首先，呢篇食譜係冇流程圖片得成品同材料圖嘅，因為我本身冇打算開po，但諗吓諗吓最後都係想喺連登寫個烘焙日記。
嚟緊主要都會係分享啲可以存放較長時間，可以寄去外國嘅小點心。
今次整嘅係蜂蜜カステラ（長崎蛋糕），唔係最正宗用水飴整嘅版本，因為男朋友鍾意蜂蜜嘅香甜。但呢個食譜都有還原到傳統QQ嘅口感同底部脆脆嘅糖皮。
Credit: http://cecijaja.pixnet.net/blog/post/340937286-紙箱與木箱pk賽-三盆糖蜂蜜蛋糕-；Carol自在生活；Masa ABC
喺講解材料同過程之前，講一講點樣準備個模先。
正宗嘅長崎蛋糕係用木箱烘焙嘅，但價錢就非常可觀。作為廉價替代品呢，一般可以使用紙模，模仿木嘅傳導性，金屬同矽膠就未必得。
Masa老師嘅版本有介紹點樣用報紙製模，我之前都試過，係成功嘅。不過因為擔心油墨味，今次我使用咗紙皮材質。
而由於我好懶嘅關係，加上唔知屋企紙皮箱乾唔乾淨，我就買咗現成嘅Pound Cake紙模。大家可以去烘焙店／富澤商店（C記、士多）搵搵。
由於個現成紙模稍薄，為咗模仿木箱，我將兩個模疊埋一齊用，然後入面再跟Masa老師咁鋪錫紙＋牛油紙。
準備好個模之後，就可以準備材料啦。
材料：（3個模份量）
A.
顆粒糖適量 （富澤商店クリスタルシュガー；會沈喺底唔熔解而形成ガリガリ糖皮）
B.
蛋黃10個
和三盆糖 50-75g （富澤商店有售）
C.
蛋白 8個
和三盆糖 50g（富澤商店有售）
上白糖 100g（二德惠／富澤商店有售，保濕性較高）
D.
上新米粉 30g（富澤商店／AEON有售；提供QQ口感）
高筋麵粉 170g
E.
蜂蜜 100g-120g
步驟：
1. 喺紙模底審適量A顆粒糖，待用。
2. D粉類材料一齊過篩。
3. 預熱焗爐160℃。
4. 大大大碗入面打發B蛋黃，分3次加入B糖。一開始加糖低速打，再用高速打，差唔多得就開番低速令泡沫變均勻細緻。打到可以用打蛋器畫8。
5. 混合C糖類材料，大碗入面打發C蛋白，分3次加入C糖。同打蛋黃一樣，最後記得低速消走大泡泡。打到微彎勾，濕性近乾性發泡。
6. 分3-4次切拌(cut & fold)混合蛋黃霜同蛋白霜。刮刀斜入中間直線cut開混合物／碗邊緣斜切入，再由底兜fold上面。每次撈到大概勻，底反上面唔會兩隻色，就落下一份。唔需要撈到完全勻曬，之後撈粉都會幫手混合，撈太多次只會消泡。
7. 分3次加入已過篩嘅D粉。手法同上面一樣，見冇乾粉就落下一份，唔洗驚有粉粒未溶，之後會過篩。
8. 用個細碗畢起啲蛋糕漿，體積大概係蜂蜜嘅一半，加入E蜂蜜切拌撈勻。再倒番入蛋糕漿大致切拌。
9. 麻煩事來了，將蛋糕漿過篩，參考Carol老師，用刮刀輔助。
10. 由高處將蛋糕漿倒入模，用筷子來回畫S字。
11. 入爐1分鐘，攤出嚟用牙籤篤走啲泡。
12. 食譜話入爐70分鐘，之後150℃焗20分鐘，但因為模大細唔一樣，最後20分鐘要check住。如果表面太早上色就上面加塊錫紙，入面熟咗都唔夠色就放上層淨上火高溫焗幾分鐘。非專業焗爐中途記得前後左右調位。
13. 焗好倒扣喺牛油紙，底紙等底部糖皮涼咗硬咗先撕。如果底部唔夠色就底向上放上層淨上火高溫焗1-2分鐘。
14. 等涼咗小心撕去牛油紙，用保鮮紙包好放雪櫃擺一晚先食。食／送人之前切頭尾左右。雪櫃保存一星期，常溫密封加脫氧劑可以擺5日。
注意事項：
1. 糖唔可以減太多，個蛋糕會乾，要留意長崎蛋糕無油無水，所以糖好重要。
2. 打蛋一定要最後低速，如果唔係入面會有大泡泡，到最後成品就會入面有窿㗎啦。
3. 記得切拌要適可而止，避免消泡同出筋。
4. 要喺冇落乳化劑嘅情況下，整到好似街買咁孔洞細緻、口感綿密，蛋糕漿過篩係必須！千其唔好懶，唔係你去SOGO買好過。過篩動作輕柔啲，唔好攪盡量刮推，就唔洗擔心消泡出筋。
5. 用保鮮紙包一晚，根據Masa老師所講可以進行しっとり嘅保濕作用，好食過新鮮出爐。
6. 撕牛油紙一定要放涼後慢慢嚟，唔係好易整爛蛋糕皮。
7. 二德惠有脫氧劑，富澤商店有Pound Cake密封袋，加埋直髮夾封口，郵寄冇問題。記得用EMS空郵。
係唔係由學生好嘅手去整
