平時無咩節目，最多都係落街跑下步
有時想約朋友出黎打下波
無奈大家都要返工，好難就時間
就算大家時間都得，都因為要陪屋企人出唔到黎
久而久之，大家就越黎越少見面
一年先見得一兩次
其實真係好想讀書時每日都見
每日放學都去球場打波
每日都9嗡一大輪
玩到飯都唔想返屋企食
嘻嘻哈哈柴娃娃咁
相反宜家一放工只會想返屋企休息下
睇下YouTube d卡通片
蠟筆小新，叮噹，數碼暴龍
雖然好多都睇過再返煲
但係個種感覺仲係好強烈
記得tvb播數碼暴龍2時
個時仲係小學雞嘅我
對手唔似宜家咁
唔係d咩西客，西上司
頂多係成日話你成日上堂講嘢罰你抄既老師
每星期二同四都會醒醒定定 唔會比老師罰
只求可以氹到老母5點鐘比我開電視
最後我亦好成功咁睇曬成套數碼暴龍
亦都係唯一一套
可能小學雞會講句，乜仲要開電視睇卡通咩
上返網睇大把啦，仲唔駛等
咁大個人仲睇卡通，可能你會講一句係咪on9
但卡通比我嘅唔單止係每集20分鐘嘅回憶
而係我逝去童年既回憶
叮噹可否不要老？
其實叮噹無老過，頂多都係改咗名，老嘅只係我地
