我地成日都會聽人講止蝕，會話去到邊個價位就認輸，結果我地過多一排再同番當事人傾起，你通常都會聽到佢話結果都係冇賣到，一般黎講都係以下原因：
1. 佢會升番，因為佢冇理由繼續跌
2. 我等佢反彈先走，我賣左佢先反彈我就蝕
3. 我一日唔賣一日都唔係輸
4. 我係投資唔係投機，我睇長線
由第一至第三點嘅答案全部係必敗嘅原因，講得出以上嘅野嘅人，係抵你輸
只有第四點係有機會贏，不過前提係你有億億聲嘅注碼玩。假設你有巴菲特嘅注碼，你好有眼光揀左隻好股，但你喺股災前高位用左十億入場，喺股災期間佢跌左八成，再用五六年時間，呢隻好股真係番上高位破頂再升20％，呢個情況你賺左兩億。但如果你得幾十萬，俾你入10萬，你用五六年時間番上黎賺20％，你賺嘅係兩萬。同樣用五六年時間，賺兩億，好抵，好多生意都做唔到呢個效果；五六年賺兩萬嘅，係on9仔。投資係俾有本錢嘅人玩，本金有限嘅人應該投機。不過投機都係一門學問，如果你冇乜點睇書去吸收知識，下下都亂all in又唔止蝕，你只係賭錢。
首先要講下點解錯誤會咁易出現
喺操作上，我地成日會高買低賣，點解？
一切皆因人性，股票喺高位嘅時候係必定會出現大量利好消息，啲仆街大行一定會不停吹奏提升目標價同買入評級，人性貪婪會行動買入；喺低位時候亦一定會伴隨住大量壞消息，令你放棄希望，而往往就係呢啲時候先係強弱換手之時。大行唔吹奏去引你買入接貨，佢地點沽貨？唔唱淡又點有低位俾佢買入？
點解止蝕硬係咁難執行？
止蝕呢個動作其實本身就係承認自己錯誤嘅行為，我哋日常生活黎講，其實一定係認為自己嘅判斷係正確先去做一件事，認錯係好違反人性，所以你老細先成日同你講「我冇咁講過」，啲差佬又會咁認同自己真係冇錯。
佢冇理由一直跌，會升番
投機遊戲一切以股價為首，價格必定行先過理由，喺佢郁緊嘅時候你係唔會知佢咩原因，因為到佢郁完嘅時候已經太遲。07次按危機都係去到雷曼收皮、災後你先知原來係次按。
佢要跌就要跌，要升就升，原因唔重要。一隻股票要升嘅話，佢識升本身都可以係佢繼續升嘅原因，點解？因為升就有人買，一齊投機。反之亦然。
我斬左倉嘅時候佢反彈咪好唔抵？
我哋成日唔斬就係成日都覺得佢會反彈，或者喺斬倉後睇住佢反彈好唔抵。其實呢個觀念係錯誤，因為投機唔係每一單交易都會賺錢，亦會出現好多虧損情況，我地往往第一注都係試水溫，佢行到止蝕點就要直斬，佢彈唔彈番上去唔重要，因為佢可以唔彈，而且到佢彈嘅時候你亦會覺得自己啱而唔斬，結果佢會跌更多，擴大虧損。到時候你就覺得反正都蝕得七七八八，攞唔攞番都罷，然後成筆注碼蝕晒。
面對斬倉嘅心態係，佢升番過前頂我就再買番，我錯我就斬，唔理佢彈唔彈，因為我地唔會估到。
佢升番，行啱方向，我地就買番，再加注，贏谷輸縮，就係咁簡單。
我一日唔斬一日都唔係蝕
瞓醒啦！佢一路行錯方向你就係一路蝕緊，因為你唔放，筆錢都係鎖死左，你唔斬就係蝕緊。
小弟開左個page，將會記錄自己交易港股美股嘅經驗同心得，會喺連登同fb出文，方便大家隨時睇番唔同文章，如果有興趣嘅話可以入去睇，唔會因為推文嘅關係洗走左啲文
https://www.facebook.com/halfspeculator/
