【寄送點心日記】偽白之戀人夾心餅

眾裏尋玉

23 回覆

21 Like 2 Dislike

眾裏尋玉 2018-03-30 00:58:55

抱歉遲咗好多先開po

，因為呢幾日都唔太得閒，希望大家仲記得我啦。

今次我整咗偽白之戀人嘅朱古力夾心貓舌餅乾，有抹茶、草莓、同黑白朱古力四款。

如果大家復活節想花心思準備小禮物比朋友，可以試吓一齊整。
呢款餅乾賣相可愛又好食，最緊要係唔難整。
材料非常容易取得，只需要牛油、蛋白、糖同麵粉，仲有夾心嘅朱古力。
食譜參考咗carol老師嘅貓舌餅乾，大家可以去睇吓：https://caroleasylife.blogspot.hk/2009/05/blog-post_31.html?m=1

係準備材料之前呢，我哋要準備一下工具先。

整偽白之戀人呢，最緊要就係個模，亦啫係圖中嘅心型膠版，喺好多烘培舖都有賣，大家都可以用方形/圓形模。
然後我哋需要一塊刮板（橙色塊嘢）嚟配合塊膠模，用嚟推勻麵糊，當然你可以用普通抹刀。
最後我哋仲需要麵粉篩、打蛋器、刮刀、烘培紙/不沾布等等嘅基本器具。

宜家開始介紹材料啦。

貓舌餅乾：（20-30塊成品）
蛋白 60g （約2隻雞蛋）
牛油 60g
低筋麵粉 60g
糖粉/糖霜 35g
雲呢嗱油 1茶匙（可省略）

夾心朱古力：（利申我做果陣無秤重量）
白朱古力 25g *3
黑朱古力 25g
抹茶粉適量
草莓粉適量

眾裏尋玉 2018-03-30 00:59:13

步驟：
1. 攞定牛油出雪櫃同分定蛋白，篩粉。預熱焗爐160℃。

2. 打發牛油，分3次加入糖，直至牛油變白，拎起打蛋器出現尖角尾端。

3. 分4次加入蛋白，每次都要確實乳化好先加下一份。一開始加入蛋白會呈現豆腐渣狀態，乳化成功後會變成光亮嘅忌廉狀，碗底無多餘液體。如果有雲呢嗱油可以喺第四次同蛋白一齊落，去除蛋腥增添香氣，無都唔緊要。

4. 分3次加入麵粉，用刮刀以切拌方式混合，直至見唔到乾粉。

5. 膠膜放牛油紙上，然後喺膠模上推勻麵糊，攞起塊版後可以用牙籤修整形狀。

6. 入爐，160℃ 3分鐘，轉焗盤方向，再焗2-3分鐘，見到邊緣上色之後調低到110℃ 10分鐘，中途轉一次焗盤。出爐後，用抹刀鏟起餅乾。

7. 準備朱古力夾心。熱水座熔黑白朱古力，喺白朱古力加入適量抹茶粉同草莓粉撈勻。

8. 喺放涼嘅餅乾上擠/畢啲朱古力，等朱古力半凝固嘅時候蓋上另一片餅乾。完成。

眾裏尋玉 2018-03-30 00:59:34

成品圖：
大家可以買啲自黏透明袋/普通透明袋包裝。我自己係用直髮夾封口，真係居家旅行必備。然後右面果盒就係要飄洋過海嘅禮物啦～

注意事項：
1. 分蛋記得要至少三個碗，一個打蛋，一個放蛋黃，一個放蛋白。無論咩分蛋方法都好，千祈唔好一次過打曬落同一個碗到，只要有一隻蛋壞或者穿蛋黃，成碗就唔用得㗎啦。如果用蛋殼分蛋，記得事先洗一洗蛋殼表面，仲有小心蛋殼嘅尖銳部分刺穿蛋黃。我個人比較喜歡用手分蛋，因為會分得乾淨啲又唔會拮穿蛋黃，不過手一定要乾淨。

2. 預先攞出牛油可以令牛油回溫軟化，打發嘅時候會容易啲。而提早分定蛋白可以令蛋白回溫，室溫嘅蛋白比較容易同牛油產生乳化作用，無咁易油水分離。
3. 打發牛油用糖粉/糖霜都可以，依自己喜好。糖霜易溶，但係一開始加入好易飄到周圍都係粉。雖然糖粉難溶啲，但只要唔係白砂糖，喺打發嘅幾分鐘入面都可以順利溶解。打牛油最好喺白光下面打，會容易啲睇得出係咪變白。
4. 乳化係呢個食譜唯一困難嘅地方，由於無加入蛋黃呢個天然乳化劑，牛油同純蛋白融合會比使用全蛋難。為咗確保乳化成功，蛋白一定唔可以係冰凍嘅，而且要分次加入。一開始會好似豆腐渣咁，但只要高速打發，就會變成滑順嘅狀態。打發嘅時候要注意碗底同碗壁，如果你好似我用大座檯攪拌機就記得要不斷刮番勻啲混合物，確保所有嘢都可以俾打蛋器打到。如果打打下發現已經形成一團忌廉但底下滲水唔洗驚，用大嘅手動打蛋器用力打勻，不斷摷底就得。
5. 每次用完膠模記得抹乾淨接觸烘培紙嗰面先再用，唔係的話下一底嘅形狀就會唔靚。掀起後記得清理乾淨四邊嘅麵糊，先刮走再用紙抹。如果太多麵糊跡會好易有燶味。
6. 烘培紙可以重用，但記得用之前要刮乾淨原先嘅餅乾碎屑，再用紙抹乾淨油分，如果唔係會燶。
7. 畢好朱古力之後，唔好太早夾另一塊餅。如果唔係朱古力液會好容易流出，個夾心就會好薄。
8. 大家都可以試吓喺白朱古力加入唔同粉，例如紫薯、榴蓮、芝士、焙茶等。

希望大家會對我今次分享嘅食譜有興趣啦。