今次Live除了講點解跳舞甩beat之外,都有同粉絲一齊討論下劇集《降魔的》嘅劇情,仲話劇集今個星期已經進入結局篇,另外主持人亦提到原本以為《降魔的》係一套純賣搞笑膠劇,點知原來係非膠劇,引來有好多各大討論區嘅網友都十分支持馬明會奪視帝,馬明之後都有回應,「首先各大討論區咁撐我地《降魔的》,我覺得一個戲最好係笑中有淚,唔係話唔好笑,但笑完無乜嘢,觀眾共鳴會細啲。但如果笑完可以有種message帶到俾觀眾,我相信會更加可以係觀眾心中留下一個印象。」
佢表示咁多觀眾鍾意《降魔的》已經係一個獎,「我比較簡單啲。如果浩信拎我都好開心,因為佢都係好好朋友,展鵬阿蕭拎都會好開心,我最希望《降魔的》可以拎到最佳劇集!」而近期忙於係上海拍緊電影嘅馬明仲預告埋明年嘅動向,「《宮心計》預計會係出年3-4月會播,但其實我出年年頭就會返TVB拍劇,雖然咩劇就未定唔可以講住。」