香港嘅漫畫店買少見少，漫畫小店逐間結業，今日有報道話一間位於旺角嘅漫畫店，就係靠寫真集撐住間舖，店主新哥更講到近期最賣得嘅寫真就係樂瞳：「睇潮流，新聞越多越好賣。近期最好賣，樂瞳啦，到呢家都日日有人問，不過已經冇貨，出版社都話賣斷晒。」31歲樂瞳寫真賣斷貨！
以上係一個漫畫店轉營嘅故事，係勵志定悲哀，相信每個人嘅定義都唔同，但人生係充滿希望。今日《蘋果》聯絡到樂瞳，講到漫畫店的轉型故事，佢話：「其實o依家實體書紙媒真係好難做，好多人都係上網睇嘢，而且免費，越來越少人願意真金白銀買實體書，除非你好鍾意同好希望收藏嗰本漫畫或者寫真集。」
對於自己本寫真撐起間漫畫店，樂瞳就話：「冇諗過自己本寫真集都可以為呢間小店嘅逆境帶來一點希望，其實都好感動，好感觸，自己以前都會行信和，都會好希望呢種本土文化可以一直流傳，我相信信和都係好多人嘅集體回憶，o依家已經少咗好多人買CD聽歌同買漫畫書，再唔支持購買，將來都唔知再可以去邊買到，希望佢哋可以撐住，同埋都會叫仲想買我寫真嘅朋友去佢哋度支持吓。」
