嗰個年代，培養聽流行音樂嘅口味係一件都幾認真而且非常重要嘅事，朋輩或異性交往，統行音樂係一個必然嘅話題。
因為冇Internet、冇MP3、連MD都未有(千禧世代問：乜嘢係MD?)，聽音樂就要買CD，頂多係過歌落卡式帶，但音質差好多。須知道CD響過去二十年冇減過價，$90 一隻碟相對於當年嘅物價好貴，所以每隻碟都要諗清楚先買，於是電台同電視音樂節目好重要，因為你只能夠從呢度能夠聽到歌再決定買咩碟 – 以前做電台，DJ、幕後、管理層有能力決定播邊個就紅邊個，所以權力好大，而唱片產業鏈利潤豐厚，所以亦好多唱片公司用好多方法巴結電台人員。
1995年嘅時候，仍然有唔少人出街會聽Walkman，一來因為Discman貴而且行緊嘅時候會因為震盪而跳線（有記憶緩衝功能嘅就會貴啲），二來因為好多人鍾意自己揀歌”dup”落卡式帶，自製精選系列。
1995年前後翻版碟開始賣到成行成市，對唱片業都幾大影響，後來政府掃得勁，加上傳媒搵歌手全力教育大眾買老翻係一件可恥嘅事，結果翻版對唱片業嘅影響都未到好災難性，真正對CD 銷量最大打擊嘅，應該係1995年開始普及嘅Internet、MP3同後來出現嘅Napster平台(一隻P2P交換file嘅軟件)。
【6. 乜嘢係Pentium?】
以前Intel 嘅 CPU 形號係8088，80286，80386，80486咁排落去。80486之後唔叫80586，而係叫Pentium。當年HD 1GB已經係天文數字，8MB RAM已經好勁。
1995年最重要嘅電腦課題有兩個，一個係Windows 95 面世，啲人最初唔明個Start制有咩用；第二係一個叫“Internet”嘅新玩意，大部分人都未知係咩嚟，modem仍然唔係買機必需品。
1995年，有公司開www網站係新聞。呢個就係Internet時代來臨前嘅一刻。
同場加映：100MB Zip Drive磁碟 ~~ 你可以理解為巨型SD Card，手掌咁大，而且
