徒成魔之路

我嘗試喺連登到搜尋過有關賭嘅post，
發現好多都係足球討論、買波貼士，
但係就甚少有賭仔等過來人分享導人戎賭，
希望我自己嘅經歷可以幫到大家，
唔好重複我犯嘅過錯。

我今年23歲，
上年先大學畢業，
目前欠債幾十萬，
終於去咗搵戎賭機構求助。

由我背景講起，
細細個嘅時候就已經喺屋企接觸賭博，
雖然屋企人並唔係日日賭波賭馬，
只係大時大節打下牌、鋤下dee，
一年去一次澳門玩兩手咁，
相信大把家庭賭得比我屋企嚴重，
不過我自小就會一齊參與其中，
去澳門就留喺酒店房等半個鐘，
呀爸呀媽賭完次次都贏錢就落街食好西，
大時大節屋企打牌、鋤dee都會預埋我，
我慢慢都培養咗賭錢呢個興趣，
讀書時期亦都好鐘意同同學賭。

到我終於夠18歲嘅時候，
澳門喺我生日之前改咗要21歲先入得賭場，
所以我18歲可以接觸嘅賭博就係馬會。
以前讀中學搵同學鋤dee、打牌多數都贏，
但入到大學d對手強咗好多，
打牌經常輸錢，
所以我就無再同佢地打牌，
變咗去搵馬會賭。

除咗六合彩以外，
第一次喺馬會賭嘅就係足球，
當時有朋友教我玩讓球，
讓球最少要玩$200，
我都已經覺得$200數目唔細，
不過慢慢就越玩越大，
亦都越玩越沉迷，
之後更加開埋馬會戶口，
落注從此變得更方便，
無時無刻都有得賭，
又可以玩即場投注，
一輸咗又可以即時入錢再追，
好快我就輸左數以萬計嘅錢，
將由細到大既積蓄輸清。

經過咗輸波嘅教訓，
我有一段時間無點再賭錢，
慢慢儲返少少錢，
咁就諗住唔賭錢去學投資買下股票，
始終本金唔多，
股票上落賺蝕得好細，
仲要扣埋佣金+其他費用，
所以想賺大錢嘅我就轉左去玩牛熊證，
諗住以小博大。
頭一兩次順利賺到少少錢之後，
買嘅金額亦越買越大，
all in所有錢買牛熊，
最後動物被殺，
又一次輸曬所有錢。

經歷左兩次輸曬所有錢之後，
無賭一段時間，
又有朋友教我接觸賭馬，
之後就發現賭馬有回扣，
買大過一萬輸咗都有10%拎返，
聽落好似唔錯，
而且買d熱門嘅位置又相對易贏，
慢慢又有一排沉迷賭馬，
輸完回返10%就諗住買隻冷馬回本，
最後結果當然又係慘敗收場，
輸清光之後又無賭一段時間。

到我終於夠21歲，
可以隨時過澳門賭，
就覺得喺馬會賭食水太深，
賭咗咁多錢都拎唔到張紅卡，
輸咁多錢咩福利都無享用過，
咁就過左澳門賭場申請咗張會員卡，
賭賭下就發現又有餐券、又有船飛換，
好過馬會多多聲，
而且節奏又快，
每分每秒都有唔同賭臺可以賭，
慢慢就越去越密，
而且帶去澳門嘅本金亦越帶越多。

自此過澳門賭錢就變咗一種娛樂，
又有得食又有得玩，
可以消磨時間玩足一日，
慢慢養成種心態覺得，
就算無贏無輸平手都賺咗個免費旅行，
賭得夠耐實有餐券+船飛送，
積分仲有好多禮物換。

賭耐咗之後，
賭場會越比越多優惠你，
成日有SMS優惠，
又送泥碼又送住宿，
但呢d優惠往往有時限，
逼你要短時間內用，
等你覺得唔去就蝕左，
賭場好識得捉賭仔心理。

由於賭場有大量福利，
加上待遇好好，
產生優越感，
好容易就會令人嚴重上癮，
越去越密、越賭越大。

賭場最危險嘅地方除咗係d會員優惠，
而且仲可以碌卡買籌碼。
睇咁多電影都知道，
問賭場d黑幫借係唔會有好結果，
隨時一個人去，三個人返，
押你返屋企收數，
除非賭到完全失去理智，
好多人都對問黑幫借錢好有戎心，
相反信用卡正正就係看似安全嘅陷阱。

信用卡買碼只要比3%手續費，
加埋手續費後個抽水比例依然低過馬會，
所以3%手續費起唔到任何阻嚇作用。
當試過第一次碌卡追數之後，
自此就接受咗借貸賭博，
輸5萬就碌5萬追數，
再輸就再碌10萬，
之後20萬，
頭幾次總會比你好好彩咁追到，
但不斷重複呢個行為，
總有一次會爆煲，
碌爆曬所有信用卡再輸清光。

以前賭場仲有好多大陸高官去賭，
D賭場公關唔會點理我地呢種青少年，
但隨住大陸打貪之後，
少咗好多大陸大客，
令賭場重新重視各種客源，
為求保住生意不惜大派福利比小賭客，
就係要令到你上癮之後，
再揸乾你所有錢。

當我發現自己變咗病態賭徒之後，
自己一直低估咗賭博會帶黎嘅影響，
亦都高估咗自己嘅自制能力，
無及早去求助，
遲遲都無踏出第一步去正視問題。

如果你或者你嘅朋友都有賭博上癮嘅徵狀，
真係唔好再猶豫，
喺情況未去到最壞之前及早求助。

踏出第一步往往係最難嘅事，
好彩當時我有朋友幫我搵資料
仲幫我約時間見社工，
陪埋我一齊出席，
沿途一路撐住我戎賭。

有咩問題或困難歡迎大家拎出黎討論，
戎賭路途絕不孤單無助，
只要你肯踏出第一步，
生命一定會因此而改變。

另外如果你睇完估得出我係邊個，
你唔洗喺到同我相認，
因為知道呢件事嘅人唔多，
你知道得即係代表我對你有絕對嘅信任。

［真人真事］病態賭徒成魔之路

whoami