個段時間為咗令自己可以快啲忘記佢，去學野去番工，務求令自己忙啲。只要個人一攰就乜都唔會諗。但其實我明白係掛住嘅你做咩佢依然都係你心入面冇走過。個排放工一個人搭車聽歌係最難受既時候，尤其見到街上既情侶，我就諗如果我地冇分手，我地都會好似佢地咁。慢慢一個月一個月咁過去，慢慢我開始唔記得佢咩樣，但依然會諗起佢。直到2018開始，我同自己講我想好好開始，我唔想再原地踏步，我好決斷咁del左同佢既對話，希望自己唔好再留戀。但其實個刻我諗我仲係忘記唔到佢，我會睇下佢ig有冇更新，雖然佢較左private。有一排唔知自己做乜，好想搵佢，好想同佢可以再開始，於是係咁上網搵復合方法。不過最後因為自尊心既關係同唔知佢係咪已經有新女友，我乜都冇做。大概自己怯同覺得自己變得未夠好出現係佢面前。
直到前排我知道佢真係有新女朋友，個下我睇完冇乜感覺。心入面大概覺得時間耐左 對佢既感覺慢慢淡。我想同未放低ex既你講，曾經我都以為自己唔會放得低佢，因為我好愛佢，愛佢多過愛自己。哩段時間你可能好辛苦 唔想撐落去 點解愛一個人會變得咁辛苦。我絕對明白，我亦希望你明白，佢唔愛你唔等於你都要唔愛自己。將自己變得更好為左可以重新出現係佢面前或者為左可以遇到下一個更好既人都好，你都要好好照顧自己愛自己。只有愛自己既人先值得被人愛。可以繼續難過可以繼續掛住，但要定個限期比自己。時間係最好既良藥，我得，你都一定得，無野過唔去，只要你願意。
願你一切安好無事。
利申：好長 打左好耐 多謝你睇曬佢。
可能下一秒就出現
